Last updated on December 30th, 2025 at 09:58 am
ಪುತ್ತೂರು , ಡಿ. 29: ಮದಿಮೆ ಆಪೆ ಪನ್ದ್ ನಂಬಾದ್ ಪೊಣ್ಣಗ್ ದಗೆ ಮಲ್ದಿನ ಪ್ರಕರಣೊಗು ಸಂಬಂಧಿತ್ದ್ ಆರೋಪಿ ಕೃಷ್ಣ ಜೆ. ರಾವ್ನ ಅಮ್ಮೆ ಅಂಚೆನೇ ಪುತ್ತೂರು ಬಿಜೆಪಿ ಮುಖಂಡೆ ಜಗನ್ನಿವಾಸ ರಾವ್ ಮೆರೆನ್ ಭಾರತೀಯ ಜನತಾ ಪಾರ್ಟಿ(ಬಿಜೆಪಿ) ಪಕ್ಷೊರ್ದು ಉಚ್ಛಾಟನೆ ಮಲ್ದ್ಂಡ್.
ಈ ಬಗೆಟ್ ಒಲವು ಕೊರ್ನ ಜಿಲ್ಲಾ ಬಿಜೆಪಿ ಅಧ್ಯಕ್ಷೆ ಸತೀಶ್ ಕುಂಪಲ ಮೇರ್, ಜಗನ್ನಿವಾಸ ರಾವ್ ದುಂಬು ಕೊರ್ತಿನ ಪಾತೆರೊಗು ನಡತೊನಂದಿನೆರ್ದಾವರ ಆರೆನ್ ಪಕ್ಷೊರ್ದು ಪಿದಯಿ ಪಾಡ್ದ. ಪ್ರಕರಣ ಬೊಲ್ಪುಗು ಬತ್ತಿನೆಟ್ಟಿಗೆ ಜಗನ್ನಿವಾಸ ರಾವ್ ಗ್ ನೋಟಿಸ್ ಕೊರ್ದಿತ್ತ್ಂಡ್. ಪಕ್ಷೊದ ಚಟುವಟಿಕೆಲೆರ್ದ್ ದೂರ ದೀದಿತ್ತ್ಂಡ್ ಪನ್ದ್ ಸ್ಪಷ್ಟನೆ ಕೊರ್ತೆರ್.
ಓಲಾಂಡಲಾ ಡಿಎನ್ಎ ಪರೀಕ್ಷೆಡ್ ಕೃಷ್ಣ ಜೆ. ರಾವ್ ಬಾಲೆದ ಅಮ್ಮೆ ಪನ್ದ್ ಸಾಬೀತಾಂಡ, ಆ ಪೊಣ್ಣನ್ ತನ್ನ ಮಗಕ್ ಮದಿಮೆ ಮಲ್ಪಾವೆ ಪನ್ದ್ ಜಗನ್ನಿವಾಸ ರಾವ್ ಪಕ್ಷೊಗು ಪಾತೆರ ಕೊರ್ದಿತ್ತೆರ್. ಉಂದೇ ಪಾತೆರೊನು ಆರ್ ಪುತ್ತೂರು ಶಾಸಕೆ ಅಶೋಕ್ ಕುಮಾರ್ ರೈ ಮೆರೆಗ್ಲಾ ಕೊರ್ದಿತ್ತೆರ್ಗೆ. ಆಂಡ ಆರ್ ಕೊರ್ನ ಪಾತೆರೊದ ಲೆಕ ನಡೊಂದುಜೆರ್. ಅಂಚಾದ್ ಪಕ್ಷ ಆರೆನ್ ಉಚ್ಛಾಟನೆ ಮಲ್ಪುನ ನಿರ್ಧಾರ ಗೆತೊಂದುಂಡು.
ಈ ಪ್ರಕರಣ ಕಾನೂನಾತ್ಮಕವಾದ್ ಮುಗಿಪುನೇಟ ಅಂಚೆನೇ ಸಂತ್ರಸ್ತೆದಿಗ್ ನ್ಯಾಯ ತಿಕ್ಕುನೇಟ ಪಕ್ಷ ಪೊರ್ಮ್ಬುಂಡು ಪನ್ದ್ ಆರ್ ಪನ್ಡೆರ್.