Last updated on February 3rd, 2026 at 02:41 pm
ಬೆಳಗಾವಿ, ಫೆ. 03: ಅನೈತಿಕ ಸಂಬಂಧೊದ ವಿಚಾರೊಡು ಆಂಜೊವು ಒರಿಯಗ್ ಕತ್ತಿಡ್ ತಿಕ್ಕಿ ತಿಕ್ಕಿನಡೆ ಕಡ್ತ್ದ್ ಬರ್ಬರವಾದ್ ಕೆರ್ತಿನ ನಡಕೆ ಬೆಳಗಾವಿ ಜಿಲ್ಲೆದ ಸವದತ್ತಿ ತಾಲೂಕ್ದ ಹೂಲಿಕಟ್ಟಿಡ್ ನಡತ್ದ್ಂಡ್. ಸಡೋಣಿ ಗ್ರಾಮೊದ ಬಸಪ್ಪ ಹೊಸಮನಿ(51) ತೀರ್ದಿನಾಯೆ, ಈರಯ್ಯ ಮಠಪತಿ ಕೆರ್ತಿನ ಆರೋಪಿ. ಭೀಕರ ಕೊಲೆ ತೂದು ಇಡೀ ಊರ್ಗ್ ಊರೇ ಪೋಡಿದ್ ಪೋತುಂಡು.
10 ವರ್ಸೊಗು ದುಂಬು ಈರಯ್ಯನ ಅಪ್ಪೆನ ಒಟ್ಟುಗು ಬಸಪ್ಪೆ ಮಹಾರಾಷ್ಟ್ರೊದ ಕೊಲ್ಹಾಪುರಗ್ ಬಲ್ತ್ ಪೋದಿತ್ತೆ. ಆ ಪೊರ್ತುಡು ಆರೋಪಿ ಈರಯ್ಯಗ್ 18 ವರ್ಸ ಪ್ರಾಯ. ಪಾಕ ವರ್ಸ ಕರಿದ್, ಈರಯ್ಯನ ಅಪ್ಪೆನ್ ಕೊಲ್ಹಾಪುರಡ್ ಬುಡ್ದು ನಾಲ್ ದಿನೊಕು ಪಿರವು ಬಸಪ್ಪೆ ಊರುಗು ಬತ್ತಿತ್ತೆ. ಅವ್ವೇ ವಿಚಾರೊಡು ಪಗೆ ಸಾದ್ಯೊಂದಿತ್ತಿನ ಆರೋಪಿ ಈರಯ್ಯೆ, ಬಸಪ್ಪನ್ ತಾರಾಮರ ಕಡ್ತ್ದ್ ಕೆರ್ತೆ.
ಸವದತ್ತಿ ಪೊಲೀಸ್ ಸ್ಟೇಶನ್ ಸೀಮೆಡ್ ಪ್ರಕರಣ ನಡತ್ದ್ಂಡ್. ಬಸಪ್ಪ ಹೊಸಮನಿನ್ ಬರ್ಬರವಾದ್ ಕೆರಿಬೊಕ್ಕ ಸಿನಿಮಾ ಸ್ಟೈಲ್ಡ್ ಪುನತ ಮಿತ್ತ್ ಕಾರ್ ದೀದ್ ಆರೋಪಿ ಈರಯ್ಯೆನೇ ಪೊಲೀಸೆರೆಗ್ ಫೋನ್ ಮಲ್ತ್ದ್ ವಿಷಯ ತೆರಿಪಾದೆ. ಕೋಡೆ ಬಯ್ಯಡ್ ಬಸಪ್ಪನ್ ಅಡ್ಡಕಟ್ಟ್ದ್ 16 ಸರ್ತಿ ಕತ್ತಿಡ್ ಕಡ್ತ್ದಿತ್ತಿನ ಈರಯ್ಯೆ, ಪೊಲೀಸೆರ್ ಬರ್ಪಿನೇಟಲಾ ಪುನತ ಮಿತ್ತ್ ಕಾರ್ ದೀದ್ ಉತುದಿತ್ತೆಗೆ. ಪ್ರಕರಣೊಡು ಆರೋಪಿ ಈರಯ್ಯನ್ ಕೈದ್ ಮಲ್ದಿನ ಪೊಲೀಸೆರ್, ಜಡ್ತೆ ಮಲ್ತೊಂದುಲ್ಲೆರ್.