Last updated on November 1st, 2025 at 03:24 pm
ಹೈದರಾಬಾದ್, ನ. 1: ಆಂಧ್ರ ಪ್ರದೇಶದ ಶ್ರೀಕಾಕುಳಂ ಜಿಲ್ಲೆದ ಕಾಶಿಬುಗ್ಗ ಪೇಂಟೆದ ಶ್ರೀ ವೆಂಕಟೇಶ್ವರ ಸ್ವಾಮಿ ದೇಲಂತಡೆಡ್ ಇನಿ ನಡತಿನ ಸ್ಟಾಂಪೇಡ್ (Stampede) ಡ್ ಕಮ್ಮಿಡ್ 10 ಜನ ಭಕ್ತೆರ್ ತೀರ್ದೆರ್. 7 ಜನ ಅಲ್ಪನೇ ತೀರ್ದಿತ್ತ್ದ್, ಮೂವೆರ್ ಆಸ್ಪತ್ರೆಡ್ ತೀರ್ದೆರ್. ನಡಕೆಡ್ ಪಾಕ ಜನಕ್ ಗಡಿಕುಲಾತ. ಕಾರ್ತಿಕ ಮಾಸೊದ ಏಕಾದಶಿ ದ ಲೆಕ್ಕೊಡು ಭಕ್ತೆರ್ ಮಾಮಲ್ಲ ಸಂಖ್ಯೆಡ್ ಸೇರ್ದಿತ್ತಿನೆರ್ದಾವರ ಈ ನಡಕೆ ನಡತ್ದ್ಂಡ್ ಪನ್ದ್ ಆಂಧ್ರ ಪ್ರದೇಶ ಸಿಎಂ ಕಚೇರಿದ ಪ್ರಕಟಣೆ ತೆರಿಪಾದ್ಂಡ್. ರಕ್ಷಣಾ ಕಾರ್ಯಾಚರಣೆ ನತೊಂದಿತ್ತ್ದ್, ತೀರ್ದಿನಕ್ಲೆನ ಸಂಖ್ಯೆ ನನಲಾತ್ ಎಚ್ಚ ಆಪಿನ ಸಾಧ್ಯತೆ ಉಂಡು.
ಕಾರ್ತಿಕ ಮಾಸೊದ ಏಕಾದಶಿತ ಲೆಕ್ಕೊಡು ದೇಲಂತಡೆಗ್ ಮಾಮಲ್ಲ ಸಂಖ್ಯೆಡ್ ಭಕ್ತೆರ್ ಬತ್ತ್ದೆರ್. ಸುಮಾರ್ 15000 ಭಕ್ತೆರ್ ದರ್ಶನೊಗು ಬತ್ತ್ದೆರ್ ಪನ್ದ್ ಮೂಲೊಲು ತೆರಿಪಾದ. ಕಡೀರ ವರದಿಲೆನ ಪ್ರಕಾರ, ದೇಲಂತಡೆದ ಸುತ್ತುಮದೆಲ್ದ ಆನೆಬಾಕಿಲ್ದ ಕೈತಲ್ ಒರರ್ದ್ ಒರಾನೆ ಜನ ಎಚ್ಚ ಸೇರ್ದ್ ಒತ್ತರ್ಮೆ ಏರ್ದ್ಂಡ್. ಉಂದೆರ್ದಾವರ ಜನೊಕ್ಲೆಗ್ ಅಂಚಿ ಪೋವೊಡಾ ಇಂಚಿ ಪೋವೊಡಾ ತೆರಿಯಂದೆ ಒರಿಯನೊರಿ ನೂಕೊನರೆ ಪತ್ತ್ದೆರ್, ತಿರ್ತ್ ಬೂರ್ನಕ್ಲೆನ್ ತೊರಿತೊಂದೇ ಪೋತೆರ್.
ಪರಿಸ್ಥಿತಿನ್ ಅಂಕೆಗ್ ಕನಯೆರೆ ಅಂಚೆನೇ ರಕ್ಷಣಾ ಕಾರ್ಯಾಚರಣೆಲೆಗ್ ಪೊಲೀಸ್ ಕೂಟೊಲು ಬೊಕ್ಕ ಎಮರ್ಜೆನ್ಸಿ ಸಿಬ್ಬಂದಿ ಜಾಗೆಗ್ ಬತ್ತ್ದೆರ್. ನಡಕೆ ನಡತಿನ ಒಂತೆ ಪೊರ್ತುಡೇ ಕೃಷಿ ಸಚಿವೆ ಕೆ. ಅಚ್ಚನ್ನಾಯ್ಡು ಅಡೆ ಬತ್ತ್ದ್ ಪರಿಸ್ಥಿತಿನ್ ಅಂಕೆಗ್ ಕನಯೆರೆ ಅಧಿಕಾರಿಲೆಡ ಪಾತೆರಕತೆ ಮಲ್ತ್ದೆರ್.