ಕಾಸ್ರೋಡ್: ಹಿಂಸಾಚಾರೊಗು ತಿರ್ಗಿನ ಪೊರ್ಮ್ಬಾಟ; ಕುಂಬ್ಳೆ ಆರಿಕ್ಕಾಡಿಡ್ ಟೋಲ್ ಗೆತೊನುನೆನ್ ಉಂತಾಂಡ್ ಕೇಂದ್ರ

Last updated on February 4th, 2026 at 10:31 am

ಕಾಸ್ರೋಡ್, ಫೆ. 04: ರಾಷ್ಟ್ರೀಯ ಪೆರ್ಸಾದಿದ ಕುಂಬ್ಳೆ ಆರಿಕ್ಕಾಡಿಡ್ ಟೋಲ್ ಶುಲ್ಕ ಗೆತೊನುನೆನ್ ಕೇಂದ್ರ ಸಾರಿಗೆ ಸಚಿವಾಲಯ ಉಂತಾದ್ಂಡ್. ನನದ 24 ಗಂಟೆ‌ದುಲಯಿ ಟೋಲ್ ಗೇಟ್ ಮುಚ್ಚುವ ಪನ್ದ್ ಪಾತೆರ ಕೊರ್ತೆರ್.

ಟೋಲ್ ಕಾಸ್ ಗೆತೊನುನೆತ ವಿರುದ್ಧವಾದ್ ಕರಿನ ಒಂಜಿ ತಿಂಗೊಲುರ್ದ್ ಪೊರ್ಮ್ಬಾಟ ನಡತೊಂದಿತ್ತ್ಂಡ್. ಪೊರ್ಮ್ಬಾಟ ಸಮಿತಿ ಕಟ್ಟೊಂದು ರೋಡ್‌ಡ್ ಪ್ರತಿಭಟನೆ ಮಲ್ಪುನೆತ ಒಟ್ಟುಗು ಕಾನೂನು ಪೊರ್ಮ್ಬಾಟೊಲಾ ನಡತೊಂದಿತ್ತ್ಂಡ್. ಟೋಲ್ ಕಾಸ್ ಗೆತೊನುನೆನ್ ಉಂತಾಯೆರ ಕೇಂದ್ರ ಸಾರಿಗೆ ಸಚಿವೆ ನಿತಿನ್ ಗಡ್ಕರಿ ರಾಷ್ಟ್ರೀಯ ಪೆರ್ಸಾದಿ ಪ್ರಾಧಿಕಾರೊಗು ನಿರ್ದೇಶನ ಕೊರ್ತೆರ್.

ಒಂಜಿ ಟೋಲ್ ಗೇಟ್ ರ್ದ್ ಕುಡೊಂಜೆಕ್ ಕಮ್ಮಿಡ್ 60 ಕಿ. ಮೀ ದೂರ ಇಪ್ಪೊಡು ಪನ್ಪಿ ಕೇಂದ್ರ ಸಾರಿಗೆ ಸಚಿವಾಲಯೊದ ನಿರ್ದೇಶನ ಪೊಲ್ತ್‌ದ್ ಕಾಲಿ 23 ಕಿ. ಮೀ ದೂರೊದ ಕುಂಬ್ಳೆ ಆರಿಕ್ಕಾಡಿಡ್ ಟೋಲ್ ಕಾಸ್ ಗೆತೊನ್ರ ಸುರು ಆದಿತ್ತ್ಂಡ್. ಉಂದೆತ ವಿರುದ್ಧ ಮಂಜೇಶ್ವರ ಶಾಸಕೆ ಎ.ಕೆ.ಎಂ ಅಶ್ರಫ್‌ರೆನ ಮುತಾಲಿಕೆಡ್ ಪೊರ್ಮ್ಬಾಟ ನಡತಿತ್ತ್ಂಡ್.

ರಾಜಕೀಯ ಪಕ್ಷೊಲು, ಸಂಘಟನೆಲೆನ ಮುತಾಲಿಕೆಡ್ ಟೋಲ್ ವಿರೋಧಿ ಪೊರ್ಮ್ಬಾಟ ಸಮಿತಿ ಮಲ್ತೊಂದು ಪೊರ್ಮ್ಬಾಟ ಮಲ್ತೊಂದು ಬತ್ತಿತ್ತ. ಈ ಪೊರ್ಮ್ಬಾಟ ಹಿಂಸಾತ್ಮಕ ರೂಪೊಗು ತಿರ್ಗೊಂದು ಬೈದ್ಂಡ. ಟೋಲ್ ಗೇಟ್‌ದ ಮಿತ್ತ್ ದಾಳಿ ಮಲ್ತ್‌ದ್, ಕ್ಯಾಮರಾ, ಬ್ಯಾರಿಕೇಡ್, ಗ್ಲಾಸ್‌ಲೆನ್ ಪೊಡಿ ಮಲ್ತ್‌ದ್ ಪಾಕ ಬಗೆತ ನಷ್ಟೊಗ್ಲಾ ನೆವನ ಆದಿತ್ತ್ಂಡ್. ಶಾಸಕೆರ್ ರಾತ್ರೆ ಪಗೆಲ್ ಧರಣಿ ಮಲ್ತಿತ್ತೆರ್. ದಿನಕರಿಲೆಕನೆ ಪರಿಸ್ಥಿತಿ ವಿಕೋಪಗ್ ಪೋವೊಂದಿತ್ತ್ಂಡ್.

ಬೊಕ್ಕ ಪೊಲೀಸೆರ್ ಧರಣಿ ಮಲ್ತೊಂದಿತ್ತಿನ ಶೆಡ್ ದೆಪ್ಪಾದ್ ಶಾಸಕೆ ಎ.ಕೆ.ಎಂ ಅಶ್ರಫ್ ಸೇರ್ದ್ ಪೊರ್ಮ್ಬಾಟ ಸಮಿತಿದ ಮುಖಂಡೆರೆನ್ ಕೈದ್ ಮಲ್ತೆರ್. ಸಿಪಿಎಂ ಮುಖಂಡೆ ಸಿ. ಎ ಜುಬೈರ್, ಕಾಂಗ್ರೆಸ್ ಮುಖಂಡೆ ಲಕ್ಷ್ಮಣ ಪ್ರಭು, ಅಶ್ರಫ್ ಕಾರ್ಲೆ ಇಂಚಿನ ನಾಯಕೆರ್ ಪೊರ್ಮ್ಬಾಟೊಗು ಜತ್ತಿತ್ತೆರ್.

ಟೋಲ್ ಶುಲ್ಕ ಗೆತೊನುನೆನ್ ಉಂತಾಯಿನ ಕೇಂದ್ರ ಸಾರಿಗೆ ಸಚಿವಾಲಯೊದ ತೀರ್ಮಾನೊಗು ಪೊರ್ಮ್ಬಾಟ ಸಮಿತಿ ಕುಂಬ್ಳೆಡ್ ವಿಜಯೋತ್ಸವ ಮಲ್ತ್ಂಡ್. ಸಮಿತಿ ಕರಿನ ರಡ್ಡ್ ತಿಂಗೊಲುರ್ದಿಂಚಿ ಮಲ್ತೊಂದು ಬೈದಿನ ಪೊರ್ಮ್ಬಾಟೊಗು ತಿಕ್ಕಿನ ಗೆಲ್ಮೆ ಪನ್ದ್ ಶಾಸಕೆ ಎ.ಕೆ.ಎಂ ಅಶ್ರಫ್ ಬೊಕ್ಕ ಸಿ. ಎ ಜುಬೈರ್ ಪ್ರತಿಕ್ರಿಯೆ ಕೊರ್ತೆರ್. ಬಿಜೆಪಿ ಕೇಂದ್ರೊದ ನಿರ್ಧಾರೊನು ಎದುಕೊಂದಿತ್ತ್‌ದ್, ಜಿಲ್ಲಾಧ್ಯಕ್ಷೆದಿ ಎಂ.ಎಲ್ ಅಶ್ವಿನಿ ಕೇಂದ್ರ ಸಚಿವೆ ನಿತಿನ್ ಗಡ್ಕರಿ ಮೆರೆಗ್ ಅಭಿನಂದನೆ ಸಂದಾದ್, ಬಿಜೆಪಿದ ಮುತಾಲಿಕೆಡ್ ಮೆರವಣಿಗೆ ಮಲ್ತೆರ್.