Last updated on December 3rd, 2025 at 10:21 am
ಕಾರವಾರ : ಇಲ್ಲದ ಡೈನಿಂಗ್ ಟೇಬಲ್ ದ ಅಡಿಟ್ ಬತ್ತ್ ಸೇರೊಂದಿನ ನೇಲ್ಯ ಕಾಳಿಂಗ ಸರ್ಪರ್ದ್ ದಂಪತಿಲು ಕಾರ್ನಿಕದ ಲೆಕ ಬಚಾವಾತಿನ ನಡಕೆ ಉತ್ತರ ಕನ್ನಡ ಜಿಲ್ಲೆದ ಕುಮಟಾ ಕೈತಲ್ದ ಮಿರ್ಜಾನ್ ಡ್ ನಡತ್ದ್ಂಡ್.
ಮಿರ್ಜಾನ್ ದ ದೇವಿದಾಸ ಗುನಗಾ ಪನ್ಪಿನಾರೆನ ಇಲ್ಲಡ್ ಈ ನಡಕೆ ನಡತ್ದ್ಂಡ್. ಕಾಂಡೆ ಏಪೊಲ್ದ ಲೆಕ ಪ್ರಾಯೊದ ಜೋಡಿಲು ಚಾ ಪರ್ಯೆರ ಇಲ್ಲದ ಡೈನಿಂಗ್ ಟೇಬಲ್ ಡ್ ಕುಲ್ಲುದೆರ್.
ಆ ಪೊರ್ತುಡು ಒಲ್ಪರ್ದಾ ಇಲ್ಲದುಲಯಿ ಪೊಗ್ಗಿನ ನೇಲ್ಯ ಕಾಳಿಂಗ ಸರ್ಪೆ ಪರತೊಂದು ಬತ್ತ್ದ್ ಡೈನಿಂಗ್ ಟೇಬಲ್ಡ್ ಚಾ ಪರೊಂದಿತ್ತಿನ ದೇವಿದಾಸೆರೆ ಬೊಡೆದಿನ ಕಾರ ಮುದೆಲ್ಡ್ ಬತ್ತ್ದ್ ಕುಲ್ಲುದುಂಡು. ಬೊಡೆದಿನ ಕಾರ್ದ ಕೈತಲ್ ನೇಲ್ಯ ಕಾಳಿಂಗ ಸರ್ಪೆ ಕುಲ್ಲುದು ಸುಯಿಂಪುನೆನ್ ತೂಯಿನ ದೇವಿದಾಸೆರ್ ಒರ ಅಲ್ಕ್ದ್ ಬೂರ್ದೆರ್.
ಆಂಡ ಆರ್ ಪೋಡ್ಯಂದೆ ಧೈರ್ಯ ಮಲ್ತ್ದ್ ಬೊಡೆದಿನ ಜೂವ ಕಾತ್ದೆರ್. ಕಾರ್ದ ಸಮಸ್ಯೆರ್ದಾವರ ನಡಪರೆ ಬಂಙ ಆಪಿನ ತನ್ನ ಬೊಡೆದಿಗ್ ಉಚ್ಚುದ ಬಗೆಟ್ ಪನ್ಡ್ನ್ಡ ಆಲ್ ಪೋಡ್ಯುವಲ್ ಇಜಿಂಡ ತಪ್ಪಾವುನ ಬರಸ್ಡ್ ಉಚ್ಚುಗ್ ತೊರ್ತ್ದ್ ತುಚ್ಚಾವೊನುವಲ್ ಪನ್ದ್ ಎನ್ನ್ದ್ ಒಂಜಿ ಐಡಿಯಾ ಮಲ್ತ್ದೆರ್. ದಾದನೋ ನೆವನ ಪನ್ಡ್ದ್ ಬೊಡೆದಿನ್ ಮೆಲ್ಲ ಲಕ್ಕಾದ್ ಡೈನಿಂಗ್ ಹಾಲ್ರ್ದ್ ಇಲ್ಲದ ಪಿದಯಿ ಲೆತೊಂದು ಬತ್ತ್ದ್ ಕಾಳಿಂಗ ಸರ್ಪನ್ ಅಡ್ಪಿಲ್ಲ್ಡೇ ಕೈದ್ ಮಲ್ತ್ದೆರ್. ಬೊಕ್ಕ ಬೊಡೆದಿಗ್ ವಿಷಯ ತೆರಿಪಾದ್, ದೋಸ್ತಿನ ಮುಕೇನ ಉರಗ ತಜ್ಞೆರೆಗ್ ಲೆಪ್ಪು ಕೊರ್ತೆರ್.
ಒಲವು ತಿಕ್ಕಿನೇ ಅಡೆಗ್ ಬತ್ತಿನ ಉರಗ ರಕ್ಷಕೆ, ಪ್ರಾಣಿ ತಜ್ಞೆ, ಸ್ನೇಕ್ ಪವನ್ ಸುಮಾರ್ ಒಂಜಿ ಗಂಟೆದ ಕಾರ್ಯಾಚರಣೆ ಮಲ್ತ್ದ್ ಡೈನಿಂಗ್ ಟೇಬಲ್ದ ಅಡಿಟ್ ಕುಲ್ದಿತ್ತಿನ 14 ಫೀಟ್ ಉದ್ದೊದ ನೆಲ್ಯ ಕಾಳಿಂಗ ಸರ್ಪ ನ್ ಪತ್ತ್ದ್ ದೂರೊದ ಕಾಡ್ಗ್ ಬುಡ್ತೆರ್. ದೇವಿದಾಸೆರೆನ ಸಮಯ ಪ್ರಜ್ಞೆನ್ ಸಾರ್ವಜನಿಕೆರ್ ಪುಗರೊಂದುಲ್ಲೆರ್.
