Last updated on March 2nd, 2026 at 03:12 pm
ಕುಡ್ಲ, ಮಾ. 02: ಕರಿನ 5 ವರ್ಸೊಡು ಮಂಗಳೂರು, ಹಾಸನ ಬೊಕ್ಕ ಗುಲ್ಬರ್ಗಾ ಜಿಲ್ಲೆಲೆಡ್ ಮಾತೆರ್ದ್ ಎಚ್ಚ ಕ್ಯಾನ್ಸರ್ ಪ್ರಕರಣೊಲು ತಿಕ್ಕ್ದ. ಲೋಕಸಭೆತ ಡೇಟಾದ ಪ್ರಕಾರ ರಾಜ್ಯೊಡೊರ್ಮೆ ಮಲ್ಲ ಮಟ್ಟ್ಡ್ ಚೆಕಪ್ ಮಲ್ತ್ಂಡಲಾ, ಪಾಕ ಜಿಲ್ಲೆಲೆಡ್ 0 ವರದಿಲು ಇತ್ತ್ದ್ ರೋಗನಿರ್ಣಯೊಡು ಬಾರೀ ಎಚ್ಚಿಕಮ್ಮಿ ತೋಜಿದ್ ಬೈದ್ಂಡ್.
2020-21 ಬೊಕ್ಕ 2024-25 ದ ನಡುಟು ಮಂಗಳೂರು ಜಿಲ್ಲೆಡ್ ಒಟ್ಟು 3,432 ಬಾಯಿ, ದೊಂಡೆ ಬೊಕ್ಕ ಸ್ತನ ಕ್ಯಾನ್ಸರ್ ಪ್ರಕರಣೊಲು ದಾಕಲಾತ. ಅವ್ವೇ ಪೊರ್ತುಡು ಗುಲ್ಬರ್ಗಾಡ್ 3,397 ಅಂಚೆನೇ ಹಾಸನಡ್ 2,436 ಪ್ರಕರಣೊಲು ದಾಕಲಾತ.
ಮಂಗಳೂರು ಜಿಲ್ಲೆದ ಡೇಟಾ ವರ್ಸೊರ್ದು ವರ್ಸ ಕ್ಯಾನ್ಸರ್ ಪ್ರಕರಣೊಲು ಎಚ್ಚ ಆವೊಂದಿತ್ತಿನೆನ್ ತೋಜಾವೊಂದುಂಡು. 2022–23ಟ್, ಪರೀಕ್ಷೆ ಮಲ್ದಿನ 16,41,913 ಜನೊಟು 18 ಪ್ರಕರಣೊಲು ತಿಕ್ಕ್ದ, ಉಂದು 2023–24ಟ್ 41,088 ಸ್ಕ್ರೀನಿಂಗ್ಲೆಡ್ 67 ಪ್ರಕರಣೊಲೆಗ್ ಏರ್ದ್ಂಡ್. 2024–25ಟ್ 70,033 ಸ್ಕ್ರೀನಿಂಗ್ಲೆಡ್ 3,328 ಪ್ರಕರಣೊಲು ತಿಕ್ಕ್ದ. ಗುಲ್ಬರ್ಗಾ ಡ್, 2021–22ಟ್ 1,112 ಬೊಕ್ಕ 2022–23ಟ್ 2,073 ಪ್ರಕರಣೊಲು ತಿಕ್ಕ್ದ, ಬೊಕ್ಕ 2023–24ಟ್ 182 ರ್ದ್ 2024–25ಟ್ 30 ಗ್ ಒರಾನೆ ಜತ್ತ್ದ್ಂಡ್. ಹಾಸನಡ್ ಸುರುಟು ಕಮ್ಮಿ ಪ್ರಕರಣೊಲು ಇತ್ತ, ಉಂದು 2023–24ಟ್ 2,224 ಕ್ ಏರ್ದ್ಂಡ್, ಬೊಕ್ಕ 2024–25 ಟ್ 99 ಪ್ರಕರಣೊಲೆಗ್ ಜತ್ತ್ದ್ಂಡ್.
ಐನ್ ವರ್ಸೊಡು ಗಮನಾರ್ಹ ಪ್ರಕರಣೊಲು ತಿಕ್ಕಿನ ಬೇತೆ ಜಿಲ್ಲೆಲು: ಬೆಳಗಾವಿ- 849; ಕೋಲಾರ- 844; ತುಮಕೂರು- 538; ಹಾವೇರಿ- 463; ಚಿಕ್ಕಮಗಳೂರು- 1,648
2024–25 ಟ್ ಮಾತ್ರ, ಮಂಗಳೂರು ಜಿಲ್ಲೆಡ್ ಬಾರೀ ಎಚ್ಚ 3,328 ಪ್ರಕರಣೊಲು, ಕೋಲಾರಡ್ 402 ಬೊಕ್ಕ ದಾವಣಗೆರೆಟ್ 189 ಪ್ರಕರಣೊಲು ದಾಕಲಾತ. ಬಾಗಲಕೋಟೆಡ್ 168 ಪ್ರಕರಣೊಲು, ತುಮಕೂರುಡ್ 117 ಬೊಕ್ಕ ಹಾಸನಡ್ 99 ಪ್ರಕರಣೊಲು ವರದಿ ಆತ. 2020–21 ರ್ದ್ 2024–25ತ ನಡುಟು, ಬೆಂಗಳೂರ್ಡ್ ಒಟ್ಟು 13,91,301 ಜನೊನು ಪರೀಕ್ಷೆ ಮಲ್ತಿನೆಟ್ 292 ಕ್ಯಾನ್ಸರ್ ಪ್ರಕರಣೊಲು ತಿಕ್ಕ್ದ.
ಪಾಕ ಜಿಲ್ಲೆಲೆಡ್ ಮಲ್ಲ ಮಟ್ಟ್ಡ್ ತಪಾಸಣೆ ಮಲ್ತ್ಂಡಲಾ, ಬಾರೀ ಕಮ್ಮಿ ಅತ್ತ್ಂಡ ಶೂನ್ಯ ಪ್ರಕರಣ ವರದಿ ಆತ್ಂಡ್. ಯಾದಗಿರಿ ಬೊಕ್ಕ ಚಾಮರಾಜನಗರೊಡು ಕ್ರಮೊಟು ಸುಮಾರ್ 50,000 ಬೊಕ್ಕ 84,000 ಜನೊನು ಪರೀಕ್ಷೆ ಮಲ್ತ್ದೆರ್, ಆಂಡ ಒಂಜೇ ಒಂಜಿ ಪ್ರಕರಣ ತಿಕ್ಕ್ದಿಜಿ. ವಿಜಯಪುರ ಬೊಕ್ಕ ಕೊಡಗುಡ್ ರಡ್ಡ್ ರಡ್ಡ್, ಮಂಡ್ಯಡ್ ಮೂಜಿ ಬೊಕ್ಕ ಒಡಿಪು ಬೊಕ್ಕ ಬಳ್ಳಾರಿಡ್ ನಾಲ್ ನಾಲ್ ಪ್ರಕರಣೊಲು ವರದಿ ಆತ.
ಲೋಕಸಭೆತ ಈ ಡೇಟಾಡ್ ಬಾರೀ ಅಸಮಾನ ಪಾಲ್ಲ್ ಇಪ್ಪುನೆರ್ದಾವರ, ಅವುಲಾ ಬರಿಬರಿಟೇ ಇಪ್ಪುನ ಮಂಗಳೂರು ಬೊಕ್ಕ ಒಡಿಪುಡ್ ಅಲಕ್ಕ ಬೇತೆ ಬೇತೆ ಫಲಿತಾಂಶ ಇಪ್ಪುನವು ಬಾರೀ ಸೋದ್ಯ ಉಂಡುಮಲ್ದ್ಂಡ್.