ಜ. 23: ತನ್ನ ಪೊರ್ಮ್ಬಾಟೊದ ಬದ್ಕ್ರ್ದಾವರ ಜವನೆರೆಗ್ ಪ್ರೇರಣೆ ಆತಿನ, ಆವೊಂದುಪ್ಪುನ ವ್ಯಕ್ತಿ ಪನ್ಡ ಆರೇ ನೇತಾಜಿ ಸುಭಾಸ್ ಚಂದ್ರ ಬೋಸ್. ಇನಿ, ಜನವರಿ 23 ಆರ್ ಪುಟ್ಟುದಿನ ದಿನೊ. ಪ್ರತಿ ವರ್ಸೊಲಾ ಜನವರಿ 23 ತಾನಿ ನೇತಾಜಿ ಸುಭಾಸ್ ಚಂದ್ರ ಬೋಸ್ ಜಯಂತಿನ್ ಪರಾಕ್ರಮ ದಿನೊ ಆದ್ ಕರಿಪುವೆರ್ ಅಪಗಾಂಡ ಈ ದಿನೊತ ವಿಶೇಷತೆ ದಾದ...?
ಬಲೆ ತೆರಿಯೊನುಗ
ಭಾರತೊ ಬ್ರಿಟಿಷೆರೆ ಕೈರ್ದ್ ಮುಕ್ತ ಆಪಿನೆಟ್ ಅಪ್ಪೆ ಭಾರತಿನ ತಂಕೊದ ಮಗೆ, ಬಂಗಾಳೊದ ಬಾಲೆ ನೇತಾಜಿ ಸುಭಾಷ್ ಚಂದ್ರ ಬೋಸ್ರೆನ ಕೊರ್ಪುಗೆ ಬಾರೀ ಮಲ್ಲವು. ಜನವರಿ 23 ಸುಭಾಷ್ ಚಂದ್ರ ಬೋಸ್ರೆನ ಪುಟ್ಟಿನ ದಿನೊ, ಆರೆನ ಪೊರ್ಮ್ಬಾಟೊದ ಬದ್ಕ್ನ್ ಅಂಬಲ್ತೊಂದು ಈ ಸರ್ತಿ ಆರೆನ 129 ನೇ ಜನ್ಮದಿನೊನು ಕರಿತೊಂದುಲ್ಲ. ಆತೇ ಅತ್ತಂದೆ ಈ ದಿನೊನು ‘ಪರಾಕ್ರಮ ದಿನೊ’ ಆದ್ ಆಚರಿಪುವೆರ್.
ಜವನೆರೆ ಉಡಲ್ಡ್ ಸೂ ಪೊತ್ತಾಯಿನಾರ್ ಸುಭಾಷ್ ಚಂದ್ರ ಬೋಸ್ ‘ಎಂಕ್ ನಿಕ್ಲೆನ ನೆತ್ತೆರ್ ಕೊರ್ಲೆ, ಏನ್ ನಿಕ್ಲೆಗ್ ಸ್ವಾತಂತ್ರ್ಯ ದೆಪ್ಪಾದ್ ಕೊರ್ಪೆ’ ಪನ್ಪಿನ ಘೋಷವಾಕ್ಯೊರ್ದೇ ಜವನೆರೆ ಉಡಲ್ಡ್ ಪೊರ್ಮ್ಬಾಟೊದ ಸೂ ಪೊತ್ತಾಯಿನಾರ್ ನೇತಾಜಿ ಸುಭಾಷ್ ಚಂದ್ರ ಬೋಸ್. ಭಾರತೀಯೆರೆನ್ ದೊಂಕುದು ಆಳ್ಯೊಂದಿತ್ತಿನ ಬ್ರಿಟಿಷೆರೆನ್ ಗಿಡಪೆರ ಮಿಲಿಟರಿ ಕಾರ್ಯಾಚರಣೆನೇ ಮಾಮಲ್ಲ ಅಸ್ತ್ರ ಪನ್ದ್ ನಂಬುದಿತ್ತೆರ್. ಅಂಚಾದ್ ಈ ಅಸ್ತ್ರೊರ್ದು ಮಾತ್ರ ಮಾತಲಾ ಸಾಧ್ಯ ಪನ್ದ್ ಎನ್ನ್ದಿತ್ತೆರ್. ಆ ಪ್ರಕಾರ ತನ್ನ ಪೊರ್ಮ್ಬಾಟೊದ ಸಾದಿಡ್ ಪಗತೆ ಕನತ್ದ್ ಬ್ರಿಟಿಷೆರೆ ವಿರುದ್ಧ ಅಂಕ ಸಾದಿಯೆರ್. ಸುಭಾಸ್ ಚಂದ್ರ ಬೋಸ್ರೆನ ಪೊರ್ಮ್ಬಾಟೊದ ಬದ್ಕ್ದ ಬಗೆಟ್ ಓದುನಗ ಕೇನ್ನಗ ಮೆಯಿ ಕೊಕ್ಕೇರುಂಡು.
ಭಾರತೊದ ತನ್ನಾಲ್ಮೆದ ಪೊರ್ಮ್ಬಾಟೊಗು ಬೋಸ್ ಕೊರ್ತಿನ ಕೊರ್ಪುಗೆಲೆಗ್ ಮಾನಾದಿಗೆ ಮಲ್ಪೆರ 2021 ಟ್ ಆರೆನ ಪುಟ್ಟಿನ ದಿನೊತಾನಿಯೇ ಪರಾಕ್ರಮ ದಿನೊನು ಕರಿಪೆರ ನಿರ್ಧಾರ ಮಲ್ತೆರ್. ಈ ದಿನೊನು ಕರಿಪುನೆತ ಮೂಲ ಉದ್ದೇಶ ತನ್ನಾಲ್ಮೆದ ಪೊರ್ಮ್ಬಾಟೊಡು ದೇಶೊಗು ಬೋಡಾದ್ ಮಲ್ದಿನ ತ್ಯಾಗೊನು ನನದ ತರೆಮಾರ್ಗ್ ಒರಿಪಾದ್ ತೆರಿಪಾವುನ ಆದುಂಡು.
