Last updated on November 14th, 2025 at 03:54 pm
ಕುಕ್ಕೆ, ನ. 14: ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇಲಂತಡೆದ ವಾರ್ಷಿಕ ಚಂಪಾಷಷ್ಠಿ ಜಾತ್ರೆ ನವೆಂಬರ್ 16 ರ್ದ್ ಡಿಸೆಂಬರ್ 2 ಮುಟ್ಟ ನಡಪರೆಗುಂಡು. ಈ ಜಾತ್ರೆದ ಪೊರ್ತುಡು ದೇಲಂತಡೆದ ಪ್ರಮುಖ ಸೇವೆಲಾಯಿನ ಸರ್ಪಸಂಸ್ಕಾರ ಬೊಕ್ಕ ಬಯ್ಯದ ಆಶ್ಲೇಷ ಬಲಿ ಸೇವೆಲೆಡ್ ತಾತ್ಕಾಲಿಕ ವ್ಯತ್ಯಯ ಇಪ್ಪುಂಡು ಪನ್ದ್ ದೇಲಂತಡೇದ ಪ್ರಕಟಣೆ ತೆರಿಪಾದ್ಂಡ್.
ನವೆಂಬರ್ 14 ರ್ದ್ ಡಿಸೆಂಬರ್ 2 ಮುಟ್ಟ ಶ್ರೀ ದೇಲಂತಡೆದ ಪ್ರಧಾನ ಸೇವೆಲೆಡ್ ಒಂಜಾಯಿನ ಸರ್ಪಸಂಸ್ಕಾರ ಸೇವೆ ಇಪ್ಪುಜಿ. ನವೆಂಬರ್ 13 ರ್ದ್ ಸುರು ಆಯಿನ ಸರ್ಪಸಂಸ್ಕಾರ ಸೇವೆಲು ನವೆಂಬರ್ 14 ಕ್ಕ್ ಕೈದಾಪ. ನವೆಂಬರ್ 15 ಶನಿವಾರ ಏಕಾದಶಿ ಬೊಕ್ಕ ಮೂಲಮೃತ್ತಿಕಾ ಪ್ರಸಾದ ಪಟ್ಟುನ, ಅಂಚೆನೇ ನವೆಂಬರ್ 16 ತಾನಿ ಕೊಪ್ಪರಿಗೆ ಏರ್ದ್ ಜಾತ್ರೆ ಸುರು ಆಪಿನೆರ್ದಾವರ ಈ ನಿರ್ಧಾರ ಗೆತೊಂದೆರ್. ಡಿಸೆಂಬರ್ 2 ತಾನಿ ಕೊಪ್ಪರಿಗೆ ಜಪ್ಪುನಾನಿ ಸರ್ಪಸಂಸ್ಕಾರ ಇಪ್ಪುಜಿ. ಭಕ್ತೆರ್ ಡಿಸೆಂಬರ್ 3, ಬುಧವಾರರ್ದ್ ಸರ್ಪಸಂಸ್ಕಾರ ಸೇವೆ ಮಲ್ಪಾವೊಲಿ.
ಬೇತೆ ವಾ ದಿನ ವಾ ಸೇವೆಲು ಇಪ್ಪುಜ?
• ಲಕ್ಷದೀಪೋತ್ಸವ(ನ 19), ಚೌತಿ(ನ.24), ಪಂಚಮಿ(ನ.25) ದಾನಿ ರಾತ್ರೆ ಪ್ರಾರ್ಥನೆ ಸೇವೆ ಇಪ್ಪುಜಿ.
• ಚಂಪಾಷಷ್ಠಿ (ನ.26) ದಾನಿ ಮಧ್ಯಾಹ್ನ ಪ್ರಾರ್ಥನೆ ಸೇವೆ ಇಪ್ಪುಜಿ. ಆತೇ ಅತ್ತಂದೆ ಚಂಪಾಷಷ್ಠಿ ದಾನಿ ಆಶ್ಲೇಷ ಬಲಿ ಬೊಕ್ಕ ನಾಗಪ್ರತಿಷ್ಠೆ, ಸೇವೆಲು ಇಪ್ಪುಜ.
• ಲಕ್ಷದೀಪೋತ್ಸವ(ನ. 19), ಚೌತಿ(ನ.24), ಪಂಚಮಿ(ನ.25)ಚಂಪಾಷಷ್ಠಿ (ನ.26) ಬೊಕ್ಕ ಕೊಪ್ಪರಿಗೆ ಜಪ್ಪುನಾನಿ ಮಹಾಸಂಪ್ರೋಕ್ಷಣೆದ ದಿನ (ಡಿ.02)ತಾನಿ ಪಂಚಾಮೃತ ಮಹಾಭಿಷೇಕ ಸೇವೆ ಇಪ್ಪುಜಿ.
ಏಪೊಲ್ದ ಲೆಕ ನಡಪುನ ಸೇವೆಲು
ಚಂಪಾಷಷ್ಠಿ ಜಾತ್ರೆ ನ.16ರ್ದ್ ಡಿ.02 ಮುಟ್ಟ ಇತ್ತ್ದ್ ಜಾತ್ರೆದ ಪ್ರಧಾನ ದಿನೊಕುಲಾಯಿನ ಲಕ್ಷದೀಪ, ಚೌಕಿಪಂಚಮಿ ಬೊಕ್ಕ ಷಷ್ಠಿ ದಾನಿ ಮಾತ್ರ ಕೆಲ ಸೇವೆಲೆನ್ ಮಲ್ಪಾಯೆರ ಭಕ್ತೆರಿಗ್ ಅವಕಾಶ ಇಪ್ಪುಜಿ. ಆಂಡ ಬೇತೆ ದಿನೊಟು ಆಶ್ಲೇಷಬಲಿ, ಪಂಚಾಮೃತ ಮಹಾಭಿಷೇಕ, ಶೇಷಸೇವೆ, ಕಾರ್ತಿಕಪೂಜೆ, ಮಹಾಪೂಜೆ, ತುಲಾಭಾರ, ನಾಗಪ್ರತಿಷ್ಠೆ, ಉತ್ಸವ, ರಥೋತ್ಸವ ಇಂಚಿನ ಸೇವೆಲು ಇಪ್ಪುವ. ಸರ್ಪಸಂಸ್ಕಾರ ಬೊಕ್ಕ ಬಯ್ಯದ ಆಶ್ಲೇಷ ಬಲಿ ಸೇವೆಲು ಮಾತ್ರ ಡಿ.02 ಮುಟ್ಟ ಇಪ್ಪುಜ.