Last updated on November 7th, 2025 at 08:51 am
ಬಜ್ಪೆ, ನ. 07: ಮದರಸರ್ದ್ ಇಲ್ಲಗ್ ಪಿರ ಪೋವೊಂದಿತ್ತಿನ ಆಣನ ಮಿತ್ತ ತಿರ್ಗು ನಾಯಿಲು ದಾಳಿ ಮಲ್ತಿನ ನಡಕೆ ಬಜ್ಪೆ ಕಂದಾವರ ಗ್ರಾಮ ಪಂಚಾಯತ್ ಸೀಮೆದ ಸೌಹಾರ್ದ ನಗರೊಡು ನಡತ್ದ್ಂಡ್.
ಸೌಹಾರ್ದ ನಗರ ನಿವಾಸಿ ಮುಹಮ್ಮದ್ ಅಝರ್ ಪನ್ಪಿನಾರೆನ ಮಗೆ ಅಹಿಲ್ ಗಡಿಕುಲಾತಿನ ಆಣ್ ಪನ್ದ್ ತೆರಿದ್ ಬೈದ್ಂಡ್.
ಕೋಡೆ ಕಾಂಡೆ ಸುಮಾರ್ 7:30 ಕ್ ಬಜ್ಪೆ ಸೌಹಾರ್ದ ನಗರ ಪನ್ಪಿನಲ್ಪ ಅಹಿಲ್ ಮದರಸ ರ್ದ್ ಇಲ್ಲಗ್ ಪಿರ ಬರೊಂದುಪ್ಪುನಗ ತಿರ್ಗು ನಾಯಿ ಬತ್ತ್ದ್ ಆಯನ ಮಿತ್ತ್ ಗಾತಿದ ದಾಳಿ ಮಲ್ದ್ಂಡ್. ನಾಯಿಲೆನ ದಾಳಿಗ್ ಆಣನ ಕೆಪ್ಪೆ, ಕೈಗ್ ತುಚ್ಚಿನ ಗಾತಿದ ಗಡಿಕುಲಾತ. ನಡಕೆ ಇಲ್ಲದ ಎದುರುದ ಸಾದಿಡ್ ನಡತಿನೆರ್ದಾವರ ಆಣನ ಬೊಬ್ಬೆ ಕೇನ್ದ್ ಪಿದಯಿಬತ್ತಿನ ಅಪ್ಪೆ ಮಗನ್ ಬಚಾವ್ ಮಲ್ತ್ದೆರ್. ಅಪಗನೇ ಬಜ್ಪೆ ಸರಕಾರಿ ಆಸ್ಪತ್ರೆಗ್ ದಾಕಲ್ತ್ದೆರ್. ಎಚ್ಚಿನ ಮರ್ದ್ಗ್ ಕಟೀಲ್ದ ದುರ್ಗ ಸಂಜೀವಿನಿ ಮಣಿಪಾಲ್ ಆಸ್ಪತ್ರೆಗ್ ದಾಕಲ್ತ್ದೆರ್ ಪನ್ದ್ ತೆರಿದ್ ಬೈದ್ಂಡ್.
ಈ ಬಗೆಟ್ ಪಾತೆರ್ನ ಆಣನ ಸಮ್ಮಲೆ ಮುಹಮ್ಮದ್ ಮುಝಮ್ಮಿಲ್, ತಿರ್ಗುನಾಯಿಲೆನ ಉಪದ್ರ ಬೊಕ್ಕ ದಾಳಿರ್ದ್ ರಕ್ಷಣೆ ಕೊರ್ಯೆರ ಕರಿನ ಮೂಜಿ ವರ್ಸೊರ್ದಿಂಚಿ ಕಂದಾವರ ಗ್ರಾಮ ಪಂಚಾಯತ್ಗ್ ಬಿನ್ನಪು ಸಂದಾವೊಂದು ಬತ್ತ್ದ. ಆಂಡ ಇಡೆಮುಟ್ಟ ಒವ್ವೇ ಕ್ರಮ ಗೆತೊಂದಿಜೆರ್. ಕೇನ್ಡ ನಾಯಿಲೆನ್ ಕೆರಂದಿಲೆಕ ನ್ಯಾಯಂತಡೆದ ಆದೇಶ ಉಂಡು ಪನ್ದ್ ಪನ್ಪೆರ್ ಪನ್ದ್ ಅಸಮಾಧಾನ ತೂಪಾದೆರ್.