Last updated on February 10th, 2026 at 12:35 pm
ಬೋಲ್ತೇರ್, ಫೆ. 10: ಬೋಲ್ತೇರ್ಡ್ ಕೋಡೆ ಬಾರೀ ಸುದ್ದಿ ಆದಿತ್ತಿನ ಪಿಯುಸಿ ಕಲ್ತೊಂದಿತ್ತಿನ ಪೊಣ್ಣನ ಕಿಡ್ನಾಪ್ ಪ್ರಕರಣೊಡು ಇತ್ತೆ ಟ್ವಿಸ್ಟ್ ತಿಕ್ಕ್ದಿತ್ತ್ದ್, ಪೊಣ್ಣು ಕಿಡ್ನಾಪ್ದ ನಾಟಕ ಮಲ್ತ್ದಲ್ ಪನ್ದ್ ಪೊಲೀಸೆರ್ ನಾಡ್ದ್ ಪತ್ತ್ದೆರ್.
ಕಾಶಿಬೊಟ್ಟು ಸರ್ಕಾರಿ ಕಾಲೇಜ್ಗ್ ಸ್ಕೂಟರ್ಡ್ ಪೋವೋಂದಿತ್ತಿಪ ಎನನ್ ಕಾರ್ಡ್ ಅಡ್ಡಕಟ್ಟಿನ, ಮೋನೆಗ್ ಕುಂಟು ಕಟೊಂದಿನ ಮೂವೆರ್ ಸುದೆಮುಗೇರ್ ಪನ್ಪಿನಲ್ಪ ಕಿಡ್ನಾಪ್ ಮಲ್ಪೆರ ತೂತೆರ್, ಈ ಪೊರ್ತುಡು ಎನ್ನ ಕೈಕ್ ಬೀಸತ್ತಿಡ್ ಕೊಯ್ತೆರ್ ಪನ್ದ್ ಜವನ್ದಿ ಒಯಿಲ್ ಬರೆಪಾದಿತ್ತ್ದ್, ಬೋಲ್ತೇರ್ ಸರ್ಕಾರಿ ಆಸ್ಪತ್ರೆಗ್ ದಾಕಲಾದಿತ್ತಲ್. ಈ ನಡಕೆ ಬಾರೀ ಸುದ್ದಿ ಮಲ್ತಿನೆರ್ದಾವರ ಬೋಲ್ತೇರ್ ಶಾಸಕೆ ಹರೀಶ್ ಪೂಂಜೆರ್ ಬೊಕ್ಕ ಪೊಲೀಸೆರ್ ಆಸ್ಪತ್ರೆಗ್ ಪೋದು ಆರೋಗ್ಯ ವಿಚಾರಿತಿನ ಅತ್ತಂದೆ ನಡಕೆದ ಬಗೆಟ್ ಒಲವುಲಾ ಗೆತೊಂದೆರ್.
ಪ್ರಕರಣ ದಾಕಲಾವೊಂದಿತ್ತಿನೇ ಇಡೀ ದಿನ ಪೊಲೀಸೆರೆ ಕೂಟ ಕಾರ್ಯಾಚರಣೆ ಮಲ್ತಿತ್ತ್ಂಡ್, ಪೊಲೀಸೆರ್ ಅಲ್ಪದ ಸಿಸಿಟಿವಿ ದೃಶ್ಯೊಲೆನ ಆಧಾರೊಡು ಜಡ್ತೆ ಸುರು ಮಲ್ತಿತ್ತೆರ್. ಪೊಲೀಸೆರೆಗ್ ಸಾಂದರ್ಭಿಕ ಸಾಕ್ಷ್ಯೊಲು ತಿಕ್ಕಂದೆ ಇತ್ತಿನೆರ್ದಾವರ ಪೊಣ್ಣಡ ಎಚ್ಚಿಗೆ ಒಲವು ತೆರಿಯೊನರ ಆಲೆನ ವಿಚಾರಣೆ ಮಲ್ತಿತ್ತೆರ್.
ಈ ಪೊರ್ತುಡು ತಾನಾ ಕುಡ್ಲದ ಕಾಲೇಜ್ ಸೇರ್ಯೆರ ಕಿಡ್ನಾಪ್ದ ಕತೆ ಕಟ್ಟ್ದಿನೆನ್ ಒತ್ತೊಂದಲ್. ಗ್ರಾಮೀಣ ಭಾಗೊದ ಕಾಲೇಜ್ ಬೂಡ್ದು ಕುಡ್ಲ ಪೇಂಟೆದ ಕಾಲೇಜ್ಗ್ ಪೋಯೆರ ಇಷ್ಟ ಇತ್ತ್ಂಡ್, ಐಕ್ ಬೋಡಾದ್ ಯಾನೇ ಬ್ಲೇಡ್ ಡ್ ಕೈ ಕೊಯ್ಯೊನ್ದೆ ಪನ್ದ್ ತೆರಿಪಾದಲ್. ಈತ್ ಮಾತ್ರ ಅತ್ತಂದೆ, ತನ್ನ ಇಲ್ಲದ ಕೈತಲೇ ಮಸ್ತಿರೆಲೆನ್ ಪೊತ್ತದ್ ಪಾಡ್ದ್, ತನ್ನ ಬ್ಯಾಗ್ನ್ ಕಿಡ್ನಾಪ್ ಮಲ್ಪೆರ ಬತ್ತಿನಕುಲು ಪತೊಂದು ಪೋತೆರ್ ಪನ್ದ್ ಕತೆ ಕಟ್ಟ್ದಿತ್ತಲ್. ಪೊಣ್ಣನ ಈ ಪಾತೆರೊಡು ಪೊಲೀಸೆರೆಗೇ ಶಾಕ್ ಆತ್ಂಡ್.
ಬೋಲ್ತೇರ್ಧ ಕಿಡ್ನಾಪ್ ಪ್ರಕರಣ ಭಾರೀ ಸಂಚಲನ ಉಂಡು ಮಲ್ತಿತ್ತ್ಂಡ್, ಪೆರಿಯ ಪೊಲೀಸ್ ಅಧಿಕಾರಿಲು ಕುಡ್ಲಗ್ ಬತ್ತ್ದ್ ಒಲವು ಗೆತೊಂದಿತ್ತೆರ್. ಆಂಡ ಪೊಣ್ಣನ ಕಿಡ್ನಾಪ್ ಡ್ರಾಮಾಗ್ ಪೊಲೀಸೆರ್ ಪಾಪ ತಿರ್ಗ್ದ್ ತಿರ್ಗ್ದ್ ಬಚ್ಚಿದ್ ಪೋತೆರ್.