Last updated on February 18th, 2026 at 01:36 pm
ಕುಡ್ಲ, ಫೆ.18: ತುಳುನಾಡ ದೈವಾರಾಧನೆಡ್ ಗಗ್ಗರ ಸೇವೆಗ್ ಬಾರೀ ಪ್ರಾಮುಖ್ಯತೆ ಉಂಡು. ಆಂಡ ಮುಲ್ಪ ಒರಿ ದೈವ ನರ್ತಕಗ್ ಗಗ್ಗರ ಕಟ್ಟೆರೆ ಕಾರೇ ಇಜ್ಜಿ. ಇತ್ತೆ ಕಾಸ್ರೋಡ್ದ ಪೆರ್ಮುದೆ ಗ್ರಾಮೊದ ಪೆರಿಯ ದೈವ ನರ್ತಕೆ ಬಾಬು (53 ವರ್ಷ) ಮೆರೆಗ್ ಮಂಗಳೂರು ಸೆಂಟ್ರಲ್ ರೋಟರಿ ಸಂಸ್ಥೆ ಮಾನವೀಯತೆದ ನಿಲೆಟ್ ಪೊಸ ಬದ್ಕ್ ಕೊರ್ತುಂಡು. ಬಾಬಣ್ಣೆ ಪಾಕ ವರ್ಸೊರ್ದಿಂಚಿ ದೈವ ನರ್ತಕೆರಾದ್ ಚಾಕಿರಿ ಮಲ್ತ್ದೆರ್. ಆಂಡ, ಶುಗರ್ ಎಚ್ಚ ಆದ್ ಆರೆನ ದತ್ತ ಕಾರ್ಗ್ ‘ಗ್ಯಾಂಗ್ರೀನ್’ ಆದಿತ್ತ್ಂಡ್. ಪರಿಸ್ಥಿತಿ ಅಂಕೆ ತತ್ತ್ದ್ ಕಡೆಕ್ ಬೈದ್ಯೆರ್ ಆರೆನ ಕಾರ್ನೇ ಕುತ್ಪೊಡಾದ್ ಬತ್ತ್ಂಡ್.
ಕಾರ್ ಕಲೆವೊಂದು ಆರ್ಥಿಕ ಬಂಙೊಡು ಇತ್ತಿನ ಬಾಬು ಮೇರ್ ರೋಟರಿ ಮಾಜಿ ಜಿಲ್ಲಾ ಗವರ್ನರ್ ಬೊಕ್ಕ ಪುಗರ್ತೆದ ಡಾಕ್ಟರ್ ಡಾ. ದೇವದಾಸ್ ರೈ ಮೆರೆನಡೆ ಪೋದು ಸಕಾಯ ಮಲ್ಪೆರೆ ಕೇನ್ದಿತ್ತೆರ್. ಬಾಬಣ್ಣನ ಬಂಙೊದ ಸ್ಥಿತಿನ್ ತೂದು ಡಾ. ರೈ ಮೇರ್ ರೋಟರಿ ಕ್ಲಬ್ ಮಂಗಳೂರು ಸೆಂಟ್ರಲ್ದ ಸಮಾಜ ಸೇವಾ ಯೋಜನೆದ ಅಡಿಟ್ ಸುಮಾರ್ 2.10 ಲಕ್ಷ ರೂಪಾಯಿ ಮೌಲ್ಯೊದ ಕೃತಕ ಕಾರ್ ಮಂಜೂರ್ ಮಲ್ಪಾದೆರ್.
ಇಂಚಿಪ ಕುಡ್ಲದ ಡಾ. ದೇವದಾಸ್ ರೈ ಮೆರೆನ ‘ಸೌರಭ್’ ಚಿಕಿತ್ಸಾಲಯೊಡು ನಡತಿನ ಲೇಸ್ಡ್ ಬಾಬು ಮೆರೆಗ್ ಕೃತಕ ಕಾರ್ ತಿಕ್ಕಾದೆರ್. ಈ ಪೊರ್ತುಡು ರೋಟರಿ ಕಾರ್ಯದರ್ಶಿ ವಿಕಾಸ್ ಕೋಟ್ಯಾನ್, ಮಾಜಿ ಅಧ್ಯಕ್ಷೆ ಸಂತೋಷ್ ಶೆಟ್ ಬೊಕ್ಕ ಮಾಧ್ಯಮ ಸಲಹೆಗಾರೆ ಎಂ.ವಿ. ಮಲ್ಯೆರ್ ಒತ್ತುಪಾಲ್ ಇತ್ತೆರ್. ಇತ್ತೆ ಬಾಬು ಒವ್ವೇ ತಾಂಗ್ದಾಂತೆ ಸುಸೂತ್ರವಾದ್ ನಡತೊಂದಿತ್ತ್ದ್, ತನ್ಕ್ ಕುಡೊಂಜಿ ಜೂವ ಕೊರ್ನ ರೋಟರಿ ಸಂಸ್ಥೆಗ್ ಬುಡು ಉಡಲ್ದ ಸೊಲ್ಮೆ ಸಂದಾದೆರ್.