Last updated on November 7th, 2025 at 11:54 am
ಮುಲ್ಕಿ: ತಿರುವೈಲ್ ಗುತ್ತುದಿಲ್ಲದ ಉದ್ಯಮಿ ನವೀನ್ ಆಳ್ವ ಮೆರೆನ ಮಗೆ, ನೆಲ್ಯಾಡಿದ ಹೊಟೇಲ್ ಉದ್ಯಮಿ ಅಭಿಷೇಕ್ ಆಳ್ವ ಮೇರ್ ಮುಲ್ಕಿ ಮುಟ್ಟದ ಬಪ್ಪನಾಡ್ ಸಂಕೊದ ಕೈತಲ್ ಶಾಂಭವಿ ಸುದೆಕ್ ಲಾಗಿದ್ ಆತ್ಮಹತ್ಯೆ ಮಲ್ತೊಂದಿನ ನಡಕೆ ವರದಿ ಆತ್ಂಡ್.
ನವೆಂಬರ್ 6ತ ರಾತ್ರೆರ್ದ್ ನಾಪತ್ತೆ ಆದಿತ್ತಿನ ಆರೆನ ಪುನ ಇನಿ (ನವೆಂಬರ್ 7) ಶಾಂಭವಿ ಸುದೆಟ್ ತಿಕ್ಕ್ದ್ಂಡ್.
ನಡಕೆದ ಒಲವುದ ಪ್ರಕಾರ, ನವೆಂಬರ್ 6ತಾನಿ ಅಭಿಷೇಕ್ ಆಳ್ವೆರ್ ಇಲ್ಲರ್ದ್ ಪಿದಡ್ದ್ ಪೋದು ಪಿರ ಬರಂದಿನೆನ್ ತೂದು, ಆರೆನ ಅಮ್ಮೆರ್ ನವೀನ್ ಚಂದ್ರ ಆಳ್ವ ಮೇರ್ ಪಡ್ಡೆದ್ರ ಸ್ಟೇಷನ್ಡ್ ಒಯಿಲ್ ಬರೆಪಾದೆರ್. ಪ್ರಕರಣ ದಾಕಲ್ತೊಂಡಿನ ಪೊಲೀಸೆರ್ ಅಪಗನೇ ನಾಡ್ಯೆರ ಪತ್ತ್ನಗ, ಬಪ್ಪನಾಡ್ ಸಂಕೊದ ಕೈತಲ್ ಅಭಿಷೇಕ್ ರೆನ ಕಾರ್ ತಿಕ್ಕ್ದ್ಂಡ್.
ಮುರ್ಕು ತಜ್ಞೆ ಈಶ್ವರ್ ಮಲ್ಪೆ ಮೆರೆನ ಕೂಟ ನಡೀರ್ ಮುಟ್ಟ ಸುದೆಟ್ ನಾಡ್ಂಡಲಾ ದಾಲ ತಿಕ್ಕ್ದಿಜ್ಜಂಡ್
ಇನಿ (ನವೆಂಬರ್ 7) ಕಾಂಡೆ ಮುಲ್ಪದಾರೇ ಆಯಿನ ಸಚಿನ್ ನಾಯಕ್ ಮೇರ್ ಬೋಟ್ಡ್ ನಾಡೊಂದು ಪೋನಗ, ಚಂದ್ರ ಶಾನುಭಾಗೆರೆನ ಕುದ್ರು ದ ಕೈತಲ್ ಅಭಿಷೇಕ್ ರೆನ ಸರ್ರೊ ತಿಕ್ಕ್ದ್ಂಡ್. ಬೊಕ್ಕ ಅವೆನ್ ಸುದೆರ್ದ್ ಮಿತ್ತ್ ಕನತ್ದ್, ಮರಣೋತ್ತರ ಪರೀಕ್ಷೆಗ್ ಕುಡ್ಲದ ಆಸ್ಪತ್ರೆಗ್ ಕಡಪುಡ್ದೆರ್.
ಅಭಿಷೇಕ್ ಆಳ್ವೆರ್ ನೆಲ್ಯಾಡಿಡ್ ಹೊಟೇಲ್ ಬ್ಯುಸಿನೆಸ್ ನಡಪಾವೊಂದಿತ್ತೆರ್. ನವೆಂಬರ್ 6 ತಾನಿ ಕುಡ್ಲರ್ದ್ ತನ್ನ ಕಾರ್ಡ್ ಒಡಿಪುದಂಚಿ ಪೋನಗ ಸಾದಿ ನಡುಟು, ಬಪ್ಪನಾಡ್ದ ಕೈತಲ್ ಕಾರ್ ಉಂತಾದ್ ಶಾಂಭವಿ ಸುದೆಕ್ ಲಾಗಿದೆರ್ ಪನ್ದ್ ಅಂದಾಜಿ ಮಲ್ದೆರ್.
ಬಪ್ಪನಾಡ್ ಚೆಕ್ಪೋಸ್ಟ್ ದ ಕೈತಲ್ ಆರೆನ ಕಾರ್ ಪೋಪುನ ದೃಶ್ಯ ಸಿಸಿಟಿವಿಡ್ ದಾಕಲಾತ್ಂಡ್. ಈ ಬಗೆಟ್ ಮುಲ್ಕಿ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.