Last updated on December 9th, 2025 at 02:23 pm
ಬೆಳಗಾವಿ, ಡಿ. 09: ಬೆಳಗಾವಿಡ್ ನಡತೊಂದುಪ್ಪುನ ಚಳಿಗಾಲೊದ ಅಧಿವೇಶನೊಡು ಕಂಬುಲನ್ ರಾಜ್ಯಕ್ರೀಡೆ ಮಲ್ತಿನೆಕ್ ಮುಖ್ಯಮಂತ್ರಿಲೆಗ್ ಸೊಲ್ಮೆ ಸಂದೈತ್ದ್ ಪಾತೆರ ಸುರು ಮಲ್ತಿನ ಪುತ್ತೂರು ಶಾಸಕೆ ಅಶೋಕ್ ಕುಮಾರ್ ರೈಕುಲು 2024-25 ನೇ ಸಾಲ್ದ ಕಂಬುಲದ ಬಗೆಟ್ ಮಲ್ತಿನ ಇನಯೊಡು ಮಾತಾ ಕಂಬುಲೊಲೆಗ್ 5 ಲಕ್ಷ ಅನುದಾನ ಕೊರ್ಪ ಪನ್ದ್ ಪಾತೆರ ಕೊರ್ದಿತ್ತೆರ್, ಆಂಡ ಐಟ್ ಒಂತೆ ಕಮ್ಮಿ ಮಲ್ತ್ದ್ 10 ಕಂಬುಲಗ್ ಮಾತ್ರ 5- 5 ಲಕ್ಷ ಕೊರ್ತೆರ್. ಈ ವರ್ಸೊಲಾ ನಮ 2025-26 ನೇ ಸಾಲ್ದ ಕಂಬುಲಗ್ ಪ್ರಸ್ತಾವನೆ ಕಡಪುಡ್ದ. ಈ ಸರ್ತಿ ರಡ್ಡ್ ಜಿಲ್ಲೆ ಸೇರ್ದ್ 23 ಕಂಬುಲೊಲು ಉಲ್ಲ. ಪ್ರಸ್ತಾವನೆಗ್ ಪರಿಶೀಲನೆಡ್ ಉಂಡು ಪನ್ಡ್ದ್ ಸದು ಕೊರ್ತೆರ್. ಎಂಕ್ಲೆಗ್ ಸದನೊಡು ಪ್ರಶ್ನೆ ಕೇನ್ಯೆರ ಅವಕಾಶ ತಿಕ್ಕುನನೇ ಬಂಙ, ಐಟ್ಲಾ ಪ್ರತೀ ಸರ್ತಿ ಇಂದೆನೇ ಕೇನೊಡಾಪುಂಡು. ದಯದೀದ್ ಮಾತಾ ಕಂಬುಲೊಲೆಗ್ 5 ಲಕ್ಷ ಕೊರ್ಪುಲೆಕ ಬಜೆಟ್ಡೇ ಕಾಸ್ ದೆತ್ತ್ದ್ ದೀಪುಲೆಕ ಮಲ್ಪುಲೆ ಪನ್ದ್ ಪನ್ಡೆರ್. ಕಡೆಟ್ ತುಳುಟೇ ಪಿರ 5-5 ಲಕ್ಷ ಅನುದಾನದ ಲೆಕ 1ಕೋಟಿ 15 ಲಕ್ಷ ಕೊರೊಡು ಪನ್ದ್ ಪನ್ಡೆರ್.
ಆತನಗ ನಡುಟು ಪಾತೆರ್ನ ಕಾರ್ಲ ಶಾಸಕೆ ಸುನಿಲ್ ಕುಮಾರ್ ದುಂಬು ರಡ್ಡ್ ಜಿಲ್ಲೆಲೆನ ಕಂಬುಲಗ್ ಅನುದಾನ ಕೊರ್ಪೆದ, ಕರಿನಸರ್ತಿ ಒಡಿಪು ಜಿಲ್ಲೆದ ಕಂಬುಲೊಲೆಗ್ ಕಾಸ್ ಬೈದಿಜಿ, ಉಂದೆರ್ದಾವರ ತಾರತಮ್ಯ ಆವೊಂದುಂಡು. ನನ ಬಜೆಟ್ಡೇ ಕಾಸ್ ದೆತ್ತ್ದ್ ದೀಲೆ, ರಡ್ಡ್ ಜಿಲ್ಲೆಲೆಗ್ಲಾ ಜಿಲ್ಲಾಧಿಕಾರಿಲೆನ ಮುಕೇನ ಕೊರ್ಲೆ ಪನ್ದ್ ಪನ್ಡೆರ್. ಬೊಕ್ಕ ಉಮಾನಾಥ್ ಕೋಟ್ಯಾನ್, ರಾಜೇಶ್ ನಾೖಕ್, ವೇದವ್ಯಾಸ್ ಕಾಮತೆರ್ ಪಾತೆರ್ದ್ ಅನುದಾನೊಡು ತಾರತಮ್ಯ ಆವೊಂದುಂಡು, ಮಾತಾ ಕಂಬುಲೊಲೆಗ್ಲಾ ಅನುದಾನ ಕೊರ್ಲೆ ಪನ್ದ್ ಪನ್ಡೆರ್.
ಉಂದೆಕ್ ಸದು ಕೊರ್ನ ಪ್ರವಾಸೋದ್ಯಮ ಸಚಿವೆ ಆರ್. ವಿ. ದೇಶ್ಪಾಂಡೆ, ಅಶೋಕ್ ರೈಕುಲು ಎನಡ ಒಂಜತ್ತ್ ಪತ್ತ್ ಸರ್ತಿ ಈ ಬಗೆಟ್ ಪಾತೆರ್ದೆರ್. ಕಾಲಿ 10 ಕಂಬುಲಗ್ ಮಾತ್ರ ಅನುದಾನ ಅತ್ತ್, ಮಾತೆಕ್ಲಾ ಕೊರ್ಲೆ ಪನ್ದ್ಲಾ ಕೇನ್ದೆರ್. ಅಂಚ ಆರ್ಥಿಕ ಇಲಾಖೆಗ್ ಪ್ರಸ್ತಾವನೆ ಕಡಪುಡ್ದ. 23 ಕಂಬುಲೊಲೆಗ್ಲಾ 5 ಲಕ್ಷ ಅನುದಾನ ಕೊರ್ಪ ಪನ್ದ್ ಪನ್ಡೆರ್.
ಈ ನಡುಟು ಸ್ಪೀಕರ್ ಖಾದರ್, ಜನವರಿ 10ಕ್ ನಡಪುನ ಉಳ್ಳಾಲ ನರಿಂಗಾನ ಕಂಬುಲಗ್ ಮಾತಾ ಶಾಸಕೆರ್, ಸಚಿವೆರೆನ್ ಬಲೆ ಪನ್ದ್ ಲೆತ್ತೆರ್.