Last updated on January 14th, 2026 at 03:07 pm
ಬೊಲ್ತೇರ್, ಜ. 14: ಕಳಿಯ ಗ್ರಾಮೊದ ನಾಳ ದೇಲಂತಡೆಗ್ ಪೂಜೆಗ್ ಪಿದಡ್ದಿತ್ತಿನ ಆಣನ ಪುನ ಕೆದುಟ್ ತಿಕ್ಕಿನ ನಡಕೆ ಕುವೆಟ್ಟು ಪಂಚಾಯತ್ ಓಡಿಲ್ನಾಳ ಗ್ರಾಮೊದ ಸಂಬೋಳ್ಯ ಕೈತಲ್ದ ಬರೆಮೇಲ್ ಪನ್ಪಿನಲ್ಪ ನಡತ್ದ್ಂಡ್
ತೀರ್ದಿನ ಆಣನ್ ಸುಬ್ರಹ್ಮಣ್ಯ ನಾಯಕ್ ಮೆರೆನ ಮಗೆ ಗೇರುಕಟ್ಟೆ ಸರ್ಕಾರಿ ಪ್ರೌಢ ಶಾಲೆದ 9 ನೇ ಕ್ಲಾಸ್ ಕಲ್ತೊಂದಿತ್ತಿನ ಆಣ್ ಸುಮಂತ್ (16) ಪನ್ದ್ ಗುರ್ತ ಪತ್ತ್ದೆರ್.
ಸುಮಂತ ಕಳಿಯ ಗ್ರಾಮೊದ ನಾಳ ದೇಲಂತಡೆಗ್ ಕಾಂಡೆ ಧನುಪೂಜೆಗ್ ಪಿದಡ್ದಿತ್ತೆ, ದಿನಲಾ ದೋಸ್ತಿಲೆ ಒಟ್ಟುಗು ಧನುಪೂಜೆಗ್ ಪೋಪೆದೆ, ಇನಿ ಸುಮಂತ್ ಬರಂದಿನೆರ್ದಾವರ ದೋಸ್ತಿಲು ಸುಮಂತ್ನ ಇಲ್ಲದಕ್ಲೆಗ್ ಕಾಲ್ ಮಲ್ತ್ದ್ ಕೇನ್ನಗ, ಆಯೆ ಕಾಂಡೆನೇ ದೇಲಂತಡೆಗ್ ಪೋತೆ ಪನ್ದ್ ಇಲ್ಲದಕುಲು ತೆರಿಪಾದೆರ್. ಆಂಡ ಸುಮಂತ್ ದೇಲಂತಡೆಗ್ ಬತ್ತ್ದಿಜೆ ಪನ್ಪಿ ಒಲವು ತೆರಿದ್ ಬೊಕ್ಕ ಇಲ್ಲದಕುಲು ಪೋಡಿದ್ ನೆರೆಕರೆತಕುಲೆಗ್ ತೆರಿಪಾದೆರ್
ಮಾತಾ ಸೇರ್ದ್ ನಾಡೆರೆ ಜಪ್ಪುನಗ ಆಣ್ ಪೋಪುನ ಸಾದಿದ ತೋಟದ ಕೆದುತ ಬರಿಟ್ ನೆತ್ತೆರ್ದ ಕಲೆಕುಲು ತೋಜಿದ್ ಬತ್ತಿತ್ತ. ಅಕೇರಿಗ್ ಸುಮಾರ್ 11.30 ತ ಅಂದಾಜಿಗ್ ಸುಮಂತ್ನ ಪುನ ಕೆದುಟ್ ತಿಕ್ಕ್ದ್ಂಡ್. ಆಣನ ತರೆಟ್ ಗಾತಿದ ಗಡಿಕುಲಾತಿನ ತೋಜಿದ್ ಬೈದಿತ್ತ್ದ್, ಸಾವುದ ಬಗೆಟ್ ಪಾಕ ಅನುಮಾನೊಲು ತೋಜೊಂದುಲ್ಲ.
ಬೊಲ್ತೇರ್ ಪೊಲೀಸೆರ್, ಬೊಲ್ತೇರ್ ವಲಯ ಅರಣ್ಯಾಧಿಕಾರಿಲು, ಅಗ್ನಿಶಾಮಕ ದಳೊದಕುಲು ಬತ್ತ್ದ್ ಜಾಗೆಡ್ ಪರಿಶೀಲನೆ ಮಲ್ತಿತ್ತ್ದ್ ಕೆದುಟ್ ಪುನ ತಿಕ್ಕ್ದ್ಂಡ್. ಪ್ರಕರಣ ದಾಕಲ್ತೊಂದಿನ ಪೊಲೀಸೆರ್ ಜಡ್ತೆ ಮಲ್ತೊಂದುಲ್ಲೆರ್.