Last updated on November 25th, 2025 at 01:59 pm
ಅಯೋಧ್ಯೆ, ನ. 25: ಉತ್ತರಪ್ರದೇಶೊದ ಅಯೋಧ್ಯೆಡ್
ರಾಮಮಂದಿರೊದ ಬೇಲೆ ಪತ್ತ ಆಯಿನೆರ್ದಾವರ ಇನಿ, ಅಂಗಾರೆ (ನ.25) ಪ್ರಧಾನಿ ನರೇಂದ್ರ ಮೋದಿಯೆರ್ ಅಭಿಜಿತ್ ಮುಹೂರ್ತೊಡು ರಾಮಮಂದಿರೊದ ಮಿತ್ತ್ ನೇಲ್ಯ ಕೇಸರಿ ಕೊಡಿನ್ ಏರಾಯೆರ್.
20 ಫೀಟ್ ಉದ್ದ, 10 ಫೀಟ್ ಎಪ್ಪರೊದ ತ್ರಿಕೋನಾಕೃತಿದ ಕೊಡಿ ಉಂದಾದಿತ್ತ್ದ್, ಕೊಡಿಟ್ ಸೂರ್ಯನ ಚಿಹ್ನೆ, ಓಂ ಬೊಕ್ಕ ಕೋವಿದಾರಾ ಮರೊತ ಚಿಹ್ನೆ ಉಂಡು. ಈ ಧರ್ಮ ಧ್ವಜ ರಾಮರಾಜ್ಯೊದ ಘನತೆ, ಏಕತೆ ಬೊಕ್ಕ ಸಂಸ್ಕೃತಿದ ಪ್ರತೀಕ ಆದುಂಡು.
ಈ ಧರ್ಮ ಧ್ವಜೊನು ರಾಮಮಂದಿರೊದ ಮಿತ್ತ್ ಬಡಕಾಯಿ ಭಾರತೊದ ನಾಗರ ಶೈಲಿಡ್ ಕಟ್ಟ್ದಿನ ಶಿಖರೊದ ಮಿತ್ತ್ ರಾಪಾದೆರ್.
ಸಪ್ತಮಂದಿರೊಗು ಪ್ರಧಾನಿ ಭೇಟಿ-ಪೂಜೆ:
ಕೇಸರಿ ಕೊಡಿ ಏರಾಯೆರ ದುಂಬು ಪ್ರಧಾನಿ ನರೇಂದ್ರ ಮೋದಿಯೆರ್ ರಾಮಮಂದಿರೊದ ಮದೆಲ್ಡ್ ಇಪ್ಪುನ ಸಪ್ತಮಂದಿರೊಗು ಪೋಯೆರ್. ಅಲ್ಪ ಇಪ್ಪುನ ಮಹರ್ಷಿ ವಶಿಷ್ಠೆ, ಮಹರ್ಷಿ ವಿಶ್ವಾಮಿತ್ರೆ, ಮಹರ್ಷಿ ಅಗಸ್ತ್ಯೆ, ಮಹರ್ಷಿ ವಾಲ್ಮೀಕಿ, ದೇವಿ ಅಹಲ್ಯಾ, ನಿಶಾದರಾಜ್ ಗುಹೆ ಬೊಕ್ಕ ಅಪ್ಪೆ ಶಬರಿನ ಮಂದಿರೊಗು ಪೋದು ಪೂಜೆ ಕರಿತೆರ್.
ಆತೇ ಅತ್ತಂದೆ ಶೇಷಾವತಾರ್ ಮಂದಿರ ಬೊಕ್ಕ ಅಪ್ಪೆ ಅನ್ನಪೂರ್ಣ ದೇಲಂತಡೆಗ್ ಪೋದು ದರ್ಶನ ಗೆತೊಂದು ಪೂಜೆ ಕರಿತೆರ್.
ಕೊಡಿ ಏರಾನಗ ಭಾಗವತ್, ಯೋಗಿ, ಸಾಧು ಸಂತೆರ್ ಪಾಲ್ಪಡೆಯೆರ್:
ಅಯೋಧ್ಯೆ ರಾಮಮಂದಿರೊದ ಕೊಡಿ ಏರಾವುನ ಕಾರ್ಯಕ್ರಮೊಡು ಆರ್.ಎಸ್.ಎಸ್ ಸರಸಂಘಚಾಲಕೆರ್ ಮೋಹನ್ ಭಾಗವತ್, ಉತ್ತರಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಬೊಕ್ಕ ಬೇತೆ ಸಾಧು ಸಂತೆರ್ ಪಾಲ್ಪಡೆಯೆರ್. ಪ್ರಧಾನಿ ಮೋದಿ, ಭಾಗವತ್ ಬೊಕ್ಕ ಮುಖ್ಯಮಂತ್ರಿ ಯೋಗಿಯೆರೆ ಒಟ್ಟುಗು ಧರ್ಮಧ್ವಜ ಏರಾಯೆರ್.