Last updated on December 5th, 2025 at 09:32 am
ಕಡಬ, ಡಿ. 05: ನಡೀರ್ ಇಲ್ಲಗ್ ಅಕ್ರಮವಾದ್ ಪೊಗ್ಗುದ್ ಇಲ್ಲದಕ್ಲೆಗ್ ಹಲ್ಲೆ ಮಲ್ದಿನ ಆರೋಪಡ್ ಕಡಬ ಸ್ಟೇಷನ್ ಹೆಡ್ ಕಾನ್ಸ್ಟೇಬಲ್ ರಾಜು ನಾಯ್ಕ ಪನ್ಪಿನಾರೆನ್ ಕೈದ್ ಮಲ್ತಿತ್ತ್ದ್ ಬೇಲೆರ್ದ್ ಸಸ್ಪೆಂಡ್ ಮಲ್ದೆರ್.
ಕಡಬ ತಾಲೂಕ್ ಕೊೖಲ ನಿವಾಸಿ ಬಾಬು ಗೌಡ ಪನ್ಪಿನಾರೆನ ಇಲ್ಲ ಮುಟ್ಟಡ್ ಇಪ್ಪುನ ಆರೆನ ಮೆಗ್ಯೆ ಹರೀಶೆ ಪನ್ಪಿನಾರೆನ ಇಲ್ಲಗ್ ಡಿ.3 ತಾನಿ ರಾತ್ರೆ ಗುರ್ತದಾಂತಿನ ಆಂಜೊವು ಒರಿ ಅಕ್ರಮವಾದ್ ಪೊಗ್ಗುದಿತ್ತ್ದ್ ಇಲ್ಲದಕುಲು ಆಯನ್ ಪತೊಂದೆರ್, ಈ ಪೊರ್ತುಡು ಆಯೆ ತಪ್ಪಾವೊನುನ ಉದ್ದೇಶೊಡು ಇಲ್ಲದ ಚೇತನ್ ಪನ್ಪಿನಾರೆಗ್ ಕೈಟ್ ಆಕ್ದೆ.
ಈ ಪೊರ್ತುಡು ಆಯನ್ ಒರಿನಕ್ಲೆನ ಸಕಾಯೊಡು ಪತ್ತ್ದ್ ವಿಚಾರಿಪುನಗ ಆ ಆಂಜೊವು ಕಡಬ ಪೊಲೀಸ್ ಸ್ಟೇಶನ್ದ ಹೆಚ್.ಸಿ. ರಾಜು ನಾಯ್ಕ್ ಪನ್ದ್ ತೆರಿದ್ ಬೈದ್ಂಡ್. ಈ ರಾಜು ನಾಯ್ಕ್ ರಾತ್ರೆ ಅಕ್ರಮವಾದ್ ಇಲ್ಲ್ ಪೊಗ್ಗುದ್, ಇಲ್ಲದಕ್ಲೆಗ್ ಆಕ್ದಿನ ಬಗೆಟ್ ಬಾಬು ಗೌಡೆರ್ ಬರೆಪಾದಿನ ಒಯಿಲ್ದ ಪ್ರಕಾರ ಕಡಬ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲ್ತೊಂದು ಜಡ್ತೆ ಮಲ್ತೊಂದುಲ್ಲೆರ್.
ಒಯಿಲ್ದ ಆಧಾರೊಡು ಆರೋಪಿ ರಾಜು ನಾಯ್ಕನ್ ವಶೊಕು ಗೆತೊಂದು ವಿಚಾರಣೆ ಮಲ್ತೊಂದಿತ್ತ್ದ್ ಬೇಲೆರ್ದ್ ಸಸ್ಪೆಂಡ್ ಮಲ್ತ್ದ ಪನ್ದ್ ದ.ಕ. ಜಿಲ್ಲಾ ಪೊಲೀಸ್ ಪ್ರಕಟಣೆ ತೆರಿಪಾದ್ಂಡ್.