Last updated on February 4th, 2026 at 04:35 pm
ದಿನೊಕು ರಡ್ಡ್ ಸರ್ತಿ ಕೂಲಿ ದೆಕ್ಕ್ಂಡಲಾ, ಪಾಕ ಜನ ಬಾಯಿದ ವಾಸನೆದ ಸಮಸ್ಯೆರ್ದ್ ಪಿದಯಿ ಬರ್ರೆ ಬಂಙ ಬರೊಂದುಪ್ಪೆರ್. ಬಾಯಿದ ಆರೋಗ್ಯ, ನೈರ್ಮಲ್ಯೊಗು ಗೇನ ಕೊರ್ಜಿಂಡ ಇಂಚ ಬಾಯಿ ವಾಸನೆ ಬರ್ಪುಂಡು. ಉಂದು ಎಚ್ಚಿನಕ್ಲೆಗ್ ನಾಲ್ ಜನೊತ ಎದುರು ಪೊಕ್ಕಡೆ ಉಂಡು ಮಲ್ಪುಂಡು. ಉಂದೆಕ್ ಬೋಡಾದ್ ಮೌತ್ ಕ್ಲೀನರ್ಲೆನ್ ಗಲಸುವೆರ್. ಆಂಡ ಮೌತ್ಕ್ಲೀನರ್ಲೆನ್ ಲೆಕ್ಕೊರ್ದು ಎಚ್ಚ ಗಲಸುನಲಾ ಎಡ್ಡೆ ಅತ್ತ್. ಅವೆತ ಪಗತೆಗ್ ನಮ್ಮ ಅಡ್ಪಿಲ್ಲ್ಡೇ ತಿಕ್ಕುನ ಸೊತ್ತುಲೆನ ಸಕಾಯೊಡು ಬಾಯಿದ ವಾಸನೆದ ಸಮಸ್ಯೆನ್ ದೂರ ಮಲ್ಪೊಲಿ. ಆ ಮರ್ದ್ಲ್ ಒವ್ವು ಪನ್ಪಿನ ಒಲವು ಮುಲ್ಪ ಉಂಡು.
ಪುದೀನ: ಬಾಯಿದ ದುರ್ವಾಸನೆನ್ ದೂರ ಮಲ್ಪೆರ ಪದೀನಾ ಬಾರೀ ಎಡ್ಡೆ ಮರ್ದ್. ಉಂದೆಕ್ ಪುದೀನದ ಇರೆನ್ ನೀರ್ಡ್ ಕೊದಿಪಾದ್, ಆ ನೀರ್ಡ್, ದಿನೊಕು ಮೂಜಿ ಸರ್ತಿ ಬಾಯಿ ಮುಕುಲ್ಪೊಡು. ಒಂತೆ ದಿನೊಟೇ ಬಾಯಿದ ವಾಸನೆ ಪೋಪುಂಡು. ಉಂದು ಮಾತ್ರ ಅತ್ತಂದೆ ಪುದೀನಾದ ಇರೆನ್ ಅಗ್ಗಿದ್ಲಾ ಬಾಯಿದ ವಾಸನೆ ದೂರ ಮಲ್ಪೊಲಿ.
ಶುಂಠಿ: ಬಾಯಿದ ವಾಸನೆನ್ ಗಿಡಪೆರ, ಒಂಜಿ ಲೋಟೆ ನೀರ್ಗ್ ಶುಂಠಿ ರಸ ಗೋಡ್ಯಾದ್ ಬಾಯಿ ಮುಕುಲ್ಪೊಡು. ದಿನೊಕು ಮೂಜಿ ಸರ್ತಿ ಕಾಂಡೆ, ಮಧ್ಯಾಹ್ನ ಬೊಕ್ಕ ಬಯ್ಯಡ್ ಈ ನೀರ್ಡ್ ಬಾಯಿ ಮುಕುಲ್ತ್ಂಡ ಬಾಯಿದ ವಾಸನೆ ಪೋಪುಂಡು.
ಲವಂಗ ಅತ್ತ್ಂಡ ಸೋಂಪು: ಲವಂಗ ಬೊಕ್ಕ ಸೋಂಪುಡು ನಂಜಿನಿರೋಧಕ ಗುಣ ಇತ್ತ್ದ್, ಬಾಯಿಡ್ ವಾಸನೆ ಉಂಡು ಮಲ್ಪುನ ಬ್ಯಾಕ್ಟೀರಿಯಾಲೆನ್ ಕಮ್ಮಿ ಮಲ್ಪೆರೆ ಸಕಾಯ ಮಲ್ಪುಂಡು.
ಸಿಟ್ರಸ್ ಪರ್ನ್ದ್ಲ್: ಚಿತ್ತ್ಪುಲಿ ಅತ್ತ್ಂಡ ಲಿಂಬೆದಂಚಿನ ಸಿಟ್ರಸ್ ಪರ್ನ್ದ್ಲು ಬಾಯಿಡ್ ಬ್ಯಾಕ್ಟೀರಿಯಾ ಬುಲೆಪುನೆನ್ ಉಂತಾಯೆರ ಸಕಾಯ ಮಲ್ಪುವ. ಇಂದೆಕ್, 1 ಟೀಚಮ್ಚ ಲಿಂಬೆ ಅತ್ತ್ಂಡ ಚಿತ್ತ್ಪುಲಿತ ರಸೊಕು ಒಂತೆ ಉಪ್ಪು ಪಾಡ್ದ್, ಅವೆನ್ ಬಾಯಿಡ್ ದೀವೊಂದು ಬೊಕ್ಕ ಉಬಿಯೊಡು, ಉಂದು ಬಾಯಿದ ದುರ್ವಾಸನೆನ್ ದೂರ ಮಲ್ಪುಂಡು.
ದಾಸೆಮಿದೆಣ್ಣೆ ಬೊಕ್ಕ ಉಪ್ಪು: ದಾಸೆಮಿದೆಣ್ಣೆನ್ ಒಂಜಿ ಬೊಟ್ಟು ಉಪ್ಪುದೊಟ್ಟುಗು ಕಲತ್ದ್ ನಿಜ್ಜಿಗ್ ಮಸಾಜ್ ಮಲ್ಪುನೆರ್ದ್ ಬಾಯಿದ ವಾಸನೆ ಕಮ್ಮಿ ಆಪುಂಡು. ಒರೊರ, ಕುರಿನ ನಿಜ್ಜಿಲಾ ಬಾಯಿದ ವಾಸನೆಗ್ ನೆವನ ಆದುಪ್ಪು. ಅಂಚಿನ ಪೊರ್ತುಡು, ಒಂತೆ ದಿನ ಈ ಮಸಾಜ್ ಮಲ್ತ್ಂಡ ಬಾಯಿದ ವಾಸನೆ ದೂರ ಮಲ್ಪೊಲಿ.
ನಾಲಾಯಿ ಕ್ಲೀನ್ ಮಲ್ತೊನ್ಲೆ:
ಎಚ್ಚಿನ ಜನೊಕುಲು ಕೂಲಿ ದೆಕ್ಕುವೆರ್, ಆಂಡ ನಾಲಾಯಿದ ಸ್ವಚ್ಛತೆದ ಬಗೆಟ್ ಗೋಸ್ಮರಿ ಮಲ್ಪುವೆರ್. ಅಂಚಾದ್ ಕುರ್ತೆಲ್ ಬೊಕ್ಕ ಬ್ಯಾಕ್ಟೀರಿಯಾಲು ಅಂಚೆನೇ ಒರಿದ್ ಪೋಪ. ಉಂದು ಬಾಯಿದ ವಾಸನೆಗ್ ಮಲ್ಲ ನೆವನ. ಅಂಚಾದ್, ನಾಲಾಯಿದ ಅಗ್ರ ದೆತ್ತೊಂದು ಕ್ಲೀನ್ ಮಲ್ತೊಂದುಪ್ಪುಲೆ.
ಈತ್ ಮಾತ್ರ ಅತ್ತಂದೆ ಜೂವೊಗು ಬೋಡಾಯಿನಾತ್ ನೀರ್ ಪರ್ಲೆ ಬೊಕ್ಕ ದಾಲ ತಿನ್ದಿನೇ, ವನಸ್ ಮಲ್ತಿನೇ ಬಾಯಿ ಮುಕುಲ್ಪುನ ಅಭ್ಯಾಸ ಬುಲೆಪಾವೊನ್ಲೆ.