Last updated on November 14th, 2025 at 12:33 pm
ಬೆಂಗಳೂರು, ನ. 14: ದಮ್ಮುದ ಸಮಸ್ಯೆಡ್ ಬಚ್ಚಿದ್ ಪೋದಿತ್ತಿನ ಪದ್ಮಶ್ರೀ ಪುರಸ್ಕೃತೆದಿ ಆಯಿನ ಸಾಲುಮರದ ತಿಮ್ಮಕ್ಕ(114) ತೀರ್ಯೆರ್. ಉಸಾರ್ ತತ್ತ್ದ್ ಇತ್ತಿನ ಆರೆಗ್ ಜಯನಗರದ ಪ್ರೈವೇಟ್ ಆಸ್ಪತ್ರೆಡ್ ಮರ್ದ್ ನಡತೊಂದಿತ್ತ್ಂಡ್. ಆಂಡ ಮರ್ದ್ ಪಲಿಪಂದೆ ಇನಿ 12 ಗಂಟೆಗ್ ತೀರ್ದೆರ್ ಪನ್ದ್ ಆಸ್ಪತ್ರೆದ ಮೂಲೊಲು ತೆರಿಪಾದ.
ತುಮಕೂರು ಜಿಲ್ಲೆದ ಗುಬ್ಬಿ ತಾಲ್ಲೂಕ್ಡ್ 1911ತ ಜೂನ್ 30ದಾನಿ ಪುಟ್ಟುದಿತ್ತಿನ ತಿಮ್ಮಕ್ಕ, ಹುಲಿಕಲ್ ಗ್ರಾಮೊದ ಚಿಕ್ಕಯ್ಯೆ ಪನ್ಪಿನಾರೆನ್ ಮದಿಮೆ ಆದಿತ್ತೆರ್. ದೇಬೆರೆ ಗೊಬ್ಬುಡು, ಜೋಕುಲೆ ಭಾಗ್ಯ ಮೆರೆಗ್ ಇತ್ತಿಜಿ. ಅಂಚಾದ್ ತನ್ಕ್ ಜೋಕುಲುದಾಂತಿನ ಬೆಸರ್ನ್ ಮದಪೆರೆ ಸಾದಿಬರಿಟ್ ಗೋಲಿದ ದೈಕ್ಲೆನ್ ನಡ್ದ್ ಅವೆನೇ ಜೋಕುಲೆ ಲೆಕ ಸಾಂಕೊಂದಿತ್ತೆರ್. ಸಾಲು ಮರದ ತಿಮ್ಮಕ್ಕೆ ಪನ್ದೇ ಪುದರಾಯಿನ ಮೆರೆಗ್ 2019ಡ್ ಪದ್ಮಶ್ರೀ ಪ್ರಶಸ್ತಿ ತಿಕ್ಕ್ದ್ಂಡ್.
ಸಾಲೆ ಕಲ್ತಿಜಿಂಡಲಾ ಪರಿಸರ ಸಂರಕ್ಷಣೆಡ್ ತಿಮ್ಮಕ್ಕೆನ ಮಾಮಲ್ಲ ಸಾದಗೊಗು ಪಾಕ ರಾಷ್ಟ್ರೀಯ ಬೊಕ್ಕ ಅಂತರರಾಷ್ಟ್ರೀಯ ಸಂಸ್ಥೆಲು ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ತ್ದ. ರಾಜ್ಯೋತ್ಸವ ಪ್ರಶಸ್ತಿ, ಆರ್ಟ್ ಆಫ್ ಲಿವಿಂಗ್ ಸಂಸ್ಥೆದ ವಿಶಾಲಾಕ್ಷಿ ಪ್ರಶಸ್ತಿ, 2010ನೇ ವರ್ಸೊದ ಪ್ರತಿಷ್ಠಿತ ‘ನಾಡೋಜ’ ಪ್ರಶಸ್ತಿ ಸೇರ್ದ್ 2019 ಟ್ ಪದ್ಮಶ್ರೀ ಪ್ರಶಸ್ತಿಲಾ ಮೆರೆನ್ ನಾಡೊಂದು ಬತ್ತಿತ್ತ್ಂಡ್. 2020ಡ್ ಕರ್ನಾಟಕ ಕೇಂದ್ರೀಯ ವಿಶ್ವವಿದ್ಯಾಲಯ ತಿಮ್ಮಕ್ಕೆಗ್ ಗೌರವ ಡಾಕ್ಟರೇಟ್ ಕೊರ್ದು ಮಾನಾದಿಗೆ ಮಲ್ದ್ಂಡ್.