Last updated on December 14th, 2025 at 10:44 am
ಕುಡ್ಲ, ಡಿ. 13: ಡಿವೋರ್ಸ್ ಬೋಡು ಪನ್ದ್ ಕೋರ್ಟ್ದ ಮೊಟ್ಟು ಬರ್ತಿನ ರಡ್ಡ್ ಜೋಡಿಲು ಕುಡ ಒಂಜಾಯಿನ ವಿಶೇಷ ನಡಕೆಗ್ ಶನಿವಾರ ಕುಡ್ಲದ ಜಿಲ್ಲಾ ನ್ಯಾಯಂತಡೆಡ್ ನಡತಿನ ಲೋಕ ಅದಾಲತ್ ಬೈಠಕ್ ಸಾಕ್ಷಿ ಆಂಡ್.
ಈ ರಡ್ಡ್ ಜೋಡಿಲು ದಾಂಪತ್ಯ ಜೂವನೊಡು ಒವ್ವಾ ನೆವನೊಗು ಮನಸ್ತಾಪ ಉಂಡಯಿನೆರ್ದಾವರ ಡಿವೋರ್ಸ್ ಕೇನ್ದ್ ನ್ಯಾಯಂತಡೆಗ್ ಅರ್ಜಿ ಪಾಡ್ದಿತ್ತೆರ್. ಬೊಕ್ಕ ವಿಚಾರಣೆದ ಪೊರ್ತುಡು ಈ ಪ್ರಕರಣೊನು ನ್ಯಾಯಂತಡೆದ ಮಧ್ಯಸ್ಥಿಕೆ ಕೇಂದ್ರೊದ ಮುಕೇನ ಮಲ್ಪುನ ಪುನೆಪು ಬತ್ತೆರ್. ಕಂಡನೆ ಬೊಡೆದಿನ ನಡುಟು ಸಂಧಾನ ಮಲ್ಪಾದ್ ಕುಡ ಒಂಜಾದ್ ದಾಂಪತ್ಯ ದುಂಬರಿಪುನ ಬಗೆಟ್ ಇರ್ವೆರೆಗ್ಲಾ ತೆರಿಪಾದೆರ್. ಪಂಚಾತಿಗೆದ ಪೊರ್ತುಡು ದಂಪತಿಲು ಕುಡ ಒಂಜಾದ್ ಜೂವನ ದುಂಬರಿಪೆರ ಒತ್ತೊಂದೆರ್.
ಆ ಪ್ರಕಾರ ಸನಿಯಾರ ಲೋಕ ಅದಾಲತ್ಗ್ ಬತ್ತಿತ್ತಿನ ರಡ್ಡ್ ಜೋಡಿಲು ಕೌಟುಂಬಿಕ ನ್ಯಾಯಂತಡೆದ ಪ್ರಧಾನ ನ್ಯಾಯಾಧೀಶೆರಾಯಿನ ಲಕ್ಷ್ಮೀ ನಾರಾಯಣ ಭಟ್ ಕೆ. ಮೆರೆನ ಸಮಕ್ಷಮೊಡು ಒರಿಯಗೊರಿ ಮಾಲೆ ಪಾಡೊನುನ ಮುಕೇನ ಒಂಜಾದ್ ಪ್ರಕರಣ ಎಡ್ಡೆಡ್ ಮುಗೀಂಡ್. ಈ ಪೊರ್ತುಡು ಪೆರಿಯ ಸಿವಿಲ್ ನ್ಯಾಯಾಧೀಶೆದಿ ಬೊಕ್ಕ ಜಿಲ್ಲಾ ಕಾನೂನು ಸೇವೆಲೆನ ಪ್ರಾಧಿಕಾರೊದ ಸದಸ್ಯ ಕಾರ್ಯಂತೆರ್ ಜೈಬುನ್ನೀಸಾ, ಬೇತೆ ಬೇತೆ ನ್ಯಾಯಂತಡೆಲೆನ ನ್ಯಾಯಾಧೀಶೆರ್ ಬೊಕ್ಕ ವಕೀಲೆರ್ ಒತ್ತುಪಾಲ್ ಇತ್ತ್ದ್, ಈ ಪೊರ್ತುಗು ಸಾಕ್ಷಿ ಆಯೆರ್.
ಲೋಕ ಅದಾಲತ್ ಅಧಿವೇಶನೊಡು ಪಾಲ್ ಪಡೆದಿತ್ತಿನ ರಡ್ಡ್ ಜೋಡಿಲುಲಾ ಕುಡ ಒಂಜಾದ್ ತನ್ಕುಲೆ ಡಿವೋರ್ಸ್ ಲಡಯಿನ್ ಕೈದ್ ಮಲ್ದಿನ ಈ ನಡಕೆ ಮಾದರಿ ಆದುಂಡು ಪನ್ದ್ ಪೆರಿಯ ಸಿವಿಲ್ ನ್ಯಾಯಾಧೀಶೆದಿ ಬೊಕ್ಕ ಜಿಲ್ಲಾ ಕಾನೂನು ಸೇವೆಲೆನ ಪ್ರಾಧಿಕಾರೊದ ಸದಸ್ಯ ಕಾರ್ಯಂತೆರ್ ಜೈಬುನ್ನೀಸಾ ಮೇರ್ ಪನ್ಡೆರ್.