Last updated on November 26th, 2025 at 10:11 am
ಜಜ್ಪೆ, ನ. 25: ಎಡಪದವು ಪನ್ಪಿನಲ್ಪ ಮುರಾನಿ ಬಯ್ಯಡ್ ಜವನನೊರಿಯನ ಮಿತ್ತ್ ತಲವಾರ್ ದಾಳಿ ಮಲ್ದಿನ ನಾಲ್ವೆರ್ ಆರೋಪಿಲೆನ್ ಪೊಲೀಸೆರ್ ಅರೆಸ್ಟ್ ಮಲ್ತ್ದೆರ್.
ಕೈದಾತಿನಕಲೆನ್ ಕುಡ್ಲ ಬಂದರ್ ನಿವಾಸಿ ಸಿನಾನ್, ವೇಣೂರ್ ನಿವಾಸಿ ಇರ್ಷಾದ್, ವಾಮಂಜೂರ್ ನಿವಾಸಿ ಸುಹೈಲ್ ಅಕ್ರಮ್ ಬೊಕ್ಕ ವಾಮಂಜೂರ್ ಪಿಲಿಕುಳ ನಿವಾಸಿ ನಿಸಾನ್ ಪನ್ದ್ ಗುರ್ತ ಪತ್ತ್ದೆರ್.
ಎಡಪದವು ಪೂಪಾಡಿಕಲ್ಲ್ ನಿವಾಸಿ ಅಖಿಲೇಶ್ ಪನ್ಪಿನಾರೊ ಪೂಪಾಡಿಕಲ್ಲ್ರ್ದ್ ಕುಡ್ಲದಂಚಿ ಬರೊಂದಿತ್ತಿನ ಪೊರ್ತುಡು ಒಂಜೇ ಸ್ಕಖಟರ್ಡ್ ನಾಲ್ ಜನ ಬೀಸತ್ತಿ ಪತೊಂದು ಪೋವೊಂದುಪ್ಪುನೆನ್ ತೂದು ಅವೆನ್ ತನ್ನ ಮೊಬೈಲ್ಡ್ ರೆಕಾರ್ಡ್ ಮಲ್ಪೆರೆ ತೂತೆರ್. ಉಂದೆನ್ ತೂಯಿನ ಆರೋಪಿಲು ಸಾದಿಡೇ ಅಖಿಲೇಶ್ನ ಮಿತ್ತ್ ದಾಳಿ ಮಲ್ತ್ದೆರ್. ಈ ಪೊರ್ತುಡು ಅಖಿಲೇಶ್ನ ಕೈಕ್ ಗಡಿಕುಲಾದಿತ್ತ್ದ್, ಆಸ್ಪತ್ರೆಗ್ ದಾಕಲಾತೆರ್. ಈ ಪೊರ್ತುಡು ಊರುದಕುಲು ಒರಿ ಆರೋಪಿನ್ ಪತ್ತ್ದ್ ಪೊಲೀಸೆರೆಗ್ ಒಪ್ಯಾದೆರ್. ಈ ಪ್ರಕರಣೊಗು ಸಂಬಂಧಿತ್ದ್ ಬಜ್ಪೆ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾದಿತ್ತ್ಂಡ್.
ಕೈದಾತಿನಕ್ಲೆಡ್ ಕುಡ್ಲ ಬಂದರ್ ನಿವಾಸಿ ಸಿನಾನ್ ನ್ ಸಾರ್ವಜನಿಕೆರ್ ಪತ್ತ್ದ್ ಪೊಲೀಸೆರೆಗ್ ಒಪ್ಯಾದೆರ್. ಒರಿನಕುಲು ವೇಣೂರ್ ನಿವಾಸಿ ಇರ್ಷಾದ್ ನ್ ಬಜ್ಪೆ ಪೊಲೀಸೆರ್ ಪತ್ತ್ದೆರ್. ಒಟ್ಟುಗು ವಾಮಂಜೂರ್ ನಿವಾಸಿ ಸುಹೈಲ್ ಅಕ್ರಮ್ ಬೊಕೂ ವಾಮಂಜೂರ್ ಪಿಲಿಕುಳ ನಿವಾಸಿ ನಿಸಾನ್ ನ್ ಕುಡ್ಲ ಸಿಸಿಬಿ ಪೊಲೀಸೆರ್ ಪತ್ತ್ದೆರ್. ನಡಕೆ ನಡತಿನ 24 ಗಂಟೆದ ಉಲಯಿ ಮಾತಾ ಆರೋಪಿಲೆನ್ ಪೊಲೀಸೆರ್ ಕೈದ್ ಮಲ್ತ್ದೆರ್.
ಕೈದಾತಿನಕ್ಲೆಡ್ ಅಕ್ರಮ್ ಬೊಕ್ಕ ನಿಸಾನ್ನ ಮಿತ್ತ್ ಗಾಂಜಾ ಪ್ರಕರಣೊಲು ಇತ್ತಿನೆರ್ದಾವರ ಅಕ್ಲೆನ ಮಿತ್ತ್ ಕೆರ್ಪುನ ಪುನೆಪು ಪ್ರಕರಣೊದ ಒಟ್ಟುಗೂ ಎನ್ಡಿಪಿಎಸ್ ಕಾಯ್ದೆದ ಅಡಿಟ್ ಪ್ರಕರಣ ದಾಕಲ್ತೊಂದುಂಡು ಪನ್ದ್ ಪೊಲೀಸ್ ಆಯುಕ್ತೆರ್ ಒಲವು ಕೊರ್ತೆರ್.