Last updated on January 11th, 2026 at 03:28 pm
ಕುಡ್ಲ, ಡಿ. 07: 2022 ತ ಕನ್ಡ್ದ್ ಎಂಡಿಎಂಎ ಕೊನೊವೊಂದಿತ್ತಿನ ಪ್ರಕರಣೊದ ಮಲ್ಲ ಬುಲೆಚ್ಚಿಲ್ ಒಂಜೆಟ್, ಬೆಂಗಳೂರ್ರ್ದ್ ಕುಡ್ಲಗ್ MDMA ಕನತಿನೆಕ್ ಕೈದಾತಿನ ಐವೆರ್ ಆರೋಪಿಲೆಗ್ ಕುಡ್ಲ ನ್ಯಾಯಂತಡೆ ಡಿಸೆಂಬರ್ 6 ತ ಶನಿವಾರ ಕಠಿಣ ಶಿಕ್ಷೆನ್ ಕೊರ್ತುಂಡು.
ಜೂನ್ 2022 ತ ಈ ನಡಕೆಡ್, ಬೆಂಗಳೂರುರ್ದ್ ಕುಡ್ಲಗ್ ಎಂಡಿಎಂಎ ಕನತಿನ ಐವೆರೆನ್ ಕೈದ್ ಮಲ್ತಿತ್ತೆರ್. ಶಿಕ್ಷೆ ಆತಿನೆಟ್ ಒರಿ ಸುಡಾನ್ ದೇಶೊದ ಲುಯಲ್ ಡೇನಿಯಲ್ ಜಸ್ಟಿನ್ ಬೌಲೌ ಅಲಿಯಾಸ್ ಡ್ಯಾನಿ (25). ಉಂಬ್ಯೆ ಎಂಡಿಎಂಎ ಸಪ್ಲೈ ಮಲ್ತಿತ್ತೆ.
ಕಾಸ್ರೋಡ್ ಉಪ್ಪಳದ ಮೊಹಮ್ಮದ್ ರಮೀಜ್ (24); ಉಪ್ಪಳದ ಮೊಹಿದ್ದೀನ್ ರಶೀದ್ (24); ಉಪ್ಪಳ ಮುಳಿಂಜದ ಅಬ್ದುಲ್ ರವೂಫ್ (35); ಬೊಕ್ಕ ತಮಿಳುನಾಡ್ ಊಟಿ ಮೂಲೊದ ಸಬಿತಾ (25) ಶಿಕ್ಷೆ ಆತಿನ ಬೇತೆ ಆರೋಪಿಗಲು.
ಶನಿವಾರ ನಡತಿನ ವಿಚಾರಣೆಡ್, ಸರ್ಕಾರಿ ಅಭಿಯೋಜಕೆ ಜೂಡಿತ್ ಓಲ್ಗಾ ಮಾರ್ಗರೇಟ್ ಕ್ರಾಸ್ತಾ ಮೇರ್ ರಾಜ್ಯೊದ ಪರವಾದ್ ವಾದ ಮಂಡನೆ ಮಲ್ತೆರ್. ಸಂದಾಯಿ ಬೊಕ್ಕ, ಪ್ರಧಾನ ಜಿಲ್ಲಾ ಬೊಕ್ಕ ಸೆಷನ್ಸ್ ನ್ಯಾಯಂತಡೆದ ನ್ಯಾಯಾಧೀಶೆ ಬಸವರಾಜ್ ಮೇರ್ ತೀರ್ಪು ಕೊರ್ಯೆರ್.
ನ್ಯಾಯಂತಡೆದ ಆದೇಶೊದ ಪ್ರಕಾರ, ಲುವಾಲ್ ಡೇನಿಯಲ್, ರಶೀದ್ ಬೊಕ್ಕ ಸಬಿತಾ ಮೊಕಲೆಗ್ 12 ವರ್ಸೊ ಕಠಿಣ ಕರ್ಪಿಲ್ಲ್ ಶಿಕ್ಷೆ ಬೊಕ್ಕ ತರೆಕ್ 1.5 ಲಕ್ಷ ರೂ. ದಂಡ, ರಮೀಜ್ಗ್ 14 ವರ್ಸ ಕಠಿಣ ಕರ್ಪಿಲ್ಲ್ ಶಿಕ್ಷೆ ಬೊಕ್ಕ 1.45 ಲಕ್ಷ ರೂ. ದಂಡ ಅಂಚೆನೇ ಅಬ್ದುಲ್ ರವೂಫ್ಗ್ 13 ವರ್ಸ ಕಠಿಣ ಕರ್ಪಿಲ್ಲ ಶಿಕ್ಷೆ ಬೊಕ್ಕ 1.35 ಲಕ್ಷ ರೂ. ದಂಡ ಪಾಡ್ದೆರ್.