Last updated on November 6th, 2025 at 04:54 pm
ಕುಡ್ಲ, ನ. 06: ಕೇಂದ್ರ ಸರ್ಕಾರ ಆಣ್ ಜೋಕ್ಲೆನ ಅಂಚೆನೇ ಪೊಣ್ಣು ಜೋಕ್ಲೆನ ಹಾಸ್ಟೆಲ್ ಕಟ್ಟಾಯೆರ ರಾಷ್ಟ್ರೀಯ ಉಚ್ಛತರ್ ಶಿಕ್ಷಾ ಅಭಿಯಾನ (RUSA-1)ದ ಅಡಿಟ್ ಬುಡುಗಡೆ ಮಲ್ದಿನ ಕಾಸ್ನ್ ದುರುಪಯೋಗ ಮಲ್ತೊಂದಿನೆನ್ ಮಂಗಳೂರು ವಿವಿ ಒತ್ತೊಂದುಂಡು ಪನ್ದ್ ಡೆಕ್ಕನ್ ಹೆರಾಲ್ಡ್ ವರದಿ ಮಲ್ದ್ಂಡ್.
ಕರ್ನಾಟಕ ರಾಜ್ಯ ಉನ್ನತ ಶಿಕ್ಷಣ ಮಂಡಳಿ(KSHEC)ಗ್ ಕೊರ್ತಿನ ಸದುಟು ವಿವಿ ಅಧಿಕಾರಿಲು ಸರ್ಕಾರೊಗು ಈ ದುಂಬು ಸಂದಾದಿನ ಗಲಕೆ ಪ್ರಮಾಣಪತ್ರ ಕಲು ಪನ್ದ್ ಪನ್ತೆರ್.
ವಿವಿ ದ ಬುಲೆಚ್ಚಿಲ್ ಯೋಜನೆದ ಪ್ರಕಾರ ಆಣ್ ಜೋಕ್ಲೆನ ಅಂಚೆನೇ ಪೊಣ್ಣು ಜೋಕ್ಲೆನ ಹಾಸ್ಟೆಲ್ ಕಟ್ಟಾಯೆರ 7 ಕೋಟಿ ರೂಪಾಯಿ ಬುಡುಗಡೆ ಮಲ್ತಿತ್ತೆರ್. ಆಂಡ ನಿಧಿ ಗಲಕೆದ ಪರಿಶೀಲನೆಗ್ KSHEC ದ ತಜ್ಞೆರ್ ಬನ್ನಗ ಅಂಚಿನ ಒವ್ವೇ ಬೇಲೆ ಆವಂದಿನ ತೋಜಿದ್ ಬೈದ್ಂಡ್. 2013 ಬೊಕ್ಕ 2017ದ ನಡುಟು RUSA-1 ದ ಅಡಿಟ್ ಈ ಕಾಸ್ ಕೊರ್ದಿತ್ತೆರ್. ಈ ಯೋಜನೆಗ್ ವಿವಿ ಒಟ್ಟು ಸುಮಾರ್ 20 ಕೋಟಿ ರೂಪಾಯಿ ಗೆತೊಂದಿತ್ತ್ಂಡ್ಗೆ. ಪರಿಶೀಲನೆದ ಪೊರ್ತುಡು ಒವ್ವೇ ಹಾಸ್ಟೆಲ್ ಕಟ್ವಾನೊದ ಬೇಲೆನೇ ಸುರು ಮಲ್ಪಂದಿನೆನ್ ತೂದು ತಜ್ಞೆರೆ ಸಮಿತಿಗ್ ಶಾಕ್ ಆತ್ಂಡ್.
ಸಮಿತಿದ ಅಧಿಕಾರಿಲು ದಾಕಲೆಲೆನ್ ಕೊರ್ಯೆರ ಒತ್ತಾಯ ಮಲ್ತ್ಂಡಲಾ ಇಂಟರ್ನ್ಯಾಷನಲ್ ಹಾಸ್ಟೆಲ್ ಕಟ್ಟೆರೆ ಕಾಸ್ನ್ ಬೇತೆ ಕಡೆಕ್ ತಿರ್ಗಾದ ಪನ್ದ್ ಪನ್ಡ್ದ್ ಸಮಿತಿದ ಸಾದಿ ತಪ್ಪಾಯೆರ ತೂತೆರ್ ಪನ್ದ್ ಡೆಕ್ಕನ್ ಹೆರಾಲ್ಡ್ ವರದಿ ಮಲ್ದ್ಂಡ್.
ಈ ವಿಷಯೊನು ಉನ್ನತ ಶಿಕ್ಷಣ ಇಲಾಖೆದ ಪ್ರಧಾನ ಕಾರ್ಯದರ್ಶಿಲೆನ ಮುತಾಲಿಕೆದ SPD ಇನಯೊದ ಎದುರು ಕನತ್ದ್ ವಿವಿ ಅಧಿಕಾರಿಲೆಗ್ ಶೋಕಾಸ್ ನೋಟಿಸ್ ಕೊರ್ತೆರ್. ವಿವಿ ದುರುಪಯೋಗ ಮಲ್ದಿನ ಕಾಸ್ನ್ ವಸೂಲಿ ಮಲ್ತ್ದ್, ಸಂಬಂಧಿತಿನಕ್ಲೆಗ್ ದಂಡ ಪಾಡ್ಯೆರ ಉನ್ನತ ಶಿಕ್ಷಣ ಮಂಡಳಿ ಶಿಫಾರಸ್ ಮಲ್ದ್ಂಡ್.