Last updated on November 12th, 2025 at 04:10 pm
ಕೊಲ್ಲೂರು, ನ. 12: ಫ್ರಾನ್ಸ್ ಮೂಲೊದ ಆಣ್, ರಷ್ಯನ್ ಪೊಣ್ಣು ಕೊಲ್ಲೂರುದ ದಳಿಟ್ ಶಾಸ್ರೋಕ್ತವಾದ್ ಮದಿಮೆ ಆತೆರ್. ಫ್ರಾನ್ಸ್ದ ಕೃಷ್ಣ ಭಕ್ತೆರಾಯಿನ ನರೋತ್ತಮ ದಾಸ್ ಬೊಕ್ಕ ಜಾಹ್ನವಿದೇವಿ ದಾಸಿ ಮೊಕುಲು ನ. 7 ತಾನಿ ದೇವದ್ವಿಜ ಅಗ್ನಿ ಸಮ್ಮುಖೊಡು ಶಾಸ್ತ್ರೀಯ ರೀತಿಡ್ ಮದಿಮೆ ಆಯೆರ್.
ಮೊಕುಲು ಇರ್ವೆರ್ಲಾ ಒಂತೆ ವರ್ಸೊರ್ದಿಂಚಿ ವೃಂದಾವನೊಡು ಶಾಸ್ತ್ರ ಅಧ್ಯಯನ ಮಲ್ತೊಂದಿತ್ತೆರ್ ಅಂಚೆನೇ ಕಥಕ್ ನಲಿಕೆ ಕಲ್ತೊಂದಿತ್ತೆರ್. ಕರಿನ 4 ವರ್ಸೊರ್ದಿಂಚಿ ಕೊಲ್ಲೂರ್ದ ಅಭಯ ಆಯುರ್ವೇದ ಚಿಕಿತ್ಸಾಲಯೊಗು ಪಂಚಕರ್ಮ ಮರ್ದ್ಗ್ ಬರೊಂದಿತ್ತೆರ್. ಅಲ್ವದ ಬೈದ್ಯೆ ಡಾ| ಶ್ರೀಕಾಂತ್ ಮೆರೆಡ ಭಾರತೀಯ ಸಂಸ್ಕೃತಿದ ಪ್ರಕಾರ ಮದಿಮೆ ಆಪುನ ಆಂಗಲ್ಪುದ ಬಗೆಟ್ ಪನ್ದಿತ್ತೆರ್. ಅಕ್ಲೆನ ಅಂಗಲ್ಪುದ ಲೆಕ, ಮರವಂತೆ ಶ್ಯಾಮಸುಂದರ ಅಡಿಗೆರೆನ ಪೌರೋಹಿತ್ಯೊಡು ಮದಿಮೆ ನಡತ್ಂಡ್.
ವಿಶೇಷ ಬಿನ್ನೆರೆಗ್ ಸ್ಥಳೀಯ ತೆನಸ್ದ ವ್ಯವಸ್ಥೆ ಇತ್ತ್ಂಡ್. ಸುಧೀರ್ ಕೊಡವೂರು ಮೆರೆನ ಕೂಟೊರ್ದು ಶಾಸ್ತ್ರೀಯ ಸಂಗೀತ ನಡತ್ಂಡ್. ರಾಗ ಧನದ ಪದುಕೆರಾಯಿನ ಕೆ.ಆರ್. ರಾಘವೇಂದ್ರ ಆಚಾರ್ಯ, ಲಕ್ಷ್ಮೀ ನಾರಾಯಣ ಉಪಾಧ್ಯ, ಸುಧೀರ್ ಕೊಡವೂರು, ಬಾಲಚಂದ್ರ ಭಾಗವತ್, ಶರ್ಮಿಳಾ ರಾವ್ ಮೊಕುಲು ಮದಿಮೆದ ಲೇಸ್ಗ್ ಸಂಗೀತ ಕಾರ್ಯಕ್ರಮ ಕೊರ್ಯೆರ್.