Last updated on November 25th, 2025 at 10:02 am
ಒಡಿಪು, ನ. 25: ಒಡಿಪು ಜಿಲ್ಲಾಡಳಿತ ಪಡ್ಡೆದ್ರಡ್ ಏರ್ಪೋರ್ಟ್ ಕಟ್ಟೆರೆ ರಾಜ್ಯೊದ ಮೂಲಸೌಕರ್ಯ ಅಭಿವೃದ್ಧಿ ಇಲಾಖೆ(IDD)ಗ್ ಪ್ರಸ್ತಾವನೆ ಸಂದಾವುನ ಮುಕೇನ ಪಾಕ ಸಮೆರ್ದಿಂಚಿ ಸುದ್ದಿಡ್ ಇಪ್ಪುನ ಒಡಿಪು ವಿಮಾನ ಉಂತಡೆದ ಕನೊಕು ರೆಕ್ಕೆ ತಿಕ್ಕಾಯಿಲೆಕ ಆತ್ಂಡ್.
ಈ ಪ್ರಸ್ತಾವನೆ ದೇಶೊದ ಸಾಮಾನ್ಯ ನಾಗರಿಕೆರೆಗ್ಲಾ ವಿಮಾನಯಾನ ಸುಲಭ ಮಲ್ಪಾವುವ ಕೇಂದ್ರೊದ ಉಡಾನ್ ಯೋಜನೆಗ್ ಸಂಬಂಧಿತಿನವು. ನವೆಂಬರ್ 28ದಾನಿ ಪ್ರಧಾನಮಂತ್ರಿ ನರೇಂದ್ರ ಮೋದಿಯೆರೆ ಒಡಿಪು ಭೇಟಿದ ಪೊರ್ತುಡು ಉಂದೆನ್ ಅಧಿಕೃತವಾದ್ ಆರೆನ ಎದುರು ದೀಪುನ ಸಾಧ್ಯತೆ ಉಂಡು.
ಪಡ್ಡೆದ್ರ/ಪಡುಬಿದ್ರಿ ಕುಡ್ಲದ ಅಂತರರಾಷ್ಟ್ರೀಯ ವಿಮಾನ ಉಂತಡೆರ್ದ್ ಸುಮಾರ್ 30 ಕಿಮೀ ದೂರೊಡು ಉಂಡು. ರಡ್ಡ್ ವಿಮಾನ ಉಂತಡೆಲು 150 ನಾಟಿಕಲ್ ಮೈಲ್ ಸೀಮೆದ ಉಲಯಿ ಬರ್ಪುನೆರ್ದಾವರ, ದೂರೊಗು ಸಂಬಂಧಿತಿನ ಅನುಕ್ಲೆನ್ ಅಧಿಕಾರಿಲು ಪರಿಶೀಲಿತೊಂದುಲ್ಲೆರ್. ಕುಡ್ಲದ ರನ್ವೇ ಭೌಗೋಳಿಕ ತಲೆಪುಲೆರ್ದಾವರ ನನ ಮಲ್ಲೆ ಮಲ್ಪೆರೆ ಸಾಧ್ಯ ಇಜ್ಜಂದಿನೆರ್ದಾವರ, ಪಡ್ಡೆದ್ರನ್ ‘ಟ್ವಿನ್ ಏರ್ಪೋರ್ಟ್’ ಅತ್ತ್ಂಡ ಟರ್ಮಿನಲ್ 2 ಆದ್ ಪರಿಗಣಿಪುಲೆಕ ಪ್ರಸ್ತಾವನೆ ಪನೊಂದುಂಡು.
KIADB ದ ಜಾಗೆ ಸೇರ್ದ್ ಸುಮಾರ್ ಒಟ್ಟು 935 ಎಕ್ರೆ ಜಾಗೆ ಈ ಯೋಜನೆಗ್ ತಿಕ್ಕು ಪನ್ಪಿ ಅಂದಾಜಿ ಉಂಡು. ಕುಡ್ಲದ ರನ್ವೇ ಮಲ್ಲೆ ಮಲ್ಪೆರೆ ಪೋಂಡ ₹33,000 ಕೋಟಿ ಕರ್ಚಿ ಆವು ಪನ್ದ್ ಅಂದಾಜಿ ಮಲ್ದೆರ್, ಆಂಡ ಪಡ್ಡೆದ್ರಡ್ ಪೊಸ ವಿಮಾನ ಉಂತಡೆ ಮಲ್ಪೆರೆ ಸುಮಾರ್ ₹10,000 ಕೋಟಿ ಬೋಡಾವುಗೆ.
ಒರ ಅನುಮೋದನೆ ತಿಕ್ಕಿ ಬೊಕ್ಕ, ಯೋಜನೆದ ಸಾಮರ್ತಿಗೆ ಬೊಕ್ಕ ಪ್ರೇಜನೊಲೆನ್ ಪರಿಶೀಲಿಪೆರ ಸಾಧ್ಯತೆದ ಅಧ್ಯಯನ ನಡಪುಂಡು. ಪ್ರವಾಸೋದ್ಯಮ ಹಬ್ ಬೊಕ್ಕ ಹೆಲಿ-ಟ್ಯಾಕ್ಸಿ ಸೇವೆಲೆನ್ ಅಭಿವೃದ್ಧಿ ಮಲ್ಪುನ ಅಲೆಚನೆಲಾ ಉಂಡು. ಈ ವಿಮಾನ ಉಂತಡೆರ್ದ್ ಒಡಿಪು ಜಿಲ್ಲೆದ ಆರ್ಥಿಕತೆ, ಪ್ರವಾಸೋದ್ಯಮ, ಕೈಗಾರಿಕೆಲು ಬುಲೆಪ ಪನ್ದ್ ನಿರೀಕ್ಷೆ ಮಲ್ತೊಂದಿತ್ತ್ದ್ ಅಂಚೆನೇ ರೋಡ್/ರೈಲ್ ಸಂಚಾರೊದ ಕಂಜೆಷ್ಷನ್ನ್ ಕಮ್ಮಿ ಮಲ್ಪುಂಡು ಪನ್ದ್ ಇತ್ತೆದ ಅಂದಾಜಿ.