Last updated on February 4th, 2026 at 02:54 pm
ಕುಡ್ಲ, ಫೆ. 4: ಮಂಗಳೂರು (ದ.ಕ.) ಜಿಲ್ಲೆಡ್ ನನ ದುಂಬಗ್ ಪ್ರತಿ ಒಂಜಿ ಅಂಗಡಿ, ಹೋಟೆಲ್, ಕಚೇರಿ ಬೊಕ್ಕ ಕಂಪೆನಿಲೆನ ಪುದರ್ ಪಲವೆಲು ಕನ್ನಡೊಡೇ ಇಪ್ಪೊಡು ಪನ್ದ್ ಜಿಲ್ಲಾಧಿಕಾರಿ ದರ್ಶನ ಎಚ್.ವಿ. ಸ್ಪಷ್ಟ ಆದೇಶ ಕೊರ್ದಿತ್ತ್ದ್, ಟ್ರೇಡ್ ಲೈಸೆನ್ಸ್ ಕೊರ್ನಗನೇ ಕನ್ನಡೊದ ಪಲವೆ ಇಪ್ಪುನೆನ್ ದೃಢ ಮಲ್ತೊನರೆ ಸ್ಥಳೀಯ ಸಂಸ್ಥೆಲೆಗ್ ಸೂಚನೆ ಕೊರ್ತೆರ್.
ಜಿಲ್ಲಾಧಿಕಾರಿ ಕಚೇರಿಡ್ ನಡತಿನ ಜಿಲ್ಲಾ ಕನ್ನಡ ಜಾಗೃತಿ ಸಮಿತಿ ಸಭೆಟ್ ಪಾತೆರ್ನ ಆರ್, ಕನ್ನಡ ಭಾಷೆದ ಗಲಕೆ ಸಾರ್ವಜನಿಕ ಜಾಗೆಲೆಡ್ ಎಚ್ಚ ಆವೊಡು ಪನ್ದ್ ಪನ್ಡೆರ್. ಗ್ರಾಮ ಪಂಚಾಯತ್ ಬೊಕ್ಕ ನಗರ ಸ್ಥಳೀಯ ಸಂಸ್ಥೆಲು ಪಲವೆಲೆನ್ ಸಮ ಪರಿಶೀಲನೆ ಮಲ್ಪೊಡು ಪನ್ದ್ ಆರ್ ಸೂಚನೆ ಕೊರ್ತೆರ್.
ಬ್ಯಾಂಕ್, ಬಸ್, ಶಾಲೆಲೆಗ್ಲಾ ಸೂಚನೆ
ಅಂಗಡಿಲು ಮಾತ್ರ ಅತ್ತಂದೆ, ಬ್ಯಾಂಕ್ಲ್ ಅರ್ಜಿ ನಮೂನೆಲೆನ್ ಕನ್ನಡೊಡು ಕೊರೊಡು. ಪ್ರೈವೇಟ್ ಬಸ್ಲೆಡ್ ಜಾಗೆದ ಪುದರ್ ಕನ್ನಡೊಡು ಇಪ್ಪೊಡು. ಇಂಗ್ಲಿಷ್ ಮೀಡಿಯಂ ಶಾಲೆಲು ಬೊಕ್ಕ ಕಾಲೇಜ್ಲೆನ ಪಲವೆಡ್ಲಾ ಕನ್ನಡೊಡು ಪುದರ್ ಕಡ್ಡಾಯವಾದ್ ಬೋಡೂ. ಪೇಂಟೆದ ಮಾಲ್ಲೆನ ಅಂಗಡಿಲೆಗ್ಲಾ ಉಂದೇ ನಿಯಮ ಅನ್ವಯ ಆಪುಂಡು.
ಸಭೆಟ್ ತೋಜಿದ್ ಬತ್ತಿನ ಬೇತೆ ಸಮಸ್ಯೆಲು
ಸಭೆಟ್ ಕನ್ನಡ ಮೀಡಿಯಂ ಶಾಲೆಲು ಮುಚ್ಚೊಂದುಪ್ಪುನು, ಶಿಕ್ಷಕೆರೆ ಕುಂದೆಲ್ ಬೊಕ್ಕ ಗ್ರಾಮೀಣ ಪ್ರದೇಶೊದ ಬ್ಯಾಂಕ್ಲೆಡ್ ಕನ್ನಡೊ ಪಾತೆರುನ ಸಿಬ್ಬಂದಿ ಇಜ್ಜಂದಿನ ಸೇರ್ದ್ ಪಾಕ ಸಮಸ್ಯೆಲೆನ್ ಪ್ರಸ್ತಾಪ ಮಲ್ತೆರ್.
ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ ಅಧ್ಯಕ್ಷೆ ಡಾ. ಎಂ.ಪಿ. ಶ್ರೀನಾಥೆ ಕುಡ್ಲ ಪೇಂಟೆಡ್ ಕನ್ನಡ ಭವನ ಕಟ್ಟೆರೆ ಜಾಗೆ ದೆತ್ತ್ದ್ ದೀಯೆರೆ ಸರ್ಕಾರೊಗು ಬಿನ್ನಪು ಮಲ್ತೆರ್. ಈ ಕ್ರಮೊರ್ದು ಜಿಲ್ಲೆಡೊರ್ಮೆ ಕಾಲಿ 9% ಜನೊತ ಮಾತೃಭಾಷೆ ಆಯಿನ ಕನ್ನಡೊದ ಗಲಕೆ ಎಚ್ಚ ಮಲ್ಪುನ ಪುನೆಪು ಬರೊಂದುಲ್ಲೆರ್.
ಎಂಕ್ಲೆನ ಮಿತ್ತ್ ಭಾಷೆದ ಪುದೆ ತುಂಬಾವೊರ್ಚಿ- ತುಳುವೆರೆ ಪಿಸ್ರ್
ತುಳುನಾಡ ಮಂಗಳೂರು ಜಿಲ್ಲೆಡ್ ಇಂಚ ಒಂಜಿ ಬಾಸೆನ್ ಮಾತೆರ್ನ ಮಿತ್ತ್ ತುಂಬಾವುನ ಪಾಕ ಜನೊತ ಪಿಸ್ರ್ಗ್ ನೆವನ ಆತ್ಂಡ್. ಎನ್ನ ಅಂಗಡಿಗ್ ಎಂಕ್ ಬೋಡಾಯಿಲೆಕ ಪುದರ್ ಬರೆದ್ ಪಾಡುವೆ ಪನ್ದ್ ಕೆಲ ಅಂಗಡಿಲೆನ ದನಿಕುಲು ಪನ್ಡೊನ್ದೆರ್. ಸೋಷಿಯಲ್ ಮೀಡಿಯಾಡ್ ಈ ಬಗೆಟ್ ಚರ್ಚೆ ಜೋರಾತ್ಂಡ್. ಕನ್ನಡೊದ ಜಿಲ್ಲೆಲೆಡ್ ಮಲ್ಪಂದಿನ ಕಾನೂನುಲೆನ್ ಮುಲ್ಪ ದಾಯೆ ಕನಪರ್ ಪನ್ದ್ ಜನ ಕೇನೊಂದುಲ್ಲೆರ್.