Last updated on February 16th, 2026 at 03:51 pm
ನೆಲ್ಯಾಡಿ, ಫೆ. 16: ನೆಲ್ಯಾಡಿ ಗ್ರಾಮೊದ ಕೊಪ್ಪಮಾದೇರಿ ನಿವಾಸಿ ಕೆ. ಸಿ. ವರ್ಗೀಸ್ (73) ಪನ್ಪಿನಾರೆನ ಸಾವು ಕೊಲೆ ಪನ್ದ್ ದೃಢ ಆತಿನೆರ್ದಾವರ ಉಬಾರ್ ಪೊಲೀಸೆರ್ ಪ್ರಕರಣ ದಾಕಲ್ತೊಂದೆರ್. ತೀರ್ದಿನಾರೆನ ತರೆಕ್ ಬೊಕ್ಕ ಮೆಯಿಟ್ ಬೇತೆ ಕಡೆಟ್ ಬಲೊತ ಪೆಟ್ಟ್ ಬೂರ್ದಿನವು ಜಡ್ತೆಡ್ ತೆರಿದ್ ಬೈದ್ಂಡ್.
ಈ ಪ್ರಕರಣೊಡು ತೀರ್ದಿನಾರೆನ ಮಗೆ ಸೇರ್ದ್ ಮೂವೆರೆನ್ ಪೊಲೀಸೆರ್ ಉಲಕೈ ಮಲ್ತೊಂದೆರ್. ಕೈದಾತಿನಕ್ಲೆನ್ ಕಡಬ ತಾಲೂಕ್ ನೆಲ್ಯಾಡಿ ನಿವಾಸಿ, ವರ್ಗೀಸ್ ಮೆರೆನ ಮಗೆ ಕೆ. ವಿ. ಥಾಮಸ್ ಅಲಿಯಾಸ್ ವಿಲ್ಸನ್, ಬೋಲ್ತೇರ್ ತಾಲೂಕ್ ಅರಸಿನಮಕ್ಕಿ ನಿವಾಸಿ ಸಿ. ಟಿ. ರಾಜು ಅಲಿಯಾಸ್ ವರ್ಗೀಸ್ ಬೊಕ್ಕ ನೆಲ್ಯಾಡಿದ ಚಾಕೊಚ್ಚ ಪನ್ದ್ ಗುರ್ತ ಪತ್ತ್ದೆರ್.
ಸುಮಾರ್ ಆಜಿ ದಿನೊಕು ದುಂಬು ಈ ನಡಕೆ ನಡತಿತ್ತ್ಂಡ್. ಈ ಬಗೆಟ್ ಕೆ. ವಿ. ಥಾಮಸೇ ಉಬಾರ್ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದಿತ್ತೆ. ಪೊಲೀಸೆರ್ ಜಾಗೆಗ್ ಬತ್ತ್ದ್ ಮಹಜರ್ ಮಲ್ತಿನತ್ತಂದೆ, ವಿಧಿವಿಜ್ಞಾನ ಕೂಟೊಲಾ ಜಾಗೆ ಪರಿಶೀಲನೆ ಮಲ್ತಿತ್ತ್ಂಡ್.
ಪುನೊತ ಮರಣೋತ್ತರ ಪರೀಕ್ಷೆನ್ ದೇರಳಕಟ್ಟೆದ ಕೆ. ಎಸ್. ಹೆಗ್ಡೆ ಆಸ್ಪತ್ರೆಡ್ ಮಲ್ತಿತ್ತೆರ್. ಹಲ್ಲೆದ ಪೊರ್ತುಡು ತರೆಕ್ ಆತಿನ ಗಾತಿದ ಗಡಿಕುಲೆರ್ದಾವರನೇ ವರ್ಗೀಸ್ ತೀರ್ದೆರ್ ಪನ್ದ್ ಬೈದ್ಯೆರ್ ವರದಿ ಮಲ್ತ್ದೆರ್. ಎಚ್ಚಿಗೆ ಜಡ್ತೆ ಮಲ್ತಿನ ಪೊರ್ತುಡು ಉಂದು ಕೊಲೆ ಪನ್ದ್ ಸಾಬೀತಾತ್ಂಡ್. ಅಂಚಾದ್ ಪೊಲೀಸೆರ್ ಕೊಲೆ ಪ್ರಕರಣ ದಾಕಲ್ತೊಂದು ನನದ ಜಡ್ತೆ ಮಲ್ತೊಂದುಲ್ಲೆರ್.