‘ಅಧಿವೇಶನ ಮುಗಿನೆಟ್ಟಿಗೇ ಡಿಕೆಶಿ ಸಿಎಂ ಆಪೆರ್’- ಕಾಂಗ್ರೆಸ್ ಶಾಸಕೆ ಇಕ್ಬಾಲ್ ಹುಸೇನ್

Last updated on December 12th, 2025 at 02:44 pm

ಬೆಳಗಾವಿ, ಡಿ. 12: “ಸಂಕ್ರಾಂತಿ ಅತ್ತ್, ಅಧಿವೇಶನ ಮುಗಿನೆಟ್ಟಿಗೇ ಡಿ.ಕೆ. ಶಿವಕುಮಾರ್ ಸಿಎಂ ಆಪೆರ್” ಪನ್ದ್ ಕಾಂಗ್ರೆಸ್ ಶಾಸಕೆ ಇಕ್ಬಾಲ್ ಹುಸೇನ್ ಪೊಸ ಬಾಂಬ್ ಪುಡತ್‌ದೆರ್.

ಶುಕ್ರವಾರ ಮಾಧ್ಯಮ ಪ್ರತಿನಿಧಿಲೆಡ ಪಾತೆರ್ನ ಆರ್, “ಎನ್ನ ಮುಂಡೊಡು ಬರೆತಿನೆಕ್ ಯಾನ್ ಶಾಸಕೆ ಆತಿಜೆನಾ, ಅಂಚೆನೇ ಡಿ.ಕೆ .ಶಿವಕುಮಾರ್ ರೆನ ಮುಂಡೊಡು ಬರೆತ್ಂಡ್ ಆರ್ ಸಿಎಂ ಆಪೆರ್. ಗುರುವಾರ ಎಂಕ್ಲ 55 ಜನ ಶಾಸಕೆರ್ ವನಸ್‌ಗ್ ಸೇರ್ದಿತ್ತ. ವನಸ್ ಮಲ್ತ್‌ದ ಆತೇ. ಎಂಕ್ಲೆಗ್ ಡಿ.ಕೆ. ಶಿವಕುಮಾರ್ ಸಿಎಂ ಆವೊಡು, ಆಪೆರ್” ಪನ್ದ್ ಪನ್ಡೆರ್.

“ಡಿ.ಕೆ. ಶಿವಕುಮಾರ್ ಬಂಙಬತ್ತಿನೆಕ್ ಫಲ ತಿಕ್ಕುಂಡು. ಅಧಿವೇಶನ ಮುಗಿನೆರ್ದ್ ಬೊಕ್ಕ ಆಯಿನಾತ್ ಬೇಗ ಆ ಫಲ ತಿಕ್ಕುಂಡು. ನಂಬರ್ ಮುಖ್ಯ ಅತ್ತ್, ಹೈಕಮಾಂಡ್‌ದ ನಿರ್ದೇಶನ ಮುಖ್ಯ. ಹೈಕಮಾಂಡ್ ಮಾತೆನ್ಲಾ ತೀರ್ಮಾನ ಮಲ್ಪುಂಡು. ಹೈಕಮಾಂಡ್ ಪನ್ಡ್‌ನ್ಡ ಆರ್ ದಾಯೆ ಕೇನುಜೆರ್? ಸಂಖ್ಯಾಬಲ ಮುಖ್ಯ ಅತ್ತ್” ಪನ್ಪಿ ಅಭಿಪ್ರಾಯ ತೂಪಾಯೆರ್.

“50-60 ಜನ ವನಸ್‌ಗ್ ಸೇರ್ದಿತ್ತೆರ್. ಆಂಡ, ರಾಜಕೀಯ ಚರ್ಚೆ ಆತಿಜಿ. ಡಿ.ಕೆ.ಶಿವಕುಮಾರ್ ಲೆತ್ತ್ಂಡ ಮಾತಾ 224 ಜನ ಶಾಸಕೆರ್ಲಾ ವನಸ್‌ಗ್ ಬರ್ಪೆರ್. ಕಾಂಗ್ರೆಸ್, ಜೆಡಿಎಸ್, ಬಿಜೆಪಿ ಪನ್ದ್ ಇಜ್ಜಿ. ಮಾತೆರ್ಲಾ ಡಿ.ಕೆ. ಶಿವಕುಮಾರ್‌ರೆಗ್ ಬೋಡಾಯಿನಕುಲೇ, ಮಾತೆರ್ಲಾ ದೋಸ್ತಿಲೇ” ಪನ್ದ್ ಪನ್ಡೆರ್.