Last updated on March 2nd, 2026 at 05:58 pm
ಆನೇಕಲ್, ಮಾ. 02: ಬೊಡೆದಿನ್ ಕೆರ್ದ್ ಬೊಕ್ಕ ತಾನ್ಲಾ ಬಲ್ಲ್ ಪಾಡೊಂದು ಆಂಜೊವು ಒರಿ ಆತ್ಮಹತ್ಯೆ ಮಲ್ತೊಂದಿನ ನಡಕೆ ಬೆಂಗಳೂರು ನಗರ ಜಿಲ್ಲೆದ ಆನೇಕಲ್ ತಾಲೂಕ್ದ ಹೀಲಲಿಗೆಡ್ ನಡತ್ದ್ಂಡ್. ಮೋಕೆ ಮಲ್ತ್ದ್ ಮದಿಮೆ ಆದಿತ್ತಿನ ಒಡಿಶಾ ಮೂಲೊದ ಮಂಜುಳಾನ್ ಕೆರ್ದ್ ದೀಪಂತ್ ತಾನ್ಲಾ ಜೂವ ಗೆತ್ತೊಂದೆರ್. ದಂಪತಿ ಬೊಮ್ಮಸಂದ್ರದ ಪ್ರೈವೇಟ್ ಕಂಪೆನಿಡ್ ಬೇಲೆ ಮಲ್ತೊಂದಿತ್ತೆರ್. ಕರಿನ ಬುಧವಾರ ಒವ್ವಾ ಎಲ್ಯ ನೆವನೊಗು ದಂಪತಿಲು ಲಡಯಿ ಮಲ್ತೊಂದೆರ್. ಗಲಾಟೆ ವಿಕೋಪಗ್ ಪೋದು ಮಂಜುಳಾ ಗ್ ದೀಪಂತ್ ಆಕ್ದೆ. ಆಕಿನ ಪೆಟ್ಟ್ಗ್ ಮಂಜುಳಾನ ಜೂವ ಪೋತುಂಡು. ಬೊಕ್ಕ ಪುನೊತ ಎದುರು ಬುಲಿತೊಂದು ವಿಡಿಯೋ ಮಲ್ತಿನ ದೀಪಂತ್, ಮಂಜುಳಾ ನ ಮುಂಡೊಗು ಕುಂಕುಮ ದೀತೆ. ಬೊಕ್ಕ ಒಡಿಯಾ ಭಾಷೆಡ್ ಡೆತ್ನೋಟ್ ಬರೆದ್ ದೀದ್ ಆಯೆಲಾ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದೆ.
ರಡ್ಡ್ ದಿನ ಕರಿದ್ ಅನುಮಾನ ಬತ್ತ್ದ್ ಇಲ್ಲ್ದ ದನಿ ಕಂಡಿಡೆ ತೂನಗ ಮಂಜುಳಾ ಬೊಕ್ಕ ದೀಪಂತ್ ಇರ್ವೆರ್ಲಾ ಸೈದ್ ಬೂರ್ದಿನ ತೋಜಿದ್ ಬೈದ್ಂಡ್. ಜಾಗೆಗ್ ಸೂರ್ಯನಗರ ಪೊಲೀಸೆರ್ ಬತ್ತ್ದ್ ಪರಿಶೀಲನೆ ಮಲ್ತ್ದೆರ್. ಪುನೊಕ್ಲೆನ್ ಮರಣೋತ್ತರ ಪರೀಕ್ಷೆಗ್ ಕಡಪುಡ್ದೆರ್. ಕರಿನ ಶುಕ್ರವಾರೊನೇ ಇಲ್ಲದ ದನಿ ಈ ಬಗೆಟ್ ಪೊಲೀಸೆರೆಗ್ ಒಲವು ಕೊರ್ದಿತ್ತ್ದ್, ಪ್ರಕರಣ ಕಡೆಸ್ಸ್ದ್ ಬೊಲ್ಪುಗು ಬೈದ್ಂಡ್.