ಉತ್ತರ ಕರ್ನಾಟಕ ಪ್ರತ್ಯೇಕ ರಾಜ್ಯೊದ ಕಾಯೆಸ್: ಸರ್ಕಾರೊಗು ಓಲೆ ಬರೆಯಿನ ಕಾಂಗ್ರೆಸ್ ಶಾಸಕೆ

Last updated on November 12th, 2025 at 12:05 pm

ಬೆಳಗಾವಿ, ನ. 12: ಉತ್ತರ ಕರ್ನಾಟಕ ಪ್ರತ್ಯೇಕ ‌ರಾಜ್ಯೊದ ಬುಲಿಪು ಕುಡ ಸುದ್ದಿ ಆವೊಂದಿತ್ತ್‌ದ್, ಕೇಂದ್ರ ಬೊಕ್ಕ ರಾಜ್ಯ ಸರ್ಕಾರೊಲೆಗ್ ಈ ಬಗೆಟ್ ಶಾಸಕೆ ರಾಜು ಕಾಗೆ ಓಲೆ ಬರೆತೆರ್. ರಾಜು ಕಾಗೆನ ಓಲೆದ ಬೆರಿಟೇ ಉತ್ತರ ಕರ್ನಾಟಕ ಹೋರಾಟ ಸಮಿತಿ, ಉತ್ತರ ಕರ್ನಾಟಕ ವಿಕಾಸ ವೇದಿಕೆರ್ದ್ ಮೂಜಿ ಡಿಮ್ಯಾಂಡ್‌ಲೆಗ್ ಆಗ್ರಹ ಮಲ್ತೊಂದುಲ್ಲೆರ್. ಬೆಳಗಾವಿಡ್ ನಡಪುನ ಚಳಿಗಾಲೊದ ಅಧಿವೇಶನೊಡು ಉಂದೆನ್ ಈಡೆತ್ತಾಯಿಜಿಂಡ ಸುವರ್ಣ ವಿಧಾನಸೌಧೊದ ಮಿತ್ತ್ ಬೇತೆ ರಾಜ್ಯೊದ ಕೊಡಿ ರಾಪಾವುನ ಎಚ್ಚರ್ಗೆ ಕೊರ್ತೆರ್.

ಶಾಸಕೆ ರಾಜು ಕಾಗೆ ಬರೆತಿನ ಓಲೆಡ್ ದಾದ ಉಂಡು?
ಉತ್ತರ ಕರ್ನಾಟಕೊನು ಬೇತೆ ರಾಜ್ಯ ಮಲ್ಪುಲೆ ಪನ್ದ್ ರಾಷ್ಟ್ರಪತಿ, ಪ್ರಧಾನಿ, ಸಿಎಂಗ್ ಓಲೆ ಬರೆತಿನ ಶಾಸಕೆ ರಾಜು ಕಾಗೆ, 15 ಜಿಲ್ಲೆಲು ಇತ್ತಿನ ಉತ್ತರ ಕರ್ನಾಟಕೊನು ಬೇತೆ ರಾಜ್ಯ ಮಲ್ಪೆರ ಕೇನ್ದೆರ್. ಬುಲೆಚ್ಚಿಲ್ ವಿಚಾರೊಡು ಉತ್ತರ ಕರ್ನಾಟಕೊದ ಜಿಲ್ಲೆಲೆಗ್ ಅನ್ಯಾಯ ಆವೊಂದಿತ್ತ್‌ದ್, ಸಿದ್ಯಪ್ಪೆ ಜೋಕ್ಲೆ ಲೆಕ ತೂಪೆರ್, ತಾರತಮ್ಯ ಮಲ್ತೊಂದುಲ್ಲೆರ್ ಪನ್ದ್ ಆರ್ ಓಲೆಡ್ ಆರೋಪ ಮಲ್ದೆರ್. ಆ ಮುಕೇನ ಉತ್ತರ ಕರ್ನಾಟಕ ಹೋರಾಟ ಸಮಿತಿದ ಪೊರ್ಮ್ಬಾಟೊಗು ಶಾಸಕೆ ಕಾಗೆ ಬೆರಿತಾಂಗ್ ಕೊರ್ದಿತ್ತ್‌ದ್, ಚಳಿಗಾಲೊದ ಅಧಿವೇಶನೊಡ್ಲಾ ಈ ಬಗೆಟ್ ಚರ್ಚೆ ಮಲ್ಪುವೆ ಪನ್ದ್ ಪನ್ತೆರ್. ದಿವಂಗತ ಉಮೇಶ್ ಕತ್ತಿ ತೀರಿಬೊಕ್ಕ ಆರೆನ ದೋಸ್ತಿ ಶಾಸಕೆ ಕಾಗೆನ ಬಾಯಿಡ್ ಇತ್ತೆ ಉತ್ತರ ಕರ್ನಾಟಕ‌ ಬೇತೆ ರಾಜ್ಯೊದ ಸುದ್ದಿ ಕೇನ್ದ್ಂಡ್.

ಉಮೇಶ್ ಕತ್ತಿ ದಾದ ಪನ್ದಿತ್ತೆರ್
ರಾಜ್ಯೊಡು 2.5 ಕೋಟಿ ಇತ್ತಿನ ಜನಸಂಖ್ಯೆ 6.5 ಕೋಟಿ ಆತ್ಂಡ್. ಜನಸಂಖ್ಯೆ ಬುಲೆಯಿ ಲೆಕ ರಾಜ್ಯೊನು ಪಾಲ್ ಮಲ್ಪೊಡು. ಕರ್ನಾಟಕಡ್ ರಡ್ಡ್, ಉತ್ತರಪ್ರದೇಶೊಡು ಐನ್ ರಾಜ್ಯೊಲು, ಮಹಾರಾಷ್ಟ್ರಡ್ ಮೂಜಿ ಪೊಸ ರಾಜ್ಯೊಲು ಪುಟ್ಟುವ. ಇಡೀ ದೇಶೊಡು ಒಟ್ಟು 50 ರಾಜ್ಯೊಲು ಆಪ. ಈ ಬಗೆಟ್ ಪ್ರಧಾನಿಲು ಚಿಂತನೆ ಮಲ್ತ್‌ದೆರ್ ಪನ್ದ್ ಯಾನ್ ಎನ್ನೊಂದೆ. ಉತ್ತರ ಕರ್ನಾಟಕ ಭಾಗೊಗು ಅನ್ಯಾಯ ಆನಗ ಯಾನ್ ಸೊರ ದೆರ್ತ್‌ದೆ. ಈ ಭಾಗೊಗು ಅನ್ಯಾಯ ಆಂಡ ನನಲಾ ಸೊರ ದೆರ್ಪೆ. ಉತ್ತರ ಕರ್ನಾಟಕ ಬೇತೆ ರಾಜ್ಯ ಆವಡ್, ಬುಲೆಚ್ಚಿಲ್ ಆವಡ್ ಪನ್ದ್ ದುಂಬು ಉಮೇಶ್ ಕತ್ತಿ ಪನ್ದಿತ್ತೆರ್.