ಸರ್ಕಾರಿ ಶಾಲೆಲೆನ ಎಲ್‌ಕೆಜಿ, ಯುಕೆಜಿ ಜೋಕುಲೆಗ್ ಗುಡ್ ನ್ಯೂಸ್: ನನ ತಿಕ್ಕುಂಡು ಕೆತ್ತಿ, ಪೇರ್, ಪರ್ನ್ದ್

Last updated on December 3rd, 2025 at 12:36 pm

ಬೆಂಗಳೂರು, ಡಿ. 03: ಸರ್ಕಾರಿ ಪ್ರಿ ಪ್ರೈಮರಿ ಶಾಲೆಲೆನ ಜೋಕುಲೆಗ್ಲಾ ನನ ಕೆತ್ತಿ, ಪರ್ನ್ದ್ ಬೊಕ್ಕ ಪೇರ್ ತಿಕ್ಕುಂಡು. ಜೋಕುಲೆನ ಪೋಷಣೆನ್ ಎಚ್ಚ ಮಲ್ಪುನ ಉದ್ದೇಶೊಡು, ಶಾಲಾ ಶಿಕ್ಷಣ ಬೊಕ್ಕ ಸಾಕ್ಷರತಾ ಇಲಾಖೆ (DSEL) ಈ ಬಗೆಟ್ ಆದೇಶ ಮಲ್ದ್ಂಡ್. ಇದಮುಟ್ಟ 1ರ್ದ್ 10ನೇ ಕ್ಲಾಸ್‌ದ ಜೋಕುಲೆಗ್ ಉಂದೆನ್ ಕೊರೊಂದಿತ್ತೆರ್. ಇತ್ತೆ ಪ್ರಿ ಪ್ರೈಮರಿ ಶಾಲೆಲೆನ ಜೋಕುಲೆಗ್ಲಾ ಈ ಯೋಜನೆ ವಿಸ್ತರಿತ್‌ದೆರ್.

ಪ್ರಿ ಪ್ರೈಮರಿ ಶಾಲೆಲೆನ ಜೋಕುಲೆಗ್ ಪಿಎಂ-ಪೊಷಣ್ ಯೋಜನೆದಡಿಟ್ ಮಧ್ಯಾಹ್ನದ ವನಸ್, ಕ್ಷೀರ ಭಾಗ್ಯ ಯೋಜನೆದಡಿಟ್ ಪೇರ್ ಅಂಚೆನೇ ಕೆತ್ತಿ ಅತ್ತ್ಂಡ ಪರ್ನ್ದ್ ಕೊರ್ಯೆರ ಆದೇಶ ಆತ್ಂಡ್. ಡಿಸೆಂಬರ್ 1ರ್ದ್ ಈ ಆದೇಶ ಅನ್ವಯ ಆತ್ಂಡ್. ಜೋಕುಲೆನ ಮಧ್ಯಾಹ್ನದ ವನಸ್‌ಗ್ ಆಪಿನ ಕರ್ಚಿಡ್ ಶೇಕಡಾ 60ದಾತ್ ಕಾಸ್ ಕೇಂದ್ರ ಸರ್ಕಾರ ಕೊರ್ಪುಂಡು. ಒರಿನ ಶೇಕಡಾ 40% ಕಾಸ್ ರಾಜ್ಯ ಸರ್ಕಾರ ಕೊರ್ಪುಂಡು. ಆಂಡ, ಕ್ಷೀರ ಭಾಗ್ಯ ಯೋಜನೆ, ಕೆತ್ತಿ ಬೊಕ್ಕ ಪರ್ನ್ದ್‌ದ ಮಾತಾ ಕರ್ಚಿ ರಾಜ್ಯ ಸರ್ಕಾರದವೇ ಆದುಪ್ಪುಂಡು. ಪ್ರತಿ ಬಾಲೆಗ್  ವನಸ್‌ದ ಕರ್ಚಿ 6.78 ರೂ. ಆದಿತ್ತ್‌ದ್, ಉಂದೆಟ್ ಕೇಂದ್ರ ಸರ್ಕಾರ 4.07 ರೂ. ಬೊಕ್ಕ ರಾಜ್ಯ ಸರ್ಕಾರ 2.71 ರೂ. ಕೊರ್ಪುಂಡು. ಕರ್ನಾಟಕೊಡು 1,98,270ರ್ದ್‌ಲಾ ಎಚ್ಚ ಜೋಕುಲು ಪ್ರಿ ಪ್ರೈಮರಿ ಶಾಲೆಲೆಡ್ ಕಲ್ತೊಂದುಲ್ಲೆರ್.