Last updated on January 23rd, 2026 at 04:09 pm
ಕಾರ್ಲ, ಜ. 23: ತಾಲೂಕ್ದ ಮಿಯಾರ್ ಕಂಬುಲಕ್ರಾಸ್ದ ಕೈತಲ್ ಇನಿ (ಜ.23) ಮಧ್ಯಾಹ್ನ ಪ್ರೈವೇಟ್ ಬಸ್ ಬೊಕ್ಕ ತೂಫಾನ್ ಗಾಡಿದ ನಡುಟು ನಡತಿನ ಭೀಕರ ಎಡ್ತೆಡ್ ಮೂವೆರ್ ಅಲ್ಪನೇ ತೀರ್ದಿತ್ತ್ದ್, ಆಜಿ ಜನೊಕು ಗಾತಿದ ಗಡಿಕುಲಾತಿನ ನಡಕೆ ನಡತ್ದ್ಂಡ್.
ಕುಡುಮರ್ದ್ ಕಾರ್ಲದಂಚಿ ಬರೊಂದಿತ್ತಿನ ಪ್ರೈವೇಟ್ ಬಸ್ ಒಂಜಿ ಮಿಯಾರ್ ಕಂಬುಲಕ್ರಾಸ್ ದ ಕೈತಲ್ ರಾಂಗ್ ಸೈಡ್ಡೆ ಪೊಗ್ಗುದುಂಡುಗೆ. ಈ ಪೊರ್ತುಡು ಕಾರ್ಲರ್ದ್ ಬೊಲ್ತೇರ್ ದಂಚಿ ಪೋವೊಂದಿತ್ತಿನ ತೂಫಾನ್ ಗಾಡಿಗ್ ಬಸ್ ಸೀದಾ ಎಡ್ತ್ದ್ಂಡ್. ಎಡ್ತೆದ ಬರಸ್ಗ್ ತೂಫಾನ್ ಗಾಡಿ ಅಲಕ್ಕ ಞಕ್ಕೆ ಆದಿತ್ತ್ದ್, ಐತುಲಯಿ ಇತ್ತಿನ ಪ್ರಯಾಣಿಕೆರ್ ಗಾಡಿದುಲಯಿ ತಿಕ್ಕ್ದ್ ಬೂರ್ದಿತ್ತೆರ್.
ಮಧ್ಯಾಹ್ನ ಸುಮಾರ್ 3.30ಕ್ಕ್ ನಡತಿನ ಈ ಎಡ್ತೆಡ್, ತೂಫಾನ್ ಗಾಡಿಡ್ ಇತ್ತಿನ ಮೂವೆರ್ ಪ್ರಯಾಣಿಕೆರ್ ತೀರ್ದೆರ್. ಗಾತಿದ ಗಡಿಕುಲಾತಿನ ಒರಿನ ಆಜಿ ಜನೊನು ಅಪಗನೇ ಕಾರ್ಲದ ಸರ್ಕಾರಿ ಆಸ್ಪತ್ರೆಗ್ ಬೊಕ್ಕ ಎಚ್ಚಿಗೆ ಮರ್ದ್ಗ್ ಮಣಿಪಾಲ ಆಸ್ಪತ್ರೆಗ್ ದಾಕಲ್ತ್ದೆರ್. ಗಡಿಕುಲಾತಿನೆಟ್ ಕೆಲ ಜನೊತ ಸ್ಥಿತಿ ಬಾರೀ ಸೀರಿಯಸ್ ಉಂಡು ಪನ್ದ್ ತೆರಿದ್ ಬೈದ್ಂಡ್.
ಎಡ್ತೆ ನಡತಿನೆಟ್ಟಿಗೆ ಮುಟ್ಟದಕುಲು ಬೊಕ್ಕ ಸಾದಿಯೆ ಪೋಪುನಕುಲು ರಕ್ಷಣಾ ಕಾರ್ಯೊಗು ಬೈದೆರ್. ಗಾಡಿದ ಉಲಯಿ ತಿಕ್ದ್ ಬೂರ್ದಿನಕ್ಲೆನ್ ಬಾರೀ ಬಂಙೊಡು ಪಿದಯಿ ದೆತ್ತ್ದ್ ಆಸ್ಪತ್ರೆಗ್ ಕಡಪುಡ್ರೆ ಸಕಾಯ ಮಲ್ದೆರ್. ಎಡ್ತೆರ್ದಾವರ ಮಿಯಾರ್ ಸಾದಿಡ್ ಒಂತೆ ಪೊರ್ತು ಟ್ರಾಫಿಕ್ ಜಾಮ್ ಉಂಡಾದಿತ್ತ್ಂಡ್.
ಕಾರ್ಲ ನಗರ ಪೊಲೀಸ್ ಸ್ಟೇಶನ್ದ ಸೀಮೆಡ್ ಈ ನಡಕೆ ನಡತಿತ್ತ್ದ್, ಪೊಲೀಸೆರ್ ಜಾಗೆಗ್ ಬತ್ತ್ದ್ ಪರಿಶೀಲನೆ ಮಲ್ತ್ದೆರ್. ಬಸ್ ಡ್ರೈವರ್ನ ಗೋಸ್ಮರಿಯೇ ಈ ಭೀಕರ ಎಡ್ತೆಗ್ ನೆವನ ಪನ್ದ್ ಪ್ರಾಥಮಿಕ ಜಡ್ತೆಡ್ ತೆರಿದ್ ಬೈದ್ಂಡ್.