Last updated on February 4th, 2026 at 11:57 am
ಬೆಂಗಳೂರು ಫೆ. 04: ಧರ್ಮಸ್ಥಳ ಗ್ರಾಮೊಡು 1990ರ್ದ್ 2021ತ ನಡುಟು ನಡತ್ದ್ಂಡ್ ಪನ್ಪಿನ 74 ಅಸಹಜ ಸಾವು ಪ್ರಕರಣೊಲೆನ ಬಗೆಟ್ ಈತ್ನೇಟ ಗೆತೊಂದಿನ ಕ್ರಮೊಕ್ಲೆನ ಬಗೆಟ್ ರಡ್ಡ್ ವಾರೊದುಲಯಿ ವಿವರಣೆ ಕೊರೊಡು ಪನ್ದ್ ಸರ್ಕಾರೊಗು ಹೈಕೋರ್ಟ್ ನಿರ್ದೇಶನ ಕೊರ್ತುಂಡು.
ಸೌಜನ್ಯಾನ ಅಪ್ಪೆ ಕುಸುಮಾವತಿ ಸಂದಾದಿನ ಸಾರ್ವಜನಿಕ ಹಿತಾಸಕ್ತಿ ಅರ್ಜಿನ್ ಮುಖ್ಯ ನ್ಯಾಯಮೂರ್ತಿ ವಿಭು ಬಖು ಮೆರೆನ ಮುತಾಲಿಕೆದ ವಿಭಾಗೀಯ ನ್ಯಾಯಪೀಠ ಅಂಗಾರೆ ವಿಚಾರಣೆ ಮಲ್ತ್ಂಡ್. ಸರ್ಕಾರೊದ ಪರ ಅಡ್ವಕೇಟ್ ಜನರಲ್ ಕೆ. ಶಶಿಕಿರಣ್ ಶೆಟ್ಟಿ, ಈ ಅರ್ಜಿ 74 ಪ್ರಕರಣೊಲೆನ ವಿಚಾರ ಆದುಂಡು, ವಾ ಪ್ರಕರಣ ವಾ ನಿಲವುಡು ಉಂಡು, ಈತ್ನೇಟ ಎಂಚಿನ ಆತ್ಂಡ್ ಪನ್ಪಿನ ಬಗೆಟ್ ಒಲವು ಗೆತೊಂದು ನ್ಯಾಯಂತಡೆಕ್ ಪತ್ತ ವಿವರ ಕೊರ್ನ ಪನ್ದ್ ಪನ್ಡೆರ್.
ಅರ್ಜಿದಾರೆರೆ ಪರ ಪೆರಿಯ ವಕೀಲೆ ಎಸ್.ಬಾಲನ್, ಮಾತಾ 74 ಪ್ರಕರಣೊಲು ಗಂಭೀರ ಸ್ವರೂಪೊದ ಪ್ರಕರಣೊಲು. ಜಡ್ತೆ ಆವೊಡು ಪನ್ದ್ ಪನ್ಡೆರ್. ಪ್ರತಿಕ್ರಿಯೆ ಕೊರ್ತಿನ ಪೀಠ, ಅವೆಕ್ ದುಂಬು ಸರ್ಕಾರೊರ್ದು ಒಲವು ಬರಡ್ ಪನ್ದ್ ಪನ್ಡ್ನ್ಡ್. ಬೊಕ್ಕ ಅರ್ಜಿಡ್ ಪ್ರಸ್ತಾಪ ಮಲ್ದಿನ ಪ್ರಕರಣೊಲೆನ ಇತ್ತೆದ ವಸ್ತುಸ್ಥಿತಿ, ಕ್ರಮೊಕುಲು ಬೊಕ್ಕ ನನ ಗೆತೊನೊಡು ಪನ್ದ್ ಇಪ್ಪುನ ಕ್ರಮೊಕ್ಲೆನ ಬಗೆಟ್ ರಡ್ಡ್ ವಾರೊಡು ವಿವರಣೆ ಕೊರ್ಯೆರ ಸರ್ಕಾರೊಗು ನಿರ್ದೇಶನ ಕೊರ್ತಿನ ಪೀಠ, ವಿಚಾರಣೆನ್ ಫೆಬ್ರವರಿ 19ಗ್ ಎದುರು ಪಾಡ್ದ್ಂಡ್. ಈ ಪೊರ್ತುಡು ಅರ್ಜಿದ ಬಗೆಟ್ ರಾಜ್ಯ ಸರ್ಕಾರೊಗು ನೋಟಿಸ್ ಜಾರಿಮಲ್ತ್ದ್ ವಿಚಾರಣೆನ್ ಎದುರು ಪಾಡ್ದ್ಂಡ್.