Last updated on December 17th, 2025 at 09:41 am
ಒಡಿಪು, ಡಿ. 17: ಕೋರ್ಟ್ದ ಆದೇಶ ಪಾಲಿಪೆರ ಪುಲ್ಯ ನಾಲ್ ಗಂಟೆಗ್ ಜವನ್ದಿ ಒರ್ತಿನ ಇಲ್ಲಗ್ ಪೊಗ್ಗಿನ ಪೊಲೀಸೆರ್ ಆಲೆನ ಮಿತ್ತ್ ಹಲ್ಲೆ ಮಲ್ತ್ದೆರ್ ಪನ್ಪಿ ಆರೋಪ ಕೇನ್ದ್ ಬತ್ತಿತ್ತ್ದ್, ಪೊಲೀಸೆರೆ ಮಿತ್ತ್ ಇತ್ತೆ ಬಿಲ್ಲವ ಸಮುದಾಯ ಆಕ್ರೋಶ ತೂಪಾದ್, ಪೊರ್ಮ್ಬಾಟೊಗು ಜತ್ತೊಂದುಲ್ಲೆರ್.
2014ಟ್ ದೇವೇಂದ್ರ ಸುವರ್ಣ ಪನ್ಪಿನಾರೆಗ್ ಆಶಿಕ್ ಪನ್ಪಿ ಜವನೆ ಬೈಕ್ಡ್ ಎಡ್ತ್ದ್, ಆರೆಗ್ ಗಾತಿದ ಗಡಿಕುಲಾದಿತ್ತ್ದ್, ಇನಿಕ್ಲಾ ಆರೆಗ್ ಮರ್ದ್ ನಡತೊಂದುಂಡು. ಈ ಪ್ರಕರಣೊಗು ಸಂಬಂಧಿತ್ದ್ ಕೋರ್ಟ್ ಆಶಿಕ್ಗ್ 25 ಲಕ್ಷ ಪಿರಿಕಟ್ಟ್ ಕೊರೊಡು ಪನ್ದ್ ಆದೇಶ ಕೊರ್ದಿತ್ತ್ಂಡ್. ಆಂಡ ಆಶಿಕ್ ಪಿರಿಕಟ್ಟ್ದ ಕಾಸ್ ಕೊರಂದೆ ದೆಂಗ್ತಪ್ಪಾದಿತ್ತೆ. ಆಶಿಕ್ಗ್ ಬೋಡಾದ್ ಪೊಲೀಸೆರ್ ಪಾಕ ಸರ್ತಿ ನಾಡ್ದೆರ್. ಆಯೆ ಉಪ್ಪೂರುದ ತನ್ನ ಅಜ್ಜಿನ ಇಲ್ಲಡ್ ಉಲ್ಲೆ ಪನ್ಪಿ ಲೊಕೇಶನ್ ಆಧಾರೊಡು ಪೊಲೀಸೆರ್ ಪುಲ್ಯ 4:00 ಗಂಟೆಗ್ ದಾಳಿ ಮಲ್ತ್ದೆರ್. ಈ ಪೊರ್ತುಡು ಅಕ್ಷತಾನ ಮಿತ್ತ್ ಹಲ್ಲೆ ಮಲ್ತ್ದೆರ್ ಪನ್ದ್ ಪನೊಂದುಲ್ಲೆರ್.
ಪೊಲೀಸೆರ್ ಪನ್ಪುನ ಪ್ರಕಾರ ನ್ಯಾಯಾಯಂತಡೆದ ಆದೇಶೊದ ಪ್ರಕಾರ ನಡತೊಂದ. ಕಾನೂನು ಪ್ರಕಾರ ದಾದ ಮಲ್ಪೊಡಾ ಅವೆನ್ ಎಂಕ್ಲ ಮಲ್ತ್ದ. ಒಟ್ಟುಗು ನ್ಯಾಯಂತಡೆ ಪನ್ಡಿಲೆಕ ಆಶಿಕ್ನ ಇಲ್ಲಗ್ ದಾಳಿ ಮಲ್ಪುನಗ ಎಂಕ್ಲೆನ ಒಟ್ಟುಗು ಕೋರ್ಟ್ ಅಮೀನ್ (ನ್ಯಾಯಂತಡೆರ್ದ್ ನೇಮಕ ಆದುಪ್ಪುನ ಅಧಿಕಾರಿ) ಲಾ ಇತ್ತೆರ್ ಪನ್ದ್ ಪನ್ತೆರ್. ನನ ಈ ದಾಳಿದ ಪೊರ್ತುಡು ಎನ್ನ ಮಿತ್ತ್ ಹಲ್ಲೆ ಆತ್ಂಡ್ ಪನ್ದ್ ಆಶಿಕ್ನ ಸಂಸಂಧಿ ಅಕ್ಷತಾ ಪೂಜಾರಿ ಆರೋಪ ಮಲ್ತೊಂದುಲ್ಲೆರ್. ಪೊಲೀಸೆರೆ ದಾಳಿದ ಪೊರ್ತುಡು ಅಕ್ಲೆನ ಒಟ್ಟುಗು ಕೋರ್ಟ್ ಅಮೀನ್ ಇಜ್ಜಂಡ್. ಅಕ್ಲೆನ ಒಟ್ಟುಗು ಒರ್ತಿ ಪೊಂಜೊವು ಪೊಲೀಸ್ಲಾ ಇಜ್ಜಂಡ್ ಪನ್ದ್ ಅಕ್ಷತಾ ಪನ್ತೆರ್. ಇತ್ತೆ ಆರೆಗ್ ಸರಕಾರಿ ಆಸ್ಪತ್ರೆಡ್ ಮರ್ದ್ ನಡತೊಂದುಂಡು.
ಬ್ರಹ್ಮಾವರದ ವಿದ್ಯಾರ್ಥಿನಿ ಕುಮಾರಿ ಅಕ್ಷತಾ ಪೂಜಾರಿ ಮೆರೆನ ಪ್ರಕರಣೊಡು ಸ್ಥಳೀಯ ಪೊಲೀಸ್ ಅಧಿಕಾರಿಲು ತಪ್ಪು ನಿರ್ಧಾರ ಗೆತೊಂದಿತ್ತ್ಂದ್, ಸಮಾಜೊಡು ಗೊಂದಲ ಉಂಡಾತ್ಂಡ್. ಆರೋಪಿನ್ ಪತ್ತುನ ಪುದರ್ಡ್ ಪಾಪದ ಅಪ್ಪೆ-ಮಗಲೆನ ಮಿತ್ತ್ ಪ್ರಕರಣ ದಾಕಲ್ತ್ದ್, ಇಲ್ಲದಕ್ಲೆಗ್ ಅಧಿಕಾರಿಲು ಅನ್ಯಾಯ ಮಲ್ತ್ದೆರ್ ಪನ್ದ್ ಸಂಸದೆ ಕೋಟ ಶ್ರೀನಿವಾಸ ಪೂಜಾರಿ ಆರೋಪ ಮಲ್ತ್ದೆರ್. ವಿದ್ಯಾರ್ಥಿನಿ ಅಕ್ಷತಾ ಪೂಜಾರಿ ಬೊಕ್ಕ ಆರೆನ ಅಪ್ಪೆನ ಮಿತ್ತ್ ದಾಕಲಾತಿನ ಪ್ರಕರಣೊನು ಇತ್ತೆಗ್ ಇತ್ತೆನೇ ರದ್ದ್ ಮಲ್ತ್ದ್, ರಾತ್ರೆ ಇಲ್ಲದಕ್ಲೆಗ್ ಉಪದ್ರ ಮಲ್ದಿನ ಸಿಬ್ಬಂದಿಲೆನ ಮಿತ್ತ್ ಕ್ರಮ ಗೆತೊನರೆ ಜಿಲ್ಲಾಧಿಕಾರಿ ಬೊಕ್ಕ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಲೆಗ್ ಸಲಹೆ ಕೊರ್ತೆರ್.