Last updated on March 5th, 2026 at 10:10 am
ಬಂಟ್ವಾಳ,ಮಾ. 05: ಫರಂಗಿಪೇಂಟೆದ 10 ನೇ ಮೈಲ್ ಕಲ್ಲ್ದ ಕೈತಲ್ ನೇತ್ರಾವತಿ ಸುದೆತ ಕರೆಟ್ ಆಧಾರ್ ಕಾರ್ಡ್ಲೆನ ರಾಶಿ ತಿಕ್ಕ್ದಿತ್ತ್ದ್, ಜನೊಕ್ಲೆಡ ಅನುಮಾನ ಅಂಚೆನೇ ಆತಂಕ ಉಂಡು ಮಲ್ದ್ಂಡ್.
ವರದಿಲೆನ ಪ್ರಕಾರ, ಅಂಗಾರೆ ಬಯ್ಯಡ್, ನೆಟೆದಾರ್ ಒರಿ ಸುದೆಟ್ ಪಾಕ ಆಧಾರ್ ಕಾರ್ಡ್ಲು ಪಾಂಬೊಂದುಪ್ಪುನೆನ್ ತೂದು ಅಪಗನೇ ಗ್ರಾಮ ಪಂಚಾಯತ್ ಅಧಿಕಾರಿಲೆಗ್ ಒಲವು ಕೊರ್ತೆರ್. ಬೊಕ್ಕ, ಗ್ರಾಮ ಪಂಚಾಯತ್ ಅಧ್ಯಕ್ಷೆ ರಮ್ಲಾನ್ ಮಾರಿಪಳ್ಳ ಬೊಕ್ಕ ಬೇತೆ ಅಧಿಕಾರಿಲು ಜಾಗೆಗ್ ಬತ್ತ್ದ್ ಆ ಆಧಾರ್ ಕಾರ್ಡ್ಲೆನ್ ಪರಿಶೀಲನೆ ಮಲ್ತ್ದೆರ್.
ಆ ಪೊರ್ತುಡು ಆಧಾರ್ ಕಾರ್ಡ್ಲೆಡ್ ಪುದು ಗ್ರಾಮೊದಕ್ಲೆನ ಪುರಪು ಇತ್ತಿನ ತೋಜಿದ್ ಬತ್ತಿತ್ತ್ದ್, ಅಧಿಕೃತ ದಾಕಲೆಲು ಸುದೆಕ್ ಎಂಚ ಬತ್ತ ಪನ್ಪಿನ ಬಗೆಟ್ ಗಂಭೀರ ಪ್ರಶ್ನೆಲೆನ್ ಪುಟ್ಟಾದ.
ಈ ವಿಷಯೊಡು ಪಾತೆರ್ನ ಗ್ರಾಮ ಪಂಚಾಯತ್ ಅಧ್ಯಕ್ಷೆರ್, ಪಾಕ ಗ್ರಾಮಸ್ಥೆರ್ ತನ್ಕುಲೆ ಆಧಾರ್ ಕಾರ್ಡ್ಲೆನ ತಿದ್ದುಪಡಿ ಬೊಕ್ಕ ರಿನೀವಲ್ಗ್ ಅರ್ಜಿ ಪಾಡ್ದೆರ್ ಬೊಕ್ಕ ಪೊಸ ಕಾರ್ಡ್ ಟಪಾಲ್ಡ್ ಬರ್ಪುಂಡು ಪನ್ದ್ ಕಾತ್ದ್ ಕಾತ್ದ್, ಕಡೆಸ್ಸ್ಂಡ್ ಪನ್ದ್ ಪಾಕ ಜನ ಅಕ್ಲೆನ ಅಗತ್ಯೊಗು ಬೋಡಾದ್ ಸೈಬರ್ ಸೆಂಟಲ್ಲೆರ್ದ್ ಕಾಪಿ ಗೆತೊಂದೆರ್ ಪನ್ದ್ ವರದಿ ಆತ್ಂಡ್. ಆಧಾರ್ ಕಾರ್ಡ್ಲು ಬತ್ತ್ದಿತ್ತ್ಂಡಲಾ, ಅವೆನ್ ಫಲಾನುಭವಿಲೆಗ್ ಪಟ್ಟಂದೆ, ದಾಯೆ ದಕ್ಕ್ದೆರ್? ಪನ್ದ್ ಪರೋಕ್ಷವಾದ್ ಅಂಚೆ ಇಲಾಖೆದ ಮಿತ್ತ್ ಆರೋಪ ಮಲ್ತ್ದೆರ್.
ಸುದೆಟ್ ಆಧಾರ್ ಕಾರ್ಡ್ಲು ತಿಕ್ಕ್ದಿನ ಪಾಕ ಅನುಮಾನೊಲೆಗ್ ನೆವನ ಆತ್ಂಡ್. ಸಂಬಂಧಿತಿನ ಅಧಿಕಾರಿಲು ಕಾರ್ಡ್ಲೆನ್ ಎತ್ತಾದಿಜೆರಾ ಅತ್ತ್ ದಾಖಲೆಲು ಸೀದಾ ಸುದೆಕೇ ಎಂಚ ಬತ್ತ ಪನ್ಪಿನೆನ್ ಪತ್ತ ತೆರಿಯೊನರೆ ಸಮಗ್ರ ಜಡ್ತೆ ಆವೊಡು ಪನ್ದ್ ಊರ್ದಕುಲು ಒತ್ತಾಯ ಮಲ್ತ್ದೆರ್.