Last updated on November 12th, 2025 at 03:25 pm
ಮೆಟಾ 1600 ರ್ದ್ಲಾ ಎಚ್ಚ ಬಾಸೆಲೆಡ್ ಪಾತೆರೊಲೆನ್ ಬರವುಗು ರೂಪೊಗು ಜಪ್ಪಾವುನ ಪೊಸ ಏಐ ಫ್ರೇಮ್ವರ್ಕ್ ‘Omnilingual ASR’ ನ್ ಬುಡುಗಡೆ ಮಲ್ದ್ಂಡ್. ಮೆಟಾದ ಫಂಡಮೆಂಟಲ್ ಏಐ ರಿಸರ್ಚ್ (FAIR) ಕೂಟ ಅಭಿವೃದ್ಧಿ ಮಲ್ದಿನ ಈ ವ್ಯವಸ್ಥೆಡ್ ಸುಮಾರ್ 500 ಏರೆಗ್ಲಾ ತೆರಿಯಂದಿನ ಅಂಚೆನೇ ಕಮ್ಮಿ ಸಂಪನ್ಮೂಲ ಇತ್ತಿನ ಬಾಸೆಲು ಉಲ್ಲ. ಇಂದೆಟ್ ಕೆಲ ಬಾಸೆಲೆನ್ ಒವ್ವೇ ಏಐ ವ್ಯವಸ್ಥೆ ಕಡೀರ ಸರ್ತಿ ಗುರ್ತ ಪತ್ತೊಂದುಂಡು.
ಮೆಟಾ “ಏರೆಗ್ಲಾ ಬೊರ್ಚಂದಿನ, ಇಂದೆಕ್ ಮಾತಾ ಏಐ ದಾಯೆ” ಪನ್ದ್ ಇತ್ತಿನ 350 ಬಾಸೆಲೆಡ್ ಲಿಪ್ಯಂತರ ಮಲ್ದಿನ ಆಡಿಯೋ ಡೇಟಾಸೆಟ್ ‘ಓಮ್ನಿಲಿಂಗುವಲ್ ಏಎಸ್ಆರ್ ಕಾರ್ಪಸ್’ ನ್ಲಾ ಬುಡುಗಡೆ ಮಲ್ದ್ಂಡ್, ಅಂಚೆನೇ ಅವೆತ ಒಟ್ಟುಗು ಈ ವ್ಯವಸ್ಥೆಗ್ ಶಕ್ತಿ ದಿಂಜಾವುನ Omnilingual wav2vec 2.0 ಪನ್ಪಿ ಮಲ್ಟಿಲಿಂಗುವಲ್ ಸ್ಪೀಚ್ ಮಾಡೆಲ್ನ್ಲಾ ಬುಡುಗಡೆ ಮಲ್ದ್ಂಡ್.
ಮೆಟಾದ Omnilingual ASR ಪನ್ಡ ದಾದ?
Omnilingual ASR ಪನ್ಪಿನವು ಮೆಟಾದ ಸ್ಪೀಚ್ ರೆಕಗ್ನಿಷನ್ ಮಾಡೆಲ್ಲೆನ ಸೆಟ್ ಆದಿತ್ತ್ದ್, ಉಂದೆಕ್ ಪಾತೆರುನ ಭಾಷೆನ್ ಅರ್ಥ ಮಲ್ತೊನುನ ಅಂಚೆನೇ ಅವೆನ್ ಬರವುದ ರೂಪೊಗು ಜಪ್ಪಾವುನ ಸಾಮರ್ತಿಗೆ ಉಂಡು. ಉಂದು ಇತ್ತೆ ಮಲ್ಲ ಬಾಸೆಲೆನ್ ಮಾತ್ರ ಬರವುದ ರೂಪೊಗು ಜಪ್ಪಾವುನ ಟ್ರಾನ್ಸ್ಸ್ಕ್ರಿಟ್ಟಿಂಗ್ ಮಾಡೆಲ್ಲೆನ ಮಿತ್ತೇ ಇತ್ತ್ದ್ ಇತ್ತೆ 1600 ರ್ದ್ಲಾ ಎಚ್ಚ ಬಾಸೆಲೆಗ್ ಸಪೋರ್ಟ್ ಮಲ್ಪುಂಡು.
ಇಂದೆನ್ ಸುಲಭೊಡು ಪನ್ಪುಂಡ ತುಳು, ಅವಧಿ, ಮೈಥಿಲಿ ಇಂಚಿನ ಭಾಷೆಲೆಗ್ ಇತ್ತೆ ಸಪೋರ್ಟ್ ಮಲ್ಪಂದಿನ ವ್ಯವಸ್ಥೆಲುಲಾ ನನ ಈ ಭಾಷೆಲೆನ ಪಾತೆರೊಲೆನ್ ಬರವುಗು ಒರುಕು ಕನಪುನ, ತರ್ಜುಮೆ ಮಲ್ಪುನ, ಅಂಚೆನೇ ವಾಯ್ಸ್ ಎನೇಬಲ್ಡ್ ಏಐ ಅಸಿಸ್ಟೆಂಟ್ಲೆಗ್ ಮಾತಾ ಸಪೋರ್ಟ್ ಮಲ್ಪುವ.
ಈ ವ್ಯವಸ್ಥೆಗ್ ನೇಲ್ಯ ನೇಲ್ಯ ಡೇಟಾಸೆಟ್ಲು ದಾಂತೆಲಾ ಪೊಸ ಭಾಷೆಲೆನ್ ಕಲ್ಪುನ ಸಾಮರ್ತಿಗೆ ಉಂಡು ಪನ್ದ್ ಮೆಟಾ ಪನ್ಡೊನ್ದುಂಡು. ಲೆಕ್ಕೊದ ಪಾತೆರ ಬೊಕ್ಕ ಬರವುದ ಮಾದರಿಲೆನ ಜೋಡಿಡೇ ಈ ಮಾಡೆಲ್ನ್ ಟ್ರೈನ್ ಮಲ್ಪೊಲಿ. ಉಂದು ಬಜೀ ಕಮ್ಮಿ ಡಿಜಿಟಲ್ ಸಂಪನ್ಮೂಲೊಲು ಇತ್ತಿನ ಸಮುದಾಯೊಲೆನ ಭಾಷೆಲೆಗ್ಲಾ ಸ್ಪೀಚ್ ಟೆಕ್ನಾಲಜಿ ಗಲಸೆರೆ ಸಕಾಯ ಮಲ್ಪುಂಡು.
ಇತ್ತೆ ಗಲಸುನ ಎಚ್ಚಿನ ಸ್ಪೀಚ್ ರೆಕಗ್ನಿಷನ್ ಮಾಡೆಲ್ಲು ಲೇಬಲ್ ಮಲ್ದಿನ ಆಡಿಯೋ ಡೇಟಾದ ಮಿತ್ತ್ ನಡಪುವ. ಉಂದು ಎಚ್ಚ ಜನೊಕುಲು ಪಾತೆರುನ, ಲೆಕ್ಕೊದ ಬಾಸೆಲೆಗ್ ಮಾತ್ರ ಸಪೋರ್ಟ್ ಮಲ್ಪುಂಡು. Omnilingual ASR ಬೇತೆನೇ ಸಾದಿಡ್ ಈ ಸಮಸ್ಯೆದ ಪಿರಿಕಟ್ಟ್ ಮಲ್ಪೆರೆ ತೂಪುಂಡು. ಉಂದು 7 ಬಿಲಿಯನ್ ಪ್ಯಾರಾಮೀಟರ್ದಾತ್ ವಿಸ್ತರಿತಿನ, ಬೇತೆ LLM ಲೆಕಂದಿನ ಮೆಟಾದ wav2vec 2.0speech representation model ದ ಮಿತ್ತ್ ನಡಪುಂಡು. ಮಸ್ತ್ ಕಮ್ಮಿ ಉದಾರ್ಮೆಲೆನ್ ಗಲಸ್ದ್ ಲಿಪ್ಯಂತರ ಮಲ್ಪೆರ ಈ ವ್ಯವಸ್ಥೆ ಸಕಾಯ ಮಲ್ಪುಂಡು.
ಇತ್ತೆನೇ ಈ ವ್ಯವಸ್ಥೆನ್ ಜನೊಕುಲೆಗ್ ಕೊರ್ಪುನೆತ ಬಗೆಟ್ ಮೆಟಾ ನನಲಾ ದಾಲ ಪನ್ತಿಜಿ, ಆಂಡಲಾ ಬೇಗೊಡು ಮೆಟಾ ಪ್ಲಾಟ್ಫಾರ್ಮ್ಲು ಆಯಿನ ವಾಟ್ಸಾಪ್, ಇನ್ಸ್ಟಾಗ್ರಾಂ, ಫೇಸ್ಬುಕ್ಡ್ ಈ ವ್ಯವಸ್ಥೆ ಸಪೋರ್ಟ್ ಮಲ್ಪು ಪನ್ದ್ ತಾಂತ್ರಿಕ ಸಮುದಾಯೊಡು ಕೇನ್ದ್ ಬರೊಂದುಂಡು.