Last updated on October 9th, 2025 at 07:01 pm
ಮೈಸೂರ್, ಅ. 9: ಸೊತ್ತುತೂಪರಿಕೆದ ಮೈದಾನೊಡು ದಸರಾಡ್ ಪುಗ್ಗೆ ಮಾರ್ಯೆರ ಬತ್ತಿತ್ತಿನ 10 ವರ್ಸ ಪ್ರಾಯೊದ ಪೊಣ್ಣು ಬಾಲೆ ಪುನ ಆದ್ ತಿಕ್ಕ್ದಲ್. ಪೊಣ್ಣನ ಪುನತ ಮೆಯಿಟ್ ಕುಂಟುದಾಂತೆ ಇತ್ತಿನೆರ್ದಾವರ ಅತ್ಯಾಚಾರ ಮಲ್ತ್ ಕೆರ್ದುಪ್ಪೊಡು ಪನ್ದ್ ಪೊಲೀಸೆರ್ ಅಂದಾಜಿ ಮಲ್ದೆರ್.
ದಸರಾದ ಪೊರ್ತುಡು ಪುಗ್ಗೆ ಮಾರ್ಯೆರ ಕಲಬುರಗಿ ದಂಚಿರ್ದ್ ಮೈಸೂರ್ಗ್ ಹಕ್ಕಿಪಿಕ್ಕಿ ಜನಾಂಗೊದ 50 ರ್ದ್ಲಾ ಎಚ್ಚ ಕುಟುಮೊಲು ಬತ್ತ್ದ. ಮೊಕುಲು ದೊಡ್ಡಕೆರೆ ಮೈದಾನೊದ ಸುತ್ತದ ಸಾದಿಡ್ ನಿಲೆ ಆದಿತ್ತೆರ್.
ರಾತ್ರೆ ಬೇರ ಮುಗಿತ್ದ್ ಬತ್ತಿನ ಪೊಣ್ಣು ಅಪ್ಪೆ, ಅಮ್ಮನ ಒಟ್ಟುಗು ಜೆತ್ತಿತ್ತಲ್. ಕಾಂಡೆ ಬರ್ಸ ಬತ್ತ್ದ್ ಮಾತೆರ್ಲಾ ಲಕ್ಕ್ನಗ ಪೊಣ್ಣು ತೋಜೊಂದಿಜ್ಜಂಡ್. ನಾಡ್ನಗ ಟೆಂಟ್ರ್ದ್ 50 ಮೀ ದೂರೊಡು ಮಣ್ಣ್ದ ರಾಶಿಡ್ ಪುನ ಆದ್ ತಿಕ್ಕ್ದಲ್.
ಕಾಲಿ ರಡ್ಡ್ ದಿನ ದುಂಬು ಪೊಣ್ಣನ ಪುನ ತಿಕ್ಕಿನ ಜಾಗೆದ ಕೈತಲೇ ರೌಡಿಶೀಟರ್ನ ಒಟ್ಟುಗು ಇತ್ತಿನ ಒರಿಯನ್ ಕೆರ್ದಿತ್ತೆರ್. ಇತ್ತೆ ಅವ್ವೇ ಜಾಗೆಡ್ ಪೊಣ್ಣನ ಪುನಲಾ ತಿಕ್ಕ್ದ್ಂಡ್. ಜಾಗೆಗ್ ಶ್ವಾನ ದಳ ಬತ್ತಿತ್ತ್ದ್, ಪೊಲೀಸೆರ್ ಸಿಸಿಟಿವಿ ಪರಿಶೀಲನೆ ಮಲ್ತೊಂದುಲ್ಲೆರ್.