Last updated on November 20th, 2025 at 02:01 pm
ಕೇರಳ, ನ. 20: ಶಬರಿಮಲೆ ಅಯ್ಯಪ್ಪನ ವಾರ್ಷಿಕ ಮಹೋತ್ಸವ ತೊಡಂಗ್ದ್ಂಡ್. 48 ದಿನೊತ ವೃತ ಪತ್ತ್ದ್ ಪದಿನೆಣ್ಮ ಮೊಟ್ಟು ಬರ್ತ್ದ್ ಅಯ್ಯಪ್ಪನ ದರ್ಶನೊಗು ಮಾಲೆ ಪಾಡಿನಕ್ಲು ಕೊಡಿಕಾರ್ಡ್ ಕಾತೊಂದುಪ್ಪೆರ್. ಅಯ್ಯಪ್ಪನ ಒಂಜಿ ದರ್ಶನ ಅಕ್ಲೆನ ಆತ್ ದಿನೊತ ಬಚ್ಚೆಲ್ನ್ ದೂರ ಮಲ್ಪುಂಡು. ಆಂಡ ಅಯ್ಯಪ್ಪನ್ ತೂಯೆರೆ ಬತ್ತ್ದ್ ದರ್ಶನ ತಿಕ್ಕಂದೇ ಆಂಡ ಆಪಿನ ಬೇನೆಬೆಸರ್ ಮಾತ್ರ ಏರ್ಲಾ ಎನ್ನಿಯೆರ ಸಾಧ್ಯ ಇಜ್ಜಿ. ಆಂಡ ಮಣಿಕಂಠೆ ಮಾತ್ರ ತನನ್ ನಂಬುದು ಬತ್ತಿನ ಭಕ್ತೆರೆನ್ ಅಂಚೆನೇ ಕಡಪುಡುಜೆ, ಐಕ್ ಪೂರಾಪು ಪನ್ಪಿಲೆಕ ಒಂಜಿ ಕಾರ್ನಿಕೊದ ನಡಕೆ ಶಬರಿಮಲೆ ಟ್ ನಡತ್ದ್ಂಡ್.
ಕೇರಳದ ಕೊಲ್ಲಂರ್ದ್ ಬತ್ತಿನ ಗಿರಿಜಾ ಮೆರೆಗ್ ಶಬರಿಮಲೆ ಯಾತ್ರೆ ಆರೆನ ಬದ್ಕ್ದ ಮಾಮಲ್ಲ ಆದ್ಯಾತ್ಮಿಕ ಕ್ಷಣ ಆದಿತ್ತ್ಂಡ್, 48 ದಿನ ವೃತ ಕರಿತ್ದ್ 17 ಜನೊತ ಕೂಟೊದೊಟ್ಟುಗು ಅಯ್ಯಪ್ಪನ ದರ್ಶನೊಗು ಬತ್ತಿತ್ತೆರ್, ವರ್ಚ್ಯುವಲ್ ಕ್ಯೂ ಪಾಸ್ ಲೆನ್ ದೆತೊಂದು ಅಯ್ಯಪ್ಪನ ದರ್ಶನೊಗು ಪಂಪೆಗ್ ಬತ್ತಿತ್ತೆರ್, ಆಂಡ ಅವೆರ್ದ್ ಬೊಕ್ಕ ನಡತಿನಿ ಮಾತ್ರ ಆರ್ ಎನ್ನಂದಿನ ಸ್ಥಿತಿ, ಶಬರಿಮಲೆಟ್ ಅಂಗಾರೆ ಎನ್ನಂದಿನಾತ್ ಮಲ್ಲ ಮಟ್ಟ್ಡ್ ಭಕ್ತೆರ್ ಬತ್ತಿತ್ತೆರ್. ದರ್ಶನೊಗು ಕಮ್ಮಿಡ್ 10 ಗಂಟೆ ಕಾಪೊಡಾಯಿನ ಸ್ಥಿತಿ ಉಂಡಾದಿತ್ತ್ಂಡ್, ಗಿರಿಜಾ ಮೆರೆನ ಒಟ್ಟುಗು ಬತ್ತಿನ ಇರ್ವೆರ್ ಕಿಞ್ಞ ಜೋಕುಲು ಬೊಕ್ಕ ಒರಿನ 6 ಜನ ಪೊಂಜೊವುನಕುಲು, ಶಬರಿಮಲೆಟ್ ಜನೊಕ್ಲೆನ ರಷ್ ತೂದು ಅಯ್ಯಪ್ಪನ ದರ್ಶನ ತಿಕ್ಕಂದ್ ಪನ್ದ್ ಎನ್ನಿದ್ ಪಂಪಾರ್ದ್ ನಿಲಕ್ಕಲ್ ಗ್ ಪಿದಡ್ದೆರ್.
48 ದಿನೊತ ವೃತ ಪತ್ತ್ದ್, ಅಯ್ಯಪ್ಪನ್ ತೂಯೆರ ಮಾತಾ ಬಙೊಲೆನ್ ಕಡತೊಂದು ಶಬರಿಮಲೆಗ್ ಬತ್ತಿನ ಗಿರಿಜಾ ದರ್ಶನ ಮಲ್ಪೆರಾವಂದೆ ಕಣ್ಣನೀರ್ ದೀವೊಂದು ಪಿರ ಪೋತೆರ್. ಆಂಡ ಅವೆರ್ದ್ ಬೊಕ್ಕ ನಡತಿನವೇ ಕಾರ್ನಿಕ, ಅಯ್ಯಪ್ಪೆ ತನ್ನ ಭಕ್ತೆರೆಗ್ ದರ್ಶನ ಕೊರಂದೆ ಏರೆನ್ಲಾ ಪಿರ ಕಡಪುಡುಜೆ ಪನ್ಪಿ ಪಾತೆರೊದ ಲೆಕ, ಪೊಂಜೊವುಲು ಅಯ್ಯಪ್ಪನ ದರ್ಶನ ಮಲ್ಪಂದನೇ ಪಿರ ಪೋವೊಂದುಲ್ಲೆರ್ ಪನ್ಪಿ ಸುದ್ದಿ ಶಬರಿಮಲೆ ಪೊಲೀಸ್ ಇಲಾಖೆದ ಮುಖ್ಯ ಸಂಯೋಜಕೆರಾಯಿನ ಎಡಿಜಿಪಿ ಎಸ್. ಶ್ರೀಜಿತ್ ಮೆರೆನ ಗುಮನೊಗು ಬೈದ್ಂಡ್.
ಈ ವಿಚಾರ ತೆರಿನನೇ ಶ್ರೀಜಿತ್ ಮೇರ್ ತನ್ನ ಸಿಬ್ಬಂದಿಲೆಗ್ ಒಲವು ಕೊರ್ದು ಅಪ್ಪೆಯರ್ಲೆನ್ ದೇಲಂತಡೆಗ್ ಲೆತೊಂದು ಬರ್ಯೆರ ವ್ಯವಸ್ಥೆ ಮಲ್ಪೆರ ಪನ್ತೆರ್. ಪೊಲೀಸ್ ಸಿಬ್ಬಂದಿಲು ಲಕ್ಷಗಟ್ಲೆ ಭಕ್ತೆರೆ ನಡುಟು ಈ ಪೊಂಜೊವುನಕ್ಲೆನ್ ನಾಡ್ಪತ್ತ್ದ್ ಅಕ್ಲೆನ್ ಮಲೆ ಬರ್ತಾದ್ ಅಯ್ಯಪ್ಪನ ದರ್ಶನೊಗು ಲೆತೊಂದು ಪೋತೆರ್. ಅಯ್ಯಪ್ಪನ ಗುಂಡೊದ ಎದುರು ಜೋಕುಲೆನ ಒಟ್ಟುಗು ಗಿರಿಜಾ ಮೇರ್ ಅಯ್ಯಪ್ಪನ ದರ್ಶನ ಮಲ್ತೆರ್, ಅಯ್ಯಪ್ಪನ ಎದುರು ಕಣ್ಣನೀರ್ ದೀದ್ ಕೈ ಮುಗಿದ್ ಉಂತುದಿನ ಪೋಟೋ ಸಾಮಾಜಿಕ ಬಲೆತ್ತಾನೊಡು ವೈರಲ್ ಆತ್ಂಡ್.