Last updated on October 18th, 2025 at 09:53 am
ಪುತ್ತೂರು, ಅ. 18: ಟ್ರಾಫಿಕ್ ಪೊಲೀಸೆರ್ ಅಕುಲು ಪನ್ಡಿನೆನ್ ಕೇನ್ಡಿಜೆರ್ ಪನ್ಪಿ ನೆವನೊಗು ಬೆರಿಪತೊಂದು ಬತ್ತ್ದ್ ರಿಕ್ಷಾ ಡ್ರೈವರ್ನ ಮೆಯಿಕ್ ಕೈ ಪಾಡ್ದ್, ಪೆದಂಬು ನೆರ್ತಿನ ಒಂಜಿ ವೀಡಿಯೋ ಇತ್ತೆ ವೈರಲ್ ಆದಿತ್ತ್ದ್, ಸಾರ್ವಜನಿಕೆರ್ ಈ ಬಗೆಟ್ ಬಾರೀ ಆಕ್ರೋಶ ತೂಪಾವೊಂದುಲ್ಲೆರ್.
ಪುತ್ತೂರು ಟ್ರಾಫಿಕ್ ಪೊಲೀಸ್ ಸ್ಟೇಶನ್ದ ಇರ್ವೆರ್ ಸಿಬ್ಬಂದಿಲು ರಿಕ್ಷಾ ಒಂಜೆನ್ ಬೆರಿಪತೊಂದು ಬೈದಿನ, ಬೈಕ್ನ್ ರಿಕ್ಷಾಗ್ ಅಡ್ಡ ಪಾಡ್ದ್ ರಿಕ್ಷಾ ಆಫ್ ಮಲ್ಪೆರೆ ಪನ್ಡ್ದ್ ಕೀ ಒಯ್ತೊನರೆ ತೂಪುನು, ವೀಡಿಯೋ ಮಲ್ಪುವನಾ ಪನ್ದ್ ಜೋರು ಮಲ್ಪುನು, ಅಂಗಿನ್ ಒಯ್ಪುನು, ಪೆದಂಬು ನೆರ್ಪುನು ಅಂಚೆನೇ ಮೆಯಿತ ಮಿತ್ತ್ ಕೈ ಪಾಡುನು ಮಾತಲಾ ಆ ವೈರಲ್ ವೀಡಿಯೋಡ್ ಕೈದಾತ್ಂಡ್.
ಈ ವೈರಲ್ ವೀಡಿಯೋ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಲೆನಡೆ ಮುಟ್ಟ ಎತ್ತ್ದಿತ್ತ್ದ್, ಕಚೇರಿರ್ದ್ ಸ್ಪಷ್ಟನೆ ಕೊರ್ತೆರ್. ಈ ರಡ್ಡ್ ಪೋಲೀಸ್ ಸಿಬ್ಬಂದಿಲು ಮಲ್ದಿನವು ತಪ್ಪು, ದಾಯೆ ಇಂಚ ಮಲ್ದೆರ್ ಪನ್ದ್ ಪರಿಶೀಲನೆ ಮಲ್ತ್ದ್, ಬೋಡಾಪಿನ ಕ್ರಮ ಗೆತೊನುವ ಪನ್ದ್ ಪನ್ತೆರ್.