Last updated on December 12th, 2025 at 04:32 pm
ಉಬಾರ್, ಡಿ. 12: ಜಾತಕ ತೋಜಾಯೆರ ಬತ್ತಿನ ಜವನ್ದಿ ಒರ್ತಿನ ಪಿರವು ಬೂರ್ನ ಜೋಯಿಸೆ ಗಡಿಗಡಿ ಆಲೆಗ್ ಕಿರುಕುಳ ಕೊರೊಂದಿತ್ತಿನ ನಡಕೆ ಬೊಲ್ತೇರ್ ತಾಲೂಕ್ದ ತೆಕ್ಕಾರ್ಡ್ ನಡತ್ದ್ಂಡ್.
ಮೂಲತಃ ಶಿರಸಿ ಮೂಲೊದಾಯಿನ, ಮುಟ್ಟದ ದೇಲಂತಡೆಡ್ ಬೇಲೆ ಮಲ್ತೊಂದಿತ್ತಿನ ಶೇಷಗಿರಿ ಭಟ್ ಪನ್ಪಿನಾಯೆನೇ ಈ ಜೋಯಿಸೆ. ತೆಕ್ಕಾರ್ದ ಜವನ್ದಿ ಒರ್ತಿನ ಜಾತಕ ತೋಜಾಯೆರ ಆಲೆನ ಇಲ್ಲದಕುಲು ಉಂಬ್ಯನಡೆ ಲೆತೊಂದು ಪೋದಿತ್ತೆರ್. ಬೊಕ್ಕ ಆಲೆನ ಇಲ್ಲದಕ್ಲೆಡ ಪಾತೆರ್ನ ಜೋಯಿಸೆ ಆಲೆನ ದೋಷ ಪರಿಹಾರೊಗು ಕೆಲವೊಂಜಿ ಪೂಜೆ ಮಲ್ಪಾಯೆರ ಪಿದಡ್ದಿತ್ತೆ. ಬೊಕ್ಕ ಜೋಯಿಸೆ ಆಲೆನ್ ಮದಿಮೆ ಮಲ್ತ್ ಕೊರ್ಯೆರ ಇಲ್ಲದಕ್ಲೆಡ ಒತ್ತಾಯ ಮಲ್ತಿತ್ತೆ. ಆಂಡ ಇಲ್ಲದಕುಲು ಬೊಕ್ಕ ಜವನ್ದಿ ಅವೆಕ್ ಒತ್ತೊನಂದಿನಪಗ ಬೆರಿ ಬುಡಂದಿನ ಉಂಬ್ಯೆ ಜವನ್ದಿಗ್ ಬೇತೆ ಬೇತೆ ರೀತಿ ಕಿರುಕುಳ ಕೊರ್ಯೆರ ಸುರುಮಲ್ತಿನತ್ತಂದೆ, ಕೊಟ್ಯಗ್ ಸೂ ಪಾಡ್ದ್ ಪೋದಿತ್ತೆ ಪನ್ದ್ ಇಲ್ಲದಕುಲು ಆರೋಪ ಮಲ್ತ್ದೆರ್.
ಅಪಗ ಇಲ್ಲದಕುಲು ಉಬಾರ್ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದಿತ್ತ್ದ್, ಪೊಲೀಸೆರ್ ಆಯಗ್ ಜೋರು ಮಲ್ತ್ ಕಡಪುಡ್ದಿತ್ತೆರ್. ಆಂಡಲಾ ತನ್ನ ಬುದ್ದಿ ಬುಡಂದಿನ ಜೋಯಿಸೆ ಒಂಜಿ ದಿನ ನಡೀರ್ದ ಪೊರ್ತುಡು ಪೊಣ್ಣನ ಇಲ್ಲಗ್ ಬತ್ತ್ದ್ ಏರೆಗ್ಲಾ ತೆರಿಯಂದಿಲೆಕ ಮಾಟ ಮಂತ್ರ ಪ್ರಯೋಗ ಮಲ್ತ್ದೆ ಪನ್ದ್ ಆರೋಪ ಮಲ್ತ್ದೆರ್. ಈ ದೃಶ್ಯ ಇಲ್ಲದ ಸಿಸಿ ಕ್ಯಾಮರಾಡ್ ಕೈದಾದಿತ್ತ್ಂಡ್. ಈ ಬಗೆಟ್ ಪೊಣ್ಣನ ಇಲ್ಲದಕುಲು ಉಬಾರ್ ಪೊಲೀಸೆರೆಡ ಒಯಿಲ್ ಬರೆಪಾದೆರ್, ಪ್ರಕರಣ ದಾಕಲ್ತೊಂಡಿನ ಪೊಲೀಸೆರ್ ಜ್ಯೋತಿಷಿನ್ ಕೈದ್ ಮಲ್ತ್ದ್, ನ್ಯಾಯಂತಡೆದ ಎದುರು ಲೆತೊಂದು ಪೋತೆರ್. ಬೊಕ್ಕ ಜೋಯಿಸೆ ಜಾಮೀನ್ದ ಮಿತ್ತ್ ಬುಡುಗಡೆ ಆತೆ ಪನ್ದ್ ವರದಿ ಆತ್ಂಡ್.