Last updated on October 15th, 2025 at 09:57 am
ಬೆಂಗಳೂರು, ಅ. 15: ಅಕ್ಟೋಬರ್ 4 ತಾನಿ ಅರಂತಡೆ ಮೈದಾನೊಡು ನಡತಿನ ಬಸವ ಸಂಸ್ಕೃತಿ ಅಭಿಯಾನ ಮುಗಿತಲ ಲೇಸ್ಡ್ ಸಿಎಂ ಸಿದ್ದರಾಮಯ್ಯೆರ್ ಭಾಷಣೊಡು, ಬಸವ ಜಯ ಮೃತ್ಯುಂಜಯ ಸ್ವಾಮೀಜಿ ಬೊಕ್ಕ ವೀರಶೈವ-ಲಿಂಗಾಯತ ಸಮಾಜೊದಕುಲು, ‘ನಮ್ಮ ಮೆಟ್ರೋಗ್ (Namma Metro)’ ಬಸವಣ್ಣ ನ ಪುದರ್ ದೀಯೆರ ಕಾಯೆಸ್ ಮಲ್ತಿನೆಕ್ ಪ್ರತಿಕ್ರಿಯೆ ಕೊರ್ದು, “ಉಂದು ಪತ್ತ ರಾಜ್ಯ ಸರ್ಕಾರೊದ ಯೋಜನೆ ಆದಿತ್ತುದುಂಡ ಇನಿಯೇ ‘ಬಸವ ಮೆಟ್ರೋ’ ಪನ್ದ್ ಘೋಷಣೆ ಮಲ್ಪೆದೆ. ಮೆಟ್ರೋ ಕೇಂದ್ರ-ರಾಜ್ಯ ಸರ್ಕಾರೊದ ಯೋಜನೆ. ಕೇಂದ್ರೊದ ಅನು ಬೋಡು, ಇಜಿಂಡ ಎಂಕ್ಲನೇ ಪುದರ್ ದೀಪೆದ” ಪನ್ದ್ ಪನ್ದಿತ್ತೆರ್. ಬೊಕ್ಕ ನಮ್ಮ ಮೆಟ್ರೋಗ್ ‘ಬಸವ ಮೆಟ್ರೋ’ ಪನ್ದ್ ಪುದರ್ ದೀಪುನ ಬಗೆಟ್ ಕೇಂದ್ರಗ್ ಶಿಫಾರಸ್ ಮಲ್ಪುವೆ ಪನ್ದಿತ್ತೆರ್. ಆಂಡ ಇತ್ತೆ ಈ ವಿಚಾರೊಡು ಸಿಎಂ ಇಡೆಟ್ ತಿಕ್ಕ್ದ್ ಬೂರೊಂದಿಲೆಕ ಆತ್ಂಡ್.
ಸಿಎಂನ ಪಾತೆರೊನು ಖಂಡನೆ ಮಲ್ದಿನ ವಿಶ್ವ ಒಕ್ಕಲಿಗ ಮಹಾ ವೇದಿಕೆ, ಪರ ನೆಂಪುನು ಪಿರ ಪುಟ್ಟಾದ್ಂಡ್. 2015 ತ ಡಿಸೆಂಬರ್ 2 ತಾನಿ ನಾಯಂಡಹಳ್ಳಿಡ್ ನಡತಿನ ಕಾರ್ಯಕ್ರಮೊಡು ಮುಖ್ಯಮಂತ್ರಿ ಸಿದ್ದರಾಮಯ್ಯೆರ್ ಬೊಕ್ಕ ಕೇಂದ್ರ ಸಚಿವೆ ವೆಂಕಯ್ಯ ನಾಯ್ಡು ಅಂಚೆನೇ ಸೇರ್ದಿನ ಪಾಕ ಜನೊತ ಎದುರು ಹಾಲಿ ವಿಜಯನಗರ ಶಾಸಕೆರ್, ಮಾಜಿ ಸಚಿವೆ ಎಂ. ಕೃಷ್ಣಪ್ಪೆರ್ ನಮ್ಮ ಮೆಟ್ರೋಗ್ ನಾಡಪ್ರಭು ‘ಕೆಂಪೇಗೌಡ ಮೆಟ್ರೋ’ ಪನ್ಪಿ ಪುದರ್ ದೀವೊಡು ಪನ್ದ್ ಕೇನ್ದಿತ್ತೆರ್. ಅಪಗಲಾ ಸಿಎಂ ಸಿದ್ದರಾಮಯ್ಯೆರ್ ಮುಕ್ತ ಮನಸ್ಸ್ಡ್ ಪರಿಗಣಿಪುವ ಪನ್ದ್ ಪಾತೆರ ಕೊರ್ದಿತ್ತೆರ್. ಆಂಡ ಇತ್ತೆ ‘ಬಸವ ಮೆಟ್ರೋ’ ಪನ್ಪಿ ಪುದರ್ ದೀಯೆರ ಕೇಂದ್ರೊಗು ಶಿಫಾರಸ್ ಮಲ್ಪುವೆ ಪನ್ತೆರ್ ಪನ್ದ್ ವಿಶ್ವ ಒಕ್ಕಲಿಗ ಮಹಾ ವೇದಿಕೆ ನೆಂಪು ಮಲ್ದ್ಂಡ್.
ಬೆಂಗಳೂರು ಕಟ್ಟಾದಿನ ಕೆಂಪೇಗೌಡೆರ್, ಅಂಚಾದ್ ನಮ್ಮ ಮೆಟ್ರೋಗ್ ‘ಕೆಂಪೇಗೌಡ ಮೆಟ್ರೋ’ ಪನ್ಪಿ ಪುದರ್ ದೀಯೆರ ಶಿಫಾರಸ್ ಮಲ್ಪೊಡು ಪನ್ದ್ ಸಿಎಂ ಬೊಕ್ಕ ಡಿಸಿಎಂಗ್ ವಿಶ್ವ ಒಕ್ಕಲಿಗ ಮಹಾ ವೇದಿಕೆ ಅಧ್ಯಕ್ಷೆ ವೈ.ಡಿ. ರವಿಶಂಕರ್ ಓಲೆ ಬರೆತೆರ್. ಬೆಂಗಳೂರ್ದ 28 ಶಾಸಕೆರ್, ಕೇಂದ್ರ ಸಚಿವೆರ್, ರಾಜ್ಯ ಸಚಿವೆರ್ ಸೇರ್ದ್ ನಾಲ್ ಜನ ಸಂಸದೆರೆನ್ ಭೇಟಿ ಮಲ್ತ್ದ್ ನಮ್ಮ ಮೆಟ್ರೋಗ್ ‘ಕೆಂಪೇಗೌಡ ಮೆಟ್ರೋ’ ಪನ್ದ್ ಪುದರ್ ದೀಯೆರ ರಾಜ್ಯ ಸರ್ಕಾರೊಗು ಅಂಚೆನೇ ಕೇಂದ್ರ ಸರ್ಕಾರೊಗು ಶಿಫಾರಸ್ ಮಲ್ಪುಲೆಕ ಬಿನ್ನಪು ಮಲ್ಪುವ ಪನ್ದ್ ಆರ್ ತೆರಿಪಾದೆರ್.
ಬೆಂಗಳೂರ್ಗ್ ಬಸವಣ್ಣೆ ದಾಲಾ ಮಲ್ದಿಜೆರ್. ಆರ್ ಉತ್ತರ ಕರ್ನಾಟಕೊಗು ಮಾತ್ರ. ನಮ್ಮ ಮೆಟ್ರೋಗ್ ‘ನಮ್ಮ ಬಸವ ಮೆಟ್ರೋ’ ಪನ್ದ್ ಪುದರ್ ದೀಯೆರ ಪಿದಡ್ಯರ್ನ್ಡ ಕಾನೂನು ಮುಕೇನ ಪೊರ್ಮ್ಬಾಟ ಮಲ್ಪುವ. ಇತ್ತೆನೇ ಈ ವಿಚಾರೊಡು ಆದಿಚುಂಚನಗಿರಿತ ನಿರ್ಮಲನಂದಶ್ರೀ ಲಾ ‘ಕೆಂಪೇಗೌಡ ಮೆಟ್ರೋ’ ಪನ್ದ್ ಪುದರ್ ದೀಯೆರ ಒತ್ತೊಂದೆರ್. ಈ ವಿಚಾರೊಗು ಸಂಬಂಧಿತ್ದ್ ಈ ಶನಿವಾರ ಇನಯ ಲೆತ್ತ್ದ. ನಗರೊದ 28 ಶಾಸಕೆರ್ ಒತ್ತರ್ಮೆಡ್ ಎಂಕ್ಲೆಗ್ ಬೆರಿತಾಂಗ್ ಕೊರೊಡು. ಬೆಂಗಳೂರುಡು ಬುಲೆಯೆರ, ಬದ್ಕ್ ಕಟ್ಟೊನರ ಕೆಂಪೇಗೌಡೆರ್ ನೆವನ ಪನ್ದ್ ವಿಶ್ವ ಒಕ್ಕಲಿಗೆರೆ ಮಹಾ ವೇದಿಕೆದ ಅಧ್ಯಕ್ಷೆ ರವಿಶಂಕರ್ ಪನ್ಡೆರ್.