Last updated on December 12th, 2025 at 12:10 pm
ಕುಡ್ಲ, ಡಿ. 12: ತುಳುವ ಮಣ್ಣ್ಡ್ ಸತ್ಯೊಡು ನಡತೊಂದಿತ್ತಿನ ದೈವಾರಾಧನೆ ಒಂಜಾತ್ ಜನೊತ ಅಭಿವ್ಯಕ್ತಿ ಸ್ವಾತಂತ್ರ್ಯ, ಕಲಾ ಸ್ವಾತಂತ್ರ್ಯೊದ ಪುದರ್ಡ್ ಗಡು ಮೀರ್ದ್ ಪೋದು, ತುಳುವೆರೆ ನಂಬೊಲಿಗೆ ಇನಿತ ದಿನೊಟು ಎಚ್ಚಿನ ಜನೊಕು ಕಾಲಿ ಒಂಜಿ ಮನೋರಂಜನಾ ಸೊತ್ತು ಆದ್ ಪೋತುಂಡು.
ಇತ್ತೆ ಇತ್ತೆ ಮೊಕ್ಲೆನ ಕ್ರಿಯೇಟಿವಿಟಿಗ್ ಮಣ್ಣ್ ಪತ್ತ್ನಗ ಮೊಕಲೆನ ಕಂಟೆಂಟ್ನ್ ಮಿತ್ತ್ ಕನಯೆರೆ ಬೋಡಾಪಿನಿ ತುಳುವೆರೆ ಪವಿತ್ರ ದೈವಾರಾಧನೆ. ಆಟಡ್, ನಾಟಕಡ್, ಪಿಚ್ಚರ್ಡ್, ಕಡೆಕ್ ಸಂಬಂಧೊನೇ ಇಜ್ಜಂದಿನ ಹಿಂದೀ ಸೀರಿಯಲ್ಡ್ ಕಂಟೆಂಟ್ ಬಲಿಪೆರೆ ಒರಿಯಗ್ ಅರ್ದಲ ಪೂಜಿದ್, ಗಗ್ಗರ, ತರೆಪಟ್ಟ ಕಟ್ಟೊಡಾದ್ ಬೈದ್ಂಡ್. ಅವು ಬುಡ್ಲೆ ಗಟ್ಟೊದ ಮಿತ್ತ್ದ ದೇವಿ ದೇವೆರ್ನಕುಲೆಗ್ಲಾ ಇತ್ತೆ ದೈವೊದ ಲೆಕ ಐತ ಆವೊಡುಗೆ..! ಉಂದು ಮಾತಾ ಒಂಜಿ ಬರಿಕ್ ಆಂಡ ಪೊಕ್ಕಡೆ ಇಜಿಂಡಲಾ ರೀಲ್ಸ್ ಮಲ್ತ್ದ್ ವೀವ್ಸ್ ಗೆತೊನರಲಾ ದೈವ ಬೋಡು, ಛದ್ಮವೇಷೊಡುಲಾ ದೈವ ಬೋಡು, ಗೋಡೆಗ್ ಪೈಂಟ್ ಆಕುಂಡಲಾ ಬೋಡು, ಗಾಳಿಪಟ ಮಲ್ತ್ ರಾಪಾವುಂಡ ಐಟ್ಲಾ ಬೋಡು, ಸಾಬೂನ್ದ ಎಡ್ವರ್ಟೈಸ್ಮೆಂಟ್ಡ್ಲಾ ಬೋಡು, ಕಂಪೆನಿದ ಪ್ರಮೋಷನ್ಡ್ಲಾ ಬೋಡು, ಒಟ್ಟಾರೆ ಪನ್ಪುಂಡ ತುಳುವೆರೆ ಕೈತತ್ತ್ದ್ ಪೋದು ಇತ್ತೆ ಕಾಲಿ ಮನೋರಂಜನೆದ ಲೆಕ ಆತ್ಂಡ್ ನಮ್ಮ ಸಂಸ್ಕೃತಿ.
ಬೆಂಗಳೂರುಡು ಕ್ರಿಸ್ಮಸ್ದ ಲೆಕ್ಕೊಡು 2025 ಡಿಸೆಂಬರ್ 11ರ್ದ್ 2026 ಜನವರಿ 4 ಮುಟ್ಟ 51ನೇ ವಾರ್ಷಿಕ ಕೇಕ್ ಶೋ ನಡತೊಂದುಂಡು. ಈ ಕೇಕ್ ಶೋ ಡ್ ನಮ್ಮ ದೈವೊದ ಒರುನು ತಿನ್ಪುನ ಕೇಕ್ಡ್ ಮಲ್ತ್ದ್ ಪ್ರದರ್ಶನೊಗು ದೀತೆರ್.
ಇತ್ತೆ ಈ ಕೇಕ್ ತುಳುವೆರೆ ಪಿಸ್ರ್ಗ್ ಈಡ್ ಆತ್ಂಡ್. ಒಂಜಿ ಸಂಸ್ಕೃತಿದ ಸೂಕ್ಷ್ಮತೆನ್ ತೆರಿಯಂದೆ, ತೆರಿಯೊನುನ ಪುನೆಪು ಬರಂದೆ, ತನ್ಕುಲೆಗ್ ಬೋಡಾಯಿಲೆಕ ಆ ಸಂಸ್ಕೃತಿನ್ ವಿಚಿತ್ರವಾದ್ ತೂಪಾವುನವು ಎಂಚ ಕಲಾ ಸ್ವಾತಂತ್ರ್ಯ ಆಪುಂಡು ಪನ್ದ್ ತುಳುವೆರ್ ಕೇನೊಂದು ಉಲ್ಲೆರ್.
ಕೇಕ್ ಶೋ ಮುಗಿನೆರ್ದ್ ಬೊಕ್ಕ ಎಚ್ಚಿನ ಕೇಕ್ ಶೋಡ್ ಆ ಕೇಕ್ನ್ ಪಾಲ್ ಮಲ್ತ್ದ್ ತಿನ್ಪೆರ್!