Last updated on November 12th, 2025 at 02:25 pm
ಕುಡ್ಲ, ನವೆಂಬರ್ 12: ಉಳ್ಳಾಲದ ಸಯ್ಯದ್ ಮದನಿ ದರ್ಗಾಡ್ ಭ್ರಷ್ಟಾಚಾರ ಆರೋಪ ಕೇನ್ದ್ ಬೈದ್ಂಡ್. ದರ್ಗಾ ಕಮಿಟಿಡ್ 55 ಜನ ಪದುಕೆರ್ ಇತ್ತ್ಂಡಲಾ ಕಾಲಿ ಏಳೆಣ್ಮ ಜನ ಸೇರ್ದ್ ಅಕ್ಲೆಗ್ ಬೋಡಾಯಿಲೆಕ ನಡಪಾವೊಂದುಲ್ಲೆರ್ ಪನ್ದ್ ಕಮಿಟಿದ ಪದುಕೆರೇ ಆರೋಪ ಮಲ್ತ್ದೆರ್.
ಸುದ್ದಿಗೋಷ್ಟಿ ಮಲ್ತಿನ ಅಕುಲು, ವಕ್ಫ್ ಇಲಾಖೆಗ್ ಸೇರ್ದಿನ ಉಳ್ಳಾಲದ ಸಯ್ಯದ್ ಮದನಿ ದರ್ಗಾ ಬೊಕ್ಕ ಜುಮಾ ಪಲ್ಲಿದ ಆಡಳಿತೊಡು ಭಾರೀ ಅವ್ಯವಹಾರ ಆವೊಂದಿತ್ತ್ದ್, ಈ ಬಗೆಟ್ ಎಂಕ್ಲ ಪ್ರಶ್ನೆ ಮಲ್ತ್ಂಡಲಾ ಗೆನ್ತೊಂದಿಜ್ಜೆರ್. ವಕ್ಫ್ ಇಲಾಖೆದಕ್ಲೆಗ್, ಕ್ಷೇತ್ರೊದ ಶಾಸಕೆ ಯುಟಿ ಖಾದರ್ ಮೆರೆಗ್ಲಾ ಒಯಿಲ್ ಕೊರ್ತ. ಆರ್ಟಿಐಡ್ ಒಲವು ಕೇನ್ಡಲಾ ಒಲವು ಕೊರೊಂದಿಜ್ಜೆರ್. ಕರಿನ ಎಪ್ರಿಲ್ ತಿಂಗೊಲುಡು ನಡತಿನ ಉಳ್ಳಾಲ ದರ್ಗಾ ಉರೂಸ್ ಗ್ ರಾಜ್ಯ ಸರಕಾರೊರ್ದು ಏಳ್ ಕೋಟಿ ಅನುದಾನ ಮಂಜೂರಾದಿತ್ತ್ದ್, ದಾನಿಲೆರ್ದ್ ಕೋಟಿಗಟ್ಲೆ ರೂಪಾಯಿ ಒಟ್ಟಾತ್ಂಡ್.
ದರ್ಗಾ ಕಮಿಟಿಡ್ 55 ಜನ ಪದುಕೆರ್ ಇತ್ತ್ಂಡಲಾ ಕಾಲಿ ಏಳೆಣ್ಮ ಜನ ಅಕ್ಲೆಗ್ ಬೋಡಾಯಿಲೆಕ ನಡಪಾವೊಂದುಲ್ಲೆರ್. ಪದುಕೆರೆ ಇನಯ ಲೆಪ್ಪಂದೆ ತನ್ಕುಲೆಗ್ ಬೋಡಾಯಿಲೆಕ ನಿರ್ಣಯೊಲೆಗನ್ ದೆತೊಂದು ಕರ್ಚಿ ಲೆಕ್ಕ ತೋಜಾವಂದೆ ಭ್ರಷ್ಟಾಚಾರ ಮತ್ತೊಂದುಲ್ಲೆರ್. ಆಡಳಿತ ವಯಿತೊಂದು ರಡ್ಡ್ ವರ್ಸ ಕರೀಂಡಲಾ ಒಂಜಿ ಸರ್ತಿಲಾ ಮಹಾಸಭೆ ಮಲ್ದಿಜೆರ್. ಲೆಕ್ಕಪತ್ರ ಕೇನ್ಡ ದರ್ಗಾ ಕಮಿಟಿದ 30ರ್ದ್ಲಾ ಎಚ್ಚ ಪದುಕೆರೆನ್ ಉಚ್ಛಾಟನೆ ಮಲ್ಪುವ ಪನ್ದ್ ಪೋಡಿಕಟ್ಟಾದ್ ಇನಯೊಗು ಲೆಪ್ಪಂದೆ ದೂರ ದೀತೆರ್. ಉಂದೆತ ಪಿರವು ಪ್ರಭಾವಿ ರಾಜಕೀಯ ನಾಯಕೆರೆ ಕೈ ಇಪ್ಪೊಡು. ಅಂಚಾದ್ ಆಡಳಿತ ಕಮಿಟಿ ದ ಮಿತ್ತ್ ಎಂಕ್ಲೆಗ್ ವಿಶ್ವಾಸ ಇಜ್ಜಿ, ವಕ್ಫ್ ಬೋರ್ಡ್ ಇತ್ತೆನೇ ಇನಯ ಲೆತ್ತ್ದ್ ಅವಿಶ್ವಾಸ ಗೊತ್ತುವಳಿಗ್ ಅವಕಾಶ ಕೊರೊಡು ಪನ್ದ್ ಕೇನೊನ್ದೆರ್.
ದರ್ಗಾ ಕಮಿಟಿ ಪದುಕೆರಾಯಿನ ಫಾರೂಕ್ ಮುಕ್ಕಚ್ಚೇರಿ, ರಿಯಾಜ್ ಅಲೇಕಳ, ಮಹಮ್ಮದ್ ಮುಸ್ತಾಫ, ತಹಸೀನ್ ತೋಟ, ಅಬ್ದುಲ್ ಅಜೀಜ್ ಕೋಡಿ, ಅಬ್ದುಲ್ ಸಮದ್ ಮೇಲಂಗಡಿ ಸುದ್ದಿಗೋಷ್ಟಿಡ್ ಒತ್ತುಪಾಲ್ ಇತ್ತೆರ್.