Last updated on January 8th, 2026 at 08:28 am
ದೆಲ್ಲಿ, ಜ. 8: ಆಟೋ ಬೊಕ್ಕ ಕ್ಯಾಬ್ ಸೇವೆಲೆಗ್ ಪುದರ್ ಪೋತಿನ ಓಲಾ, ಊಬರ್, ರ್ಯಾಪಿಡೋ, ನಮ್ಮ ಯಾತ್ರಿ ಇಂಚಿನ ಅಗ್ರಿಗೇಟರ್ ಕಂಪೆನಿಲು ಪ್ರಯಾಣಿಕೆರೆರ್ದ್ ಕಡ್ಡಾಯವಾದ್ ಟಿಪ್ಸ್ ಗೆತೊನುನ ನೀತಿಗ್ ಕೇಂದ್ರ ಸರ್ಕಾರ ಬ್ರೇಕ್ ಪಾಡ್ದ್ಂಡ್. ಈತ್ನೇಟ, ಕ್ಯಾಬ್ ಬುಕ್ ಮಲ್ಪುನಗ ಆ್ಯಪ್ಲೆಡ್ ಪ್ರಯಾಣ ದರೊತ ಒಟ್ಟುಗು 20, 40, 60 ರೂಪಾಯಿ ಟಿಪ್ಸ್ ಕೊರ್ಪುನ ಅಜಪು ಇತ್ತ್ದ್, ಅವೆನ್ ಅಜತಿಜ್ಜಿಂಡ ಬೇಗ ಕ್ಯಾಬ್ ಬುಕ್ ಆಪೆದಿಜಿ. ಈ ಟಿಪ್ಸ್ ಕೊರ್ನ್ಡ ಗಾಡಿಲು ಪಕ್ಕ ತಿಕ್ಕುವ ಪನ್ಪಿ ಅಲಿಖಿತ ನಿಯಮ ಗ್ರಾಹಕೆರೆ ದಗೆಕ್ ನೆವನ ಆದಿತ್ತ್ಂಡ್.
ಕೇಂದ್ರ ಸರ್ಕಾರ ಪಿದಡ್ಪಾದಿನ ಪೊಸ ಆದೇಶೊದ ಪ್ರಕಾರ, ಅಪ್ಲಿಕೇಷನ್ಲೆಡ್ ಎಚ್ಚಿಗೆ ಟಿಪ್ಸ್ ಕೊರ್ಪುನ ಆಪ್ಷನ್ ಕಡ್ಡಾಯವಾದ್ ಕೊರ್ಯೆರ ಇಜ್ಜಿ. ಟ್ರಿಪ್ ಮುಗಿ ಬೊಕ್ಕ ಗ್ರಾಹಕೆರ್ ಸ್ವಯಂಪ್ರೇರಿತೆರಾದ್ ಟಿಪ್ಸ್ ಕೊರೊಲಿ. ಈ ಟಿಪ್ಸ್ ಸಂಪೂರ್ಣವಾದ್ ಡ್ರೈವರ್ನ ಅಕೌಂಟ್ಗ್ ಸೀದಾ ಪೋವೊಡು, ಉಂದೆಟ್ ಅಗ್ರಿಗೇಟರ್ ಕಂಪೆನಿಲು ಒವ್ವೇ ಪಾಲ್ ಕೇನರೆ ಇಜ್ಜಿ. ಈ ನಿರ್ಧಾರೊರ್ದು ಪ್ರಯಾಣಿಕೆರ್ ಬೊಕ್ಕ ಆಟೋ, ಕ್ಯಾಬ್ ಡ್ರೈವರ್ನಕುಲೆಗ್ ಕುಸಿ ಆತ್ಂಡ್. ಆತೇ ಅತ್ತಂದೆ, ಪೊಂಜೊವುಲೆನ ಸುರಕ್ಷತೆಗ್ ಬೋಡಾದ್ ಪೊಂಜೊವು ಡ್ರೈವರ್ನಕ್ಲೆನ್ ಅಜಪುನ ಅವಕಾಶ ಕೊರ್ಯೆರಲಾ ಸೂಚನೆ ಕೊರ್ತುಂಡು.
ಈ ಪೊಸ ನಿಯಮೊಗು ಪ್ರಯಾಣಿಕೆರ್ ಬಾರೀ ಕುಸಿಯಾತೆರ್. ದಿನೋಲಾ ಬೇಲೆಗ್ ಪೋಪುನಕ್ಲೆಗ್ 10, 20, 30 ರೂಪಾಯಿ ಟಿಪ್ಸ್ ಕೊರ್ಪುನವು ಆರ್ಥಿಕವಾದ್ ಪುದೆ ಆಪೆದ್ಂಡ್ ಪನ್ದ್ ಗ್ರಾಹಕೆ ಪನ್ಡೊನ್ದೆರ್. ಸರ್ಕಾರ ಈ ವಿಷಯೊಡು ನಡುಕು ಬರ್ಪುನ ಬಾರೀ ಅವಶ್ಯಕ ಆದಿತ್ತ್ಂಡ್ ಪನ್ದ್ ಆರ್ ಅಭಿಪ್ರಾಯ ಪಟ್ಟೊನ್ದೆರ್. ಪರಿಷ್ಕೃತ ನಿಯಮೊಲೆನ್ ದೇಶೊದ ಮಾತಾ ರಾಜ್ಯೊಲೆಡ್ ತಪ್ಪಂದೆ ಜಾರಿ ಮಲ್ಪೆರ ಕೇಂದ್ರ ಸರ್ಕಾರ ನಿರ್ದೇಶನ ಕೊರ್ತುಂಡು.