Last updated on December 26th, 2025 at 11:05 am
ಬೆಂಗಳೂರು, ಡಿ. 26: ಬೆಂಗಳೂರ್ದ ಆಸ್ಪತ್ರೆ ಒಂಜೆಟ್ ಸೈಕೋ ಸಿಬ್ಬಂದಿಯೊರಿ ಲೇಡಿ ನರ್ಸ್ಲು ಕುಂಟು ಮಾನುನಗ ವೀಡಿಯೋ ಮಲ್ತೊಂದಿತ್ತಿನ ನಡಕೆ ಬೊಲ್ಪುಗು ಬೈದ್ಂಡ್. ಆರೋಪಿನ ಈ ಬೇಲೆ ಡಾಕ್ಟರ್ಗ್ ತೆರಿಯೊಂದಿತ್ತಿಲೆಕನೆ ಪೋಲೀಸೆರೆಗ್ ತೆರಿಪಾದ್, ಕಾಮುಕನ್ ಕೈದ್ ಮಲ್ತ್ದೆರ್.
ನಾಗರಬಾವಿ ಕೈತಲ್ದ ಪ್ರೈವೇಟ್ ಆಸ್ಪತ್ರೆ ಒಂಜೆತ ಆಪರೇಷನ್ ಥಿಯೇಟರ್ಡ್ ಬೇಲೆ ಮಲ್ತೊಂದಿತ್ತಿನ ಸಿಬ್ಬಂದಿಯೊರಿ ಲೇಡಿ ನರ್ಸ್ಲೆನ ಖಾಸಗಿ ಫೋಟೋ ದೆತ್ತ್ದ್ ತಿಕ್ಕ್ದ್ ಬೂರ್ದೆ. ಆರೋಪಿನ್ ಸುವೆಂದು ಮೊಹಂತ ಪನ್ದ್ ಗುರ್ತ ಪತ್ತ್ದೆರ್. ಉಂಬ್ಯೆ ಲೇಡಿ ನರ್ಸ್ನಕುಲು ಕುಂಟು ಮಾಪುನ ಪೊರ್ತುಡು ಫೋಟೋ ಬೊಕ್ಕ ವೀಡಿಯೋ ರೆಕಾರ್ಡ್ ಮಲ್ತೊಂದಿತ್ತೆ. ಕಾಮುಕನ ಈ ಬೇಲೆನ್ ತೂಯಿನ ನರ್ಸ್ ಒರ್ತಿ ಈ ವಿಷಯೊನು ಆಸ್ಪತ್ರೆದ ಡಾಕ್ಟರ್ಗ್ ತೆರಿಪಾದೆರ್. ಅಪಗನೇ ಡಾಕ್ಟರ್ ಚೇತನ್ ಮೇರ್ ಅನ್ನಪೂರ್ಣೇಶ್ವರಿ ನಗರ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದೆರ್.
ಒಯಿಲ್ದ ಆಧಾರೊಡು ಪೊಲೀಸೆರ್ ಪ್ರಕರಣ ದಾಕಲ್ತೊಂದು ಜಡ್ತೆ ಮಲ್ಪುನಗ ಆರೋಪಿ ಸುವೆಂದು ಮೊಹಂತ ಕರಿನ ಒಂಜಿ ವರ್ಸೊರ್ದಿಂಚಿ ಅವ್ವೇ ಪ್ರೈವೇಟ್ ಆಸ್ಪತ್ರೆದ ಆಪರೇಷನ್ ಥಿಯೇಟರ್ಡ್ ಬೇಲೆ ಮಲ್ತೊಂದಿತ್ತೆ ಪನ್ದ್ ತೆರಿದ್ ಬೈದ್ಂಡ್. ಆತೇ ಅತ್ತಂದೆ ಆರೋಪಿನ ಮೊಬೈಲ್ ಪರಿಶೀಲನೆ ಮಲ್ಪುನಗ ನರ್ಸ್ನಕ್ಲೆನ ಖಾಸಗಿ ಫೋಟೋ ಬೊಕ್ಕ ವೀಡಿಯೋಲು ತಿಕ್ಕ್ದಗೆ. ನಡಕೆಗ್ ಸಂಬಂಧಿತ್ದ್ ಅನ್ನಪೂರ್ಣೇಶ್ವರಿ ನಗರ ಪೊಲೀಸೆರ್ ಆರೋಪಿ ಸುವೆಂದು ಮೊಹಂತನ್ ಕೈದ್ ಮಲ್ತ್ದ್, ಎಚ್ಚಿನ ವಿಚಾರಣೆ ಮತ್ತೊಂದುಲ್ಲೆರ್.