Last updated on January 16th, 2026 at 10:30 am
500 ಜನೊತ ಮಿತ್ತ್ ಕೇಸ್; ಕೊಚ್ಚಿಗ್ ಬತ್ತೆರ್ ಕಾನೂನ್ ತಜ್ಞೆರ್
ಕುಂಬ್ಳೆ, ಜ. 16: ರಾಷ್ಟ್ರೀಯ ಪೆರ್ಸಾದಿ 66ತ ಕುಂಬ್ಳೆ ಅರಿಕ್ಕಾಡಿ ಟೋಲ್ ಬೂತ್ಗ್ ಬುಧವಾರ ರಾತ್ರೆ ಪೊರ್ಮ್ಬಾಟಗಾರೆರೆನ ಕೂಟೊರ್ದು ಗಾತಿದ ಹಾನಿ ಆತಿನ ಪ್ರಕರಣೊಗು ಸಂಬಂಧಿತ್ದ್ ಟೋಲ್ ವಿರೋಧಿ ಕ್ರಿಯಾ ಸಮಿತಿ ಅಧ್ಯಕ್ಷೆ, ಶಾಸಕೆ ಎ.ಕೆ.ಎಂ. ಅಶ್ರಫ್ ಸೇರ್ದ್ 15 ಜನೊನು ಟೋಲ್ ಕೈತಲ್ದ ಚಪ್ಪರೊರ್ದು ಪೊಲೀಸೆರ್ ಗುರುವಾರ ಕಾಂಡೆ ಅರೆಸ್ಟ್ ಮಲ್ತ್ದೆರ್.
ಪಂಚಾಯತ್ ಅಧ್ಯಕ್ಷೆ ವಿ.ಪಿ.ಅಬ್ದುಲ್ ಖಾದರ್, ಬ್ಲಾಕ್ ಪಂಚಾಯತ್ ಸ್ಥಾಯೀ ಸಮಿತಿ ಅಧ್ಯಕ್ಷೆ ಅಶ್ರಫ್ ಕಾರ್ಲೆ, ಪಂಚಾಯತ್ ಸ್ಥಾಯಿ ಸಮಿತಿ ಅಧ್ಯಕ್ಷೆ ಎ.ಕೆ. ಆರಿಫ್, ಸಿಪಿಐಎಂ ಏರಿಯಾ ಕಾರ್ಯದರ್ಶಿ ಸಿ.ಎ. ಸುಬೈರ್, ಯುಡಿಎಫ್ ಮಂಜೇಶ್ವರ ಪ್ರಧಾನ ಕಾರ್ಯದರ್ಶಿ ಲಕ್ಷ್ಮಣ ಪ್ರಭು ಕೈದಾತಿನಕ್ಲೆಟ್ ಉಲ್ಲೆರ್. ಟೋಲ್ಗ್ ಹಾನಿ ಆತಿನ ಬಗೆಟ್ ಕುಂಬ್ಳೆ ಪೊಲೀಸ್ ಸ್ಟೇಶನ್ಡ್ 500 ಜನೊತ ಮಿತ್ತ್ ಪ್ರಕರಣ ದಾಕಲಾತ್ಂಡ್.
ಸಾರ್ವಜನಿಕ ಸೊತ್ತು ಹಾನಿ, ಕಾನೂನು ಉಲ್ಲಂಘಿತ್ದ್ ಕೂಟ ಸೇರುನು, ಸಾರ್ವಜನಿಕೆರೆ ವಾಹನ ಸಂಚಾರೊಗು ತಲೆಪು ಇಂಚಿನ ಆರೋಪೊಲೆನ ಆಧಾರೊಡು ಕುಂಬ್ಳೆ ಪೊಲೀಸೆರ್ ಆರೋಪಿಲೆನ ಮಿತ್ತ್ ಪ್ರಕರಣ ದಾಕಲ್ತೊಂದೆರ್.
ಚಪ್ಪರ ದೆತ್ತೆರ್: ಕೈದ್ ಮಲ್ಪುನ ಕಾರ್ಯಾಚರಣೆ ಆಯಿ ಬೊಕ್ಕ ಟೋಲ್ ಬೂತ್ ಕೈತಲ್ ಕಟ್ಟ್ದಿನ ಚಪ್ಪರೊನು ಪೊಲೀಸೆರ್ ದೆಪ್ಪಾದೆರ್.
ಟೋಲ್ ಕೈತಲ್ಡೇ ಇಪ್ಪುನ ಕುಂಬ್ಳೆ ಕಣಿಪುರ ಕ್ಷೇತ್ರೊಡು ಜಾತ್ರೆ ಸುರು ಆತಿನೆರ್ದಾವರ ಈ ಪೊರ್ತುಡು ಮುಲ್ಪ ಪೊರ್ಮ್ಬಾಟ ಮಲ್ಪುನು, ರಾತ್ರೆ ಮಲ್ಲ ಸಂಖ್ಯೆಡ್ ಜನ ಸೇರುನು ಸಮ ಅತ್ತ್ ಪನ್ದ್ ಪೊಲೀಸೆರ್ ಎಚ್ಚಿನ ದುಂಎಚ್ಚರ್ಗೆ ದೆತೊಂದೆರ್. ಸಂಘಟಕೆರ್ಲಾ ಧರಣಿನ್ ತಾತ್ಕಾಲಿಕವಾದ್ ದುಂಬು ಪಾಡೆರ ಒತ್ತೊಂದೆರ್.
ವಿಚಾರಣೆ ದುಂಬು ಪೋಂಡು: ಆರಿಕ್ಕಾಡಿ ಟೋಲ್ ಸಂಬಂಧಿತ್ದ್
ಹೈಕೋರ್ಟ್ಡ್ ಗುರುವಾರ (ಜ. 15) ವಿಚಾರಣೆ ಗೊತ್ತಾದಿತ್ತ್ಂಡ್. ಅಂಚಾದ್ ರಾಷ್ಟ್ರೀಯ ಪೆರ್ಸಾದಿ ಪ್ರಾಧಿಕಾರೊದ ( ಎನ್.ಎಚ್.ಎ.ಐ.) ಕಾನೂನು ತಜ್ಞೆರೆ ಕೂಟ ಕೊಚ್ಚಿಗ್ ಬತ್ತಿತ್ತ್ಂಡ್. ಆಂಡ ಹೈಕೋರ್ಟ್ ವಿಚಾರಣೆನ್ ಜ. 21ಕ್ಕ್ ಎದುರು ಪಾಡ್ದ್ಂಡ್.