Last updated on January 15th, 2026 at 04:50 pm
ಬೊಲ್ತೇರ್, ಜ. 15: ನಾಪತ್ತೆ ಆದಿತ್ತಿನ ಸುಮಂತ್ ಪುನ ಆದ್ ಕೆದುಟ್ ತಿಕ್ಕಿನ ಪ್ರಕರಣೊಡು ಇತ್ತೆ ಸ್ಪೋಟಕ ಒಲವು ತಿಕ್ಕ್ದ್ಂಡ್. ಕೆದುಟ್ ತಿಕ್ಕಿನ ಕತ್ತಿ ಬೊಕ್ಕ ಪೋಸ್ಟ್ ಮಾರ್ಟಮ್ ರಿಪೋರ್ಟ್ ಜಡ್ತೆದ ದಿಕ್ಕ್ನ್ ಪಗತ್ದ್ಂಡ್. ಸುಮಂತ್ನ ಸಾವು ಆಕಸ್ಮಿಕ ಅತ್ತ್, ಉಂದೊಂಜಿ ಭೀಕರ ಕೊಲೆ ಆದುಪ್ಪು ಪನ್ಪಿ ಅನುಮಾನೊನು ಗಟ್ಟಿ ಮಲ್ತ್ದ್ಂಡ್.
ಅಸಹಜ ಸಾವು ಇತ್ತೆ ಕೊಲೆ ಕೇಸ್!
ಓಡಿಲ್ನಾಳ ಗ್ರಾಮೊದ 15 ವರ್ಸ ಪ್ರಾಯೊದ ಸುಮಂತ್ನ ಸಾವುದ ಪ್ರಕರಣೊಗು ಇತ್ತೆ ಅಧಿಕೃತವಾದ್ ‘ಮರ್ಡರ್’ ಪಟ್ಟ ಬೈದ್ಂಡ್. ಸುರುಟ್ ಅಸಹಜ ಸಾವು ಪನ್ದ್ ಪ್ರಕರಣ ದಾಕಲ್ತೊಂದಿನ ಪೊಲೀಸೆರ್, ಇತ್ತೆ ಮರಣೋತ್ತರ ಪರೀಕ್ಷೆ ವರದಿದ ಬೆರಿಟೇ ಈ ನಿರ್ಧಾರೊಗು ಬತ್ತ್ದೆರ್.
ಪೋಸ್ಟ್ ಮಾರ್ಟಮ್ ರಿಪೋರ್ಟ್ಡ್ ದಾದ ಉಂಡು?
ಸುಮಂತ್ ಕೆದುಕ್ ಬೂರ್ನಗ ಬದ್ಕ್ದಿತ್ತೆ. ಬೊಕ್ಕ ದಮ್ಮುಕಟ್ಟ್ದ್ ತೀರ್ದೆ ಪನ್ದ್ ವರದಿ ಪನೊಂದುಂಡು.
- ತರೆಟ್ ಉಂಡು ಗಡಿ: ಸುಮಂತ್ನ ತರೆತ ಮಿತ್ತ ‘ಮಂದ ಬಲೊ’ತ ಗಡಿ’ (Blunt Injury) ಆತಿನ ಪತ್ತೆ ಆತ್ಂಡ್.
- ಏರ್ಲಾ ಆಕ್ದುಪ್ಪೆರಾ? ಪರ್ತೆದ ಕೈದ್ರ್ದ್ ಆತಿನ ಗಡಿ ಅತ್ತ್, ಒವ್ವಾ ಬಡ್ಡ್ ಸೊತ್ತುಡು ಜೋರ್ ಆಕಿನೆರ್ದಾವರ ಆತಿನ ಗಡಿ ಪನ್ದ್ ಪನೊಂದುಂಡು.
- ಮತಿ ತಪ್ಪಾದ್ ಕೆದುಕು ನೂಕ್ಯೆರಾ?: ತರೆಕ್ ಆಕ್ದ್ ಮತಿ ತಪ್ಪಾದ್ ಆಯನ್ ಕೆದುಕ್ ನೂಕುದ್ ಪಾಡ್ದುಪ್ಪೆರಾ ಪನ್ಪಿ ಅನುಮಾನ ಇತ್ತೆ ತೋಜಿದ್ ಬೈದ್ಂಡ್.
ಕೆದುತ ನೀರ್ ಕಾಲಿ ಮಲ್ಪುನಗ ತಿಕ್ಕ್ಂಡ್ ಕತ್ತಿ!
ಪೊಲೀಸೆರ್ ಇಡೀ ಕೆದುತ ನೀರ್ನ್ ಪಂಪ್ ಪಾಡ್ದ್ ಕಾಲಿ ಮಲ್ತ್ದೆರ್. ಕೆದುತ ಗಂತ್ದ ಕಂಪಡ್ ಒಂಜಿ ಕತ್ತಿ ಬೊಕ್ಕ ಒಂಜಿ ಟಾರ್ಚ್ ಲೈಟ್ ತಿಕ್ಕ್ದ್ಂಡ್
ಪ್ರಕರಣೊದ ಗಾತಿನ್ ಪಿನ್ದೊನ್ದು ಬೊಲ್ತೇರ್ ಡಿಎಸ್ಪಿ ಜಡ್ತೆಗ್ ಜತ್ತ್ದೆರ್. ಕೆರ್ತಿನಕ್ಲೆನ್ ಪತ್ತೆರ 4 ಬೇತೆ ಬೇತೆ ಕೂಟ ಉಂಡು ಮಲ್ತ್ದೆರ್. ಸುತ್ತಮುತ್ತೊದ ಜನೊಕ್ಲೆನ ವಿಚಾರಣೆ ಜೋರಾತ್ಂಡ್.
ಆ ಟಾರ್ಚ್ ಏರೆನವು? ಆ ಕತ್ತಿ ಏರೆನ ಇಲ್ಲಗ್ ಸೇರ್ದಿನವು? ಈ ಮಾತಾ ಕೇನ್ಪುಲೆಗ್ ಸದು ನಾಡೆರೆ ಪೋಲೀಸೆರ್ ಜತ್ತ್ದೆರ್.