Last updated on October 24th, 2025 at 11:22 am
ಕುಡ್ಲ: ‘ತುಲುವೆರೆನ ಮಾತಾ ಆಚರ್ಣೆದ ಪಿರವುಡು ಒಂಜಿ ಎಡ್ಡೆ ಉದ್ದೇಸೊದ ನಂಬೊಲಿಗೆ ಉಂಡು. ತುಲು ಪರಪೋಕು, ಎಡ್ಡೆಮೆಲ್ಲಿಲು ಅಜ ತತ್ತೊಂದಿಪ್ಪಿ ಈ ಪೊರ್ತುಡು ಅವೆನ್ ಸಾಂಚ ರೂಪೊಡು ಒರಿತೊಂದು ಬರ್ಪಿನ ಆರಬಾರ ನಮನ ಮಿತ್ತ್ ಉಂಡು’ ಪಂಡ್ದ್ ತೊರತ್ಕಲ್ ಗೋವಿಂದದಾಸ ಕಾಲೇಜಿದ ಕಲ್ಪಾದಿ ಅಕ್ಷತಾ ವಿ. ಪಂಡೆರ್. ಕುಡ್ಲದ ಕೆನರಾ ಕಾಲೇಜಿಡ್ ನಡತಿನ ‘ತುಲುವೆರೆ ಕಲ ಟ್ರಸ್ಟ್’ದ ಪದಗ್ರಹಣ ಬೊಕ್ಕ ಕಬಿಕೂಟ ಲೇಸ್ಡ್ ಆರ್ ‘ತುಡರ ಪರ್ಬ’ದ ಬಗೆಟ್ ಗೇನೊದ ಮದಿಪು ಕೊರ್ಯೆರ್.
‘ತುಲುತ್ತ ಬೇಲೆ ಮಲ್ಪೆರೆ ಮಸ್ತ್ ಕೂಟೊಲು ಉದಿತೊಂದುಲ್ಲ. ಉಂದು ಕುಸಿತ್ತ ಸಂಗತಿ. ಪರ್ಬೊದ ಆಚರ್ಣೆಲು ಊರುರ್ದು ಊರುಡು ವ್ಯತ್ಯಾಸ ಇತ್ತ್ಂಡಲಾ, ಆಶಯ ಒಂಜೇ ಆದುಂಡು. ತುಲುನಾಡ್ ಈತ್ ಪೊರ್ಲಾಯರೆ ಕಾರಣ ಮುಲ್ಪದಕ್ಲೆನ ಎಡ್ಡೆ ಮನಸ್ ಬೊಕ್ಕ ದಾನ ಗುಣ. ಬಲಿ ಚಕ್ರವರ್ತಿನ ಕಾಲೊಡ್ದೇ ತುಲುವೆರೆಡ ದಾನ ಗುಣ ಬೈದ್ಂಡ್. ಬಲಿನ್ ಬೇತೆ ಬೇತೆ ರೀತಿಡ್ ವ್ಯಾಖ್ಯಾನ ಮಲ್ಪೊಲಿ. ತುಲುನಾಡ್ದ ಸೊರ್ದಯೊಗು ಕಾರಣ ಆಯಿನ ಬಲಿನ ಬದ್ಕ್ಡ್ ನಮನ ಬದ್ಕ್ದ ಪಾಟ ಉಂಡು. ಬೆನ್ನಿದ ಬೇಲೆದ ಪೊಲಬು ಪರ್ಬದ ಆಚರ್ಣೆಡ್ ಉಂಡು’ ಪಂಡೆರ್.
ಯುವವಾಹಿನಿ ಕೇಂದ್ರ ಸಮಿತಿ ದುಂಬುದ ಗುರ್ಕಾರೆ ರಾಜೇಶ್ ಬಿ. ಲೇಸ್ ಉದಿಪನ ಮಲ್ತೆರ್. ‘ತುಲುವೆರೆ ಕಲ ಟ್ರಸ್ಟ್’ ಗುರ್ಕಾರ್ತಿ ಗೀತಾ ಲಕ್ಷ್ಮೀಶ್ ಗುರ್ಕಾರ್ಮೆ ಒಯಿಸೊಂಡೆರ್. ಟ್ರಸ್ಟ್ನ ಮಾನಾದಿಗೆ ಗುರ್ಕಾರೆ ಮುದ್ದು ಮೂಡುಬೆಳ್ಳೆ ಎಡ್ಡೆಪ್ಪುದ ಮದಿಪು ಬಾಮಿಯೆರ್. ಮಾನಾದಿಗೆದ ಬಿನ್ನೆರ್ ಸದಾನಂದ ನಾರಾವಿ ಪಾಲ್ ಪಡೆವೊಂಡೆರ್. ಕೂಟೊದ ಪದುಕೆರ್ ಲೇಸ್ ಪೊರ್ಲು ಮಲ್ತ್ ಕೊರ್ಯೆರ್. ಪನವುದ ಪಾಲವೆರಾಯಿನ ಪ್ರಶಾಂತ್ ಆಚಾರ್ಯ ಎಡಪದವು ಸುಗಿತೆರ್. ಒತ್ತು ಕಾರ್ಯಂತೆರಾಯಿನ ರೇಣುಕಾ ಕಣಿಯೂರು ಕಜ್ಜೊ ನಡಪಾಬಿ ಮದಿಪು ಬಾಮಿಯೆರ್.
ಈ ಪೊರ್ತುಡು ನಡತಿನ ‘ತುಡರ್’ ಕಬಿಕೂಟೊದ ಗುರ್ಕಾರ್ಮೆನ್ ಸಾಹಿತಿ, ಕಲ್ಪಾದಿ ರಘು ಇಡ್ಕಿದು ವಹಿಸೊಂಡೆರ್. ಕಬಿಕುಲಾಯಿನ ವಿಶ್ವನಾಥ ಕುಲಾಲ್ ಮಿತ್ತೂರು. ಡಾ.ಸುರೇಶ್ ನೆಗಳಗುಳಿ, ಉಮೇಶ್ ಶಿರಿಯ, ಪೂರ್ಣಿಮಾ ಕೋಟ್ಯಾನ್ ಮಾರ್ನಾಡ್, ಕೆ.ಶಶಿಕಲಾ ಭಾಸ್ಕರ್ ದೈಲಾ, ಪ್ರಶಾಂತ್ ಆಚಾರ್ಯ ಎಡಪದವು, ರವೀಂದ್ರ ಕುಲಾಲ್ ವರ್ಕಾಡಿ, ಅಶ್ವಿನಿ ತೆಕ್ಕುಂಜ ಕುರ್ನಾಡ್, ಶ್ಯಾಮ್ಪ್ರಸಾದ್ ಭಟ್, ಪದ್ಮನಾಭ ಪೂಜಾರಿ ಬಂಟ್ವಾಳ, ನಳಿನಿ ಭಾಸ್ಕರ್ ರೈ ಮಂಚಿ, ಅನುರಾಧಾ ರಾಜೀವ್ ಸುರತ್ಕಲ್, ಎಡ್ವರ್ಡ್ ಲೋಬೊ ತೊಕ್ಕೊಟ್ಟು, ಸೌಮ್ಯಾ ಆರ್.ಶೆಟ್ಟಿ, ಅಶೋಕ ಎನ್.ಕಡೇಶಿವಾಲಯ, ಸತೀಶ್ ಬಿಳಿಯೂರು, ವಿದ್ಯಾಶ್ರೀ ಅಡೂರ್, ಹಿತೇಶ್ ಕುಮಾರ್ ಎ., ಮಲ್ಲಿಕಾ ಜೆ. ರೈ ಪುತ್ತೂರು, ಆಕಾಶ್ ಗೇರುಕಟ್ಟೆ, ಗುಲಾಬಿ ಸುರೇಂದ್ರ ಸುರತ್ಕಲ್, ಸವಿತಾ ಕರ್ಕೇರ ಕಾವೂರು, ರಮ್ಯಾ ಎನ್., ಶ್ರೀಶಾವಾಸವಿ ತುಲುನಾಡ್, ಗೀತಾ ಲಕ್ಷ್ಮೀಶ್ ಕಬಿತೆ ವಾಚನ ಮಲ್ತೆರ್.
ಟ್ರಸ್ಟ್ದ ಜಬದಾರಿಗ್ ಅಜತ್ತ್ ಬತ್ತಿನಕ್ಲು
ಟ್ರಸ್ಟ್ನ ಮಾನಾದಿಗೆದ ಗುರ್ಕಾರ್ಲಾದ್ ಮುದ್ದು ಮೂಡುಬೆಳ್ಳೆ, ಗುರ್ಕಾರ್ತಿ ಆದ್ ಗೀತಾ ಲಕ್ಷ್ಮೀಶ್, ಒತ್ತು ಗುರ್ಕಾರ್ತಿ ಆದ್ ಶ್ರೀಶಾವಾಸವಿ ತುಳುನಾಡ್, ಕಾರ್ಯಂತೆರಾದ್ ರಾಜೇಶ್ ಶೆಟ್ಟಿ ದೋಟ, ಒತ್ತು ಕಾರ್ಯಂತೆರಾದ್ ರೇಣುಕಾ ಕಣಿಯೂರು, ಪನವುದ ಪಾಲವೆರಾದ್ ಪ್ರಶಾಂತ್ ಆಚಾರ್ಯ, ಸಾಂಸ್ಕೃತಿಕ
ಕಾರ್ಯಂತೆರಾದ್ ಎಚ್ಕೆ ನೈನಾಡ್, ಸಾಂಸ್ಕೃತಿಕ
ಒತ್ತು ಕಾರ್ಯಂತೆರಾದ್ ದಿವ್ಯಶ್ರೀ ಪುತ್ತೂರು, ಸಂಘಟನಾ ಕಾರ್ಯಂತೆರಾದ್ ಪದ್ಮನಾಭ ಪೂಜಾರಿ ಬಂಟ್ವಾಳ, ಸಂಘಟನಾ ಒತ್ತು ಕಾರ್ಯಂತೆರಾದ್ ಚಂದ್ರಹಾಸ ಕುಂಬಾರ ಬಂದಾರು, ಸಾಮಾಜಿಕ ಜಾಲತಾಣ ನಿರ್ವಾಹಕೆರಾದ್ ದಿವ್ಯಾ ಅಂಚನ್, ತುಲುವೆರೆ ಕಲ ಕೂಟೊದ ನಿರ್ವಾಹಕೆರಾದ್ ಆರ್.ಕೆ.ನಿರಂಜನ್, ಸಾಹಿತ್ಯ ಸಮಿತಿ ನಿದಯಂತೆರಾದ್ ಉಮೇಶ್ ಶಿರಿಯ, ಅಶೋಕ ಎನ್.ಕಡೇಶಿವಾಲಯ, ವಿಶ್ವನಾಥ ಕುಲಾಲ್ ಮಿತ್ತೂರು, ಶ್ಯಾಮ್ಪ್ರಸಾದ್ ಭಟ್ ಅಜತ್ತ್ ಬತ್ತೆರ್.
ಬೊಂಬೈ ಎಗ್ಗೆದ ಉದಿಪನ
ಟ್ರಸ್ಟ್ದ ಬೊಂಬೈ ಎಗ್ಗೆದ ಗುರ್ಕಾರ್ಲಾದ್ ಪ್ರಫುಲ್ಲ ದಿನೇಶ್ ಶೆಟ್ಟಿ ಪಡುಕುಡೂರ್(ಡೊಂಬಿವಿಲಿ), ಕಾರ್ಯಂತೆರಾದ್ ಶೋಭಾ ಎಸ್.ಶೆಟ್ಟಿ ನೆಲ್ಲಿದಡಿಗುತ್ತು(ಥಾಣೆ), ಒತ್ತು ಕಾರ್ಯಂತೆರಾದ್ ಸವಿತಾ ಚಂದ್ರಶೇಖರ ಸಾಲಿಯಾನ್ ಕುಳಾಯಿ(ಡೊಂಬಿವಿಲಿ), ಪನವುದ ಪಾಲವೆರಾದ್ ಸಿರಿಮತಿ ಮೈನಾ ಪದ್ಮನಾಭ್ ಶೆಟ್ಟಿ ಪಡುಕುಡೂರ್(ಡೊಂಬಿವಿಲಿ), ಸಂಘಟನಾ ಕಾರ್ಯಂತೆರಾದ್ ಲಕ್ಷ್ಮೀನಾರಾಯಣ ಶೆಟ್ಟಿ ಹರೇಕಳ(ಕಲ್ಯಾಣ್), ಬರವು ಕೂಟ ಪ್ರಮುಖೆರಾದ್ ಕುಮುದಾ ಡಿ.ಶೆಟ್ಟಿ ಮುಗೆರೋಡಿ(ಕಲ್ಯಾಣ್) ಅಜತ್ತ್ ಬತ್ತೆರ್.
ಇತ್ತೆದ ಪೇಂಟೆದ ಜೋಕುಲು ನಮನ ಇಲ್ಲದ ಬೆಂದ್ರ್ಡ್ ತೂ ಪೊತ್ತುನ ತೂದು, ತೂ ಬೂರುಂಡು ಪಂಡ್ದ್ ಅಲ್ಕ್ದ್ ಫೈರ್ ಸ್ಟೇಷನ್ಗ್ ಫೋನ್ ಮಲ್ಪೆರೆ ಪನ್ಪೆರ್. ಕದಿಕೆ ಬಾರ್ ಬದಲ್ಗ್ ತಡ್ಪೆ ಬಾರ್ಗ್ ತುಡರ್ ತೋಜಾವುನ ಕಾಲೊ ಬೈದ್ಂಡ್. ಬಳೆಕ್ಕಿಡ್ ತುಡರ್ ದೀಪಿನ, ಬಲೀಂದ್ರನ್ ಲೆಪ್ಪುನ, ಬೆನ್ನಿದ ಬದ್ಕ್, ಅವೆತ್ತ ಪೊಲಬು ಮದೆ ಆವೊಂದಿಪ್ಪಿ ಈ ಪೊರ್ತುಡು ಅವೆನ್ ಕುಡ ನೆನಪು ಮಲ್ತೊನುನ ಬೇಲೆ ಆವೊಡು.
| ಅಕ್ಷತಾ ವಿ., ಕಲ್ಪಾದಿ
ಗೋವಿಂದದಾಸ ಕಾಲೇಜ್, ತೊರ್ತಲ್.