Last updated on December 9th, 2025 at 07:47 pm
ಡಿ. 09: ತಂತ್ರಜ್ಞಾನ ನಮ ಪಾತೆರುನೆನ್, ಕಲ್ಪುನೆನ್, ಪರತಿರಿ- ಪರಪೋಕುಲೆನ್ ಒರಿತೊನುನ ವಿಧಾನೊಲೆನ್ ಉಂಡು ಮಲ್ತೊಂದುಪ್ಪುನ ಈ ಕಾಲೊಡು, TuluVesre(ತುಳುವರ್ಸ್) ತುಳುವೆರೆಗ್ ಒಂಜಿ ತುಡರಾದ್ ಒದಗ್ದ್ ಬೈದ್ಂಡ್. ತುಳು ಭಾಷೆನ್ ಕಲ್ಪೆರ, ಅರ್ಥ ತೆರಿಯೊನೆರ, ತುಳು ಕಾಲಕೊಂದೆನ್ ತೆರಿಯೊನೆರ ಬಯಕುನಕುಲೆಗ್ ಈ ತಂತ್ರಾಂಶ ಫ್ರೀ ಆದ್ ವ್ಯವಸ್ಥೆ ಮಲ್ತ್ ಕೊರೊಂದುಂಡು. ಡಿಜಿಟಲ್ ಲೋಕ ಬೊಕ್ಕ ತುಳುತ ನಡುಟು ಒಂಜಿ ಸಂಕ ಆದ್ ತುಳುವರ್ಸ್ ಆ್ಯಪ್ ಬುಡುಗಡೆ ಆತ್ಂಡ್.
ತುಳುವರ್ಸ್ ದಾದ?
ಭಾರತೊಡು ಮೂಡ್ಯೆಗ್ ಬೂರೊಂದುಪ್ಪುನ ಭಾಷೆಲೆಡ್ ಒಂಜಾಯಿನ ತುಳು ಭಾಷೆಗ್ ಬೋಡಾದ್ ಉಂಡು ಮಲ್ದಿನ ವೆಬ್-ಬೇಸ್ಡ್ ಅಪ್ಲಿಕೇಶನ್ನೇ ತುಳುವರ್ಸ್. tuluverse.in ದ ಮುಕೇನ ಗಲಸೆರೆ ಆಪುನ ತುಳುವರ್ಸ್ ತುಳು ಭಾಷೆಗ್ ಒಂಜಿ ಪತ್ತ ಡಿಜಿಟಲ್ ಇಕೋ ಸಿಸ್ಟಮ್ಲೆಕ ಬೇಲೆ ಮಲ್ಪುಂಡು. ಬೇತೆ ಬೇತೆ ಶಕ್ತಿಶಾಲಿ ಪನೆಕ್ಲೆನ್ ಒಂಜೇ ಪ್ಲಾಟ್ಫಾರ್ಮ್ಗ್ ಗೋಡ್ಯಾದ್, ಮಾತಾ ಪ್ರಾಯೊದ ಗಲಕೆದಾರೆರೆಗ್ ಗಲಸೆರೆ ಸುಲಭ ಮಲ್ತ್ಕೊರ್ಪುಂಡು.
- ತುಳುವರ್ಸ್ದ ವಿಶೇಷತೆಲು
- ತುಳು ಡಿಕ್ಷನರಿ :
ಸುಮಾರ್ ಒಂಜಿ ಸಾರೊರ್ದುಲಾ ಎಚ್ಚ ಸಬ್ದೊಲೆನ ಅರ್ಥ, ಎಂಚ ಗಲಸುನ ಪನ್ದ್ ಬುಡ್ಪಾದ್ ಬರೆದುಂಡು, ನನಲಾ ಈ ಪಟ್ಟಿಗ್ ಗೋಡ್ಯೊಂದೇ ಇಪ್ಪುಂಡು. ಗಲಸುನಕುಲು ಅಕುಲೆಗ್ ತೆರಿದುಪ್ಪುನ ತುಳು ಸಬ್ದೊಲೆನ್ಲಾ ಈ ತಂತ್ರಾಂಶೊಗು ಗೋಡ್ಯಾವೊಲಿ. ಅಡ್ಮಿನ್ ಅನೆನ್ ಒತ್ತೊಂಡಿಬೊಕ್ಕ ಅಕುಲು ಗೋಡ್ಯಾಯಿನ ಸಬ್ದೊಲಾ ತಂತ್ರಾಂಶೊಡು ತೂವರೆ ತಿಕ್ಕುಂಡು. ಡಿಕ್ಷನರಿಡ್ ಮುರ್ಗೊಲು, ಪಕ್ಕಿಲು, ಮೀನ್ಲು, ಪಲಸೊತ್ತುಲು, ತೆನಸ್, ರಂಗ್, ಜಾಗೆ ಇಂಚ 20 ರ್ದ್ಲಾ ಎಚ್ಚ ವಿಭಾಗೊಲೆಡ್ ಸಬ್ದೊಲೆನ್ ಪಟ್ಟ್ದೆರ್. - ತುಳು ಭಾಷಾಂತರ / Tulu Translator:
ತುಳುವರ್ಸ್ಡ್ ಬೀಸೊಡು ಬೊಕ್ಕ ವಿಶ್ವಾಸಾರ್ಹವಾದ್ ಭಾಷೆ ತರ್ಜುಮೆ ಮಲ್ಪುನ ಪನೆ ಇತ್ತ್ದ್, ಉಂದು ತುಳುರ್ದ್ ಇಂಗ್ಲಿಷ್ಗ್, ಇಂಗ್ಲಿಷ್ರ್ದ್ ತುಳುಕ್ ಸೇರ್ದ್ ಬೇತೆ 8 ಬಾಸೆಲೆಡ್ಲಾ ತರ್ಜುಮೆ ಮಲ್ಪುಂಡು. ಇತ್ತೆಲಾ ಡೆವಲಪ್ಮೆಂಟ್ಡ್ ಇತ್ತ್ದ್ ಮಾತಾ ರೀತಿದ ಭಾಷಾಂತರ ಸಾಧ್ಯ ಆವಂದ್ ಆಂಡ ನಿಚ್ಚೊದ ಗಲಕೆಗ್ ಬೋಡಾಪಿನಾತ್ ಆಪುಂಡು. - ತುಳು ಕಾಲಕೊಂದೆ / Tulu Calendar :
ಭಾಷೆ, ಲಿಪಿದ ಒಟ್ಟುಗು ತುಳು ಸಾಂಸ್ಕೃತಿಕ ಕಾಲಕೊಂದೆಲಾ ಈ ತಂತ್ರಾಂಶೊಡು ಉಂಡು. ತುಳುತ ಪರ್ಬೊಲು, ಸಂಕ್ರಾಂತಿಲು ಮಾತಾ ಈ ಕಾಲಕೊಂದೆಡ್ ಉಲ್ಲ. - ಎಡ್ಡೆ ಇಂಟರ್ಫೇಸ್:
ಈ ತಂತ್ರಾಂಶೊನು ಒಲ್ಪರ್ದ್ ಬೋಡಾಂಡಲಾ ತೂಪಿಲೆಕ ಡಿಸೈನ್ ಮಲ್ದ್ಂಡ್. ಮೊಬೈಲ್, ಟ್ಯಾಬ್, ಲ್ಯಾಪ್ಟಾಪ್, ಕಂಪ್ಯೂಟರ್ಡ್ ಈ ತಂತ್ರಾಂಶೊನು ಗಲಸೊಲಿ. ಇತ್ತೆ ಗೂಗಲ್ ಪ್ಲೇಸ್ಟೋರ್ಡ್ ಆ್ಯಪ್ದ ರೂಪೊಡು ಡೌನ್ಲೋಡ್ಲಾ ಮಲ್ಪೊಲಿ.
- ತುಳು ಡಿಕ್ಷನರಿ :
ತುಳುವರ್ಸ್ನ್ ಗಲಸುನು ಎಂಚ?
ತುಳುವರ್ಸ್ ಗಲಸೆರೆ ಇತ್ತೆ ರಿಜಿಸ್ಟ್ರೇಷನ್, ಲಾಗಿನ್ ಮಾತ ಆವೊಡು ಪನ್ದ್ ಇಜ್ಜಿ. ಬ್ರೌಸರ್ಡ್ ತೂಪುಂಡ ಇಂಟರ್ನೆಟ್ ಬೋಡಾಪುಂಡು. ಆ್ಯಪ್ ಡೌನ್ಲೋಡ್ ಮಲ್ತ್ಂಡ ಇಂಟರ್ನೆಟ್ದಾಂತೆ ಗಲಸೊಲಿ(ಒರ ಡೌನ್ಲೋಡ್ ಮಲ್ಪೆರೆ ಇಂಟರ್ನೆಟ್ ಬೋಡು).
🔸 Translator
1. ನಮ ವಾ ಬಾಸೆಡ್ ಬರೆಪ ಅವೆನ್ ಸೆಲೆಕ್ಟ್ ಮಲ್ಪೊಡು (ತುಳು ಸೆಲೆಕ್ಟ್ ಮಲ್ತ್ದ್ ಕನ್ನಡ-ಇಂಗ್ಲಿಷ್ಡ್ ಬರೆಂಡಲಾ ತುಳುಲಿಪಿಟ್ ತೋಜುಂಡು)
2. ವಾ ಬಾಸೆಡ್ ನಮಕ್ ಬೋಡು ಅವೆನ್ ಮುಲ್ಪ ಸೆಲೆಕ್ಟ್ ಮಲ್ಪೊಡು (ತುಳು ಅತ್ತಂದೆ ಬೇತೆ 9 ಬಾಸೆಲು ಉಲ್ಲ)
3. ವಾಯ್ಸ್ ಇನ್ಪುಟ್
4. ಬರೆತಿನೆನ್ ಅಲಕ್ಕ ಮಾಜಾಯೆರ
5. ಭಾಷಾಂತರ ಮಲ್ಪೆರ Translate ಬಟನ್ ಒತ್ತೊಡು(ಎಚ್ಚಾದ್ ಬರೆನಗನೇ ತರ್ಜುಮೆ ಆಪುಂಡು, ಆಯಿಜಿಂಡ ಈ ಬಟನ್ ಒತ್ತೊಡು)
6. ತರ್ಜುಮೆ ಮಲ್ಪೊಡಾಯಿನ ಪದ/ವಾಕ್ಯೊನು ಮುಲ್ಪ ಬರೆಯೊಡು
7. ತರ್ಜುಮೆ/ಭಾಷಾಂತರ ಆತಿನ ಪದ/ವಾಕ್ಯ ಮುಲ್ಪ ತೋಜುಂಡು.
8. ತುಳುಕ್ ತರ್ಜುಮೆ ಆಯಿನವು ಮಾತಲಾ ತನ್ನಾತೆಗೇ ತುಳು ಲಿಪಿಟ್ ಬರ್ಪುಂಡು, ಅವೆನ್ ಕನ್ನಡ/ಇಂಗ್ಲಿಷ್ ಲಿಪಿಟ್ ತೂಯೆರ ಈ ಬಟನ್ ಗಲಸೊಲಿ
9. ತರ್ಜುಮೆ ಆತಿನೆಟ್ ದಾಲ ತಪ್ಪಾದಿತ್ತ್ಂಡ Flag ಮಲ್ತ್ದ್ ತೆರಿಪಾವೊಲಿ
10. ನಮ ಬರೆತಿನ ಪದೊಕು ಸಂಬಂಧಿತಿನ ಬೇತೆ ವಿಷಯೊಲು ಮುಲ್ಪ ಬರ್ಪ
🔸ತುಳು ಡಿಕ್ಷನರಿ
ಡಿಕ್ಷನರಿ ಪೇಜ್ಡ್ ಸಬ್ದೊಲೆನ್ 20 ರ್ದ್ಲಾ ಎಚ್ಚ ವಿಭಾಗೊಲೆಡ್ ಪಟ್ಟ್ದೆರ್. ಪ್ರತಿ ವಿಭಾಗೊದುಲಯಿ ಅವೆಕ್ ಸಂಬಂಧಿತಿನ ವಿಷಯ ತುಳುಟ್ ತುಳು ಲಿಪಿ ಬೊಕ್ಕ ಕನ್ನಡ ಲಿಪಿ ಅಂಚೆನೇ ಇಂಗ್ಲಿಷ್ ಅರ್ಥಡ್ ಬರ್ಪುಂಡು. ತುಳು ಟ್ ಇತ್ತಿನೆನ್ ಓದುದ್ ಪನ್ಪಾವುನ ಆಪ್ಷನ್ಲಾ ಉಂಡು.
🔸ತುಳು ಕಾಲಕೊಂದೆ/ Tulu Calendar
ತುಳು ಕ್ಯಾಲೆಂಡರ್ಡ್ ತುಳು ತಿಂಗೊಲುಲೆನ್ ಪ್ರಮುಖವಾದ್ ತೋಜಾದ್ ಐತ ಸಮತ ಇಂಗ್ಲಿಷ್ ತಿಂಗೊಲು ಬೊಕ್ಕ ದಿನ ತೂವೊಲಿ. ಉದಾರ್ಮೆಗ್ ಡಿಸೆಂಬರ್ 9 ತುಳು ಲೆಕ್ಕೊಡು ಜಾರ್ದೆ 23.
ಇತ್ತೆ ಅಮಾಸೆ, ಪುಣ್ಣಮೆ, ಸಂಕ್ರಾಂತಿ, ಸಂಕಷ್ಟಿ ಮಾತ್ರ ಇತ್ತ್ದ್ ನನ ಎಚ್ಚಿನ ಒಲವು ಗೋಡ್ಯಾವೊಂದು ಪೋಪೆರ್.
🔸ಸೆಟ್ಟಿಂಗ್
1. ನೋಟಿಫಿಕೇಶನ್ ಆನ್/ಆಫ್ ಮಲ್ಪರೆ
2. ಡಾರ್ಕ್ ಮೋಡ್/ ಲೈಟ್ ಮೋಡ್ ಪಗತೊನರೆ
3. ಫೀಡ್ಬ್ಯಾಕ್: ಆ್ಯಪ್ದ ಬಗೆಟ್ ದಾಲ ಪನರೆ ಇತ್ತ್ಂಡ ಮುಲ್ಪ ಪನೊಲಿ
4. ಪೊಸ ಸಬ್ದೊಲೆನ್ ಗೋಡ್ಯಾಯೆರ ಇತ್ತ್ಂಡ ಮುಲ್ಪ ಗೋಡ್ಯಾವೊಲಿ
ಆ್ಯಪ್ ಡೌನ್ಲೋಡ್ ಮಲ್ಪೆರೆ ಈ ಲಿಂಕ್ ಗಲಸ್ಲೆ…!
https://play.google.com/store/apps/details?id=in.tuluverse.twa
ಡೆವಲಪರ್ನ ಬಗೆಟ್
ಮಿಜಾರ್ ಎಡಪದವುದ ಪೆರ್ಮೆದ ತುಳುವೆ ಸಚಿನ್ ತುಳುವರ್ಸ್ದ ಕನ ಕಟ್ಟ್ದ್ ಸಾಕಾರ ಮಲ್ತಿನಾರ್. ಪತ್ತನೇ ಕ್ಲಾಸ್ ಕಲ್ತ್ದ್, ಬೇಲೆಡ್ ಎಲೆಕ್ಟ್ರೀಷಿಯನ್ ಆದುಪ್ಪುನ ಮೇರ್ ಜೂವನೊಡು ದಾದಾಂಡಲಾ ಮಲ್ಪೊಡು, ತುಳುಕು ಬೋಡಾದ್ ದಾಲ ಮಲ್ಪೊಡು ಪನ್ಪಿ ತೊಡು ಪತೊಂದು ಕಾಲಿ ಮೊಬೈಲ್ಡ್ ಈ ಆ್ಯಪ್ ಡೆವಲಪ್ ಮಲ್ದೆರ್. ಕಂಪ್ಯೂಟರ್ ಡಿಗ್ರಿದಾಂತೆ, ಕಾಲೇಜ್ಲಾ ಪೋವಂದೆ ಸುಮಾರ್ ಆಜಿ ತಿಂಗೊಲು ಬಂಙ ಬತ್ತ್ದ್, ಬತ್ತಿನ ಬಗ್ಲೆನ್ ಏಐ, ಯೂಟ್ಯೂಬ್ದ ಸಕಾಯೊಡು ಪಿರಿಕಟ್ಟ್ ಮಲ್ತೊಂದು ಈತ್ ಮಲ್ಲ ಸಾದಗೊ ಬೆನ್ತಿನ ಜವನನ ಈ ಬೇಲೆಗ್ ತುಳುವೆರ್ ಮಾತಾ ಬೆರಿತಾಂಗ್ ಕೊರೊಡು. ಸಚಿನ್ರೆನ ಬೇಲೆ ಪ್ರತೀ ಒರಿ ತುಳುವಗ್, ಪ್ರತಿ ಒರಿ ನರಮಾನ್ಯಗ್ ಉಮೇದ್ ಪುಟ್ಟಾವೊಡು.
ಈ ಆ್ಯಪ್ ಡೌನ್ಲೋಡ್ ಮಲ್ತ್ದ್ ತಂಕೊದ ತುಳುವೆ ಒರಿ ಮಲ್ದಿನ ಈ ಬೇಲೆಗ್ ಬೆರಿತಾಂಗ್ ಕೊರ್ಕ