ಕರ್ನಾಟಕ ರಾಜ್ಯೊದ ರಡ್ಡನೇ ಅಧಿಕೃತ ಭಾಷೆ ಆದ್ ತುಳು: ಆಂಧ್ರಪ್ರದೇಶಡ್ ಅಧ್ಯಯನ ಮಲ್ತಿನ ಸಮಿತಿದ ವರದಿ ಸಂದೈತೊ

Last updated on March 5th, 2026 at 10:39 am

ಬೆಂಗಳೂರ್, ಮಾ. 05: ತುಳುನ್ ಕರ್ನಾಟಕೊದ ರಡ್ಡನೇ ಅಧಿಕೃತ ಭಾಷೆ ಆದ್ ಘೋಷಣೆ ಮಲ್ಪುನ ಪ್ರಸ್ತಾಪದ ಲೆಕ್ಕೊಡು, ಆಂಧ್ರಪ್ರದೇಶೊಡು ಉರ್ದುನ್ ಎಚ್ಚಿಗೆದ ಅಧಿಕೃತ ಭಾಷೆ ಘೋಷಣೆ ಮಲ್ಪುನ ಪೊರ್ತುಡು ಮಲ್ತಿನ ಬೇಲೆಲೆನ ಅಧ್ಯಯನೊಗು ಬೋಡಾದ್ ಸರ್ಕಾರ ಉಂಡು ಮಲ್ತಿತ್ತಿನ ಸಮಿತಿ ತನ್ನ ವರದಿನ್ ಸರ್ಕಾರೊಗು ಸಂದಾದ್ಂಡ್.

ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಅಪಗದ ಡೈರೆಕ್ಟರ್ ಕೆ.ಎಂ. ಗಾಯತ್ರಿ ಮೆರೆನ ಗುರ್ಕಾರ್ಮೆಡ್, ಕರ್ನಾಟಕ ಯಕ್ಷಗಾನ ಅಕಾಡೆಮಿದ ಪದುಕೆ ಜಿ.ವಿ.ಎಸ್. ಉಳ್ಳಾಲ್ ಮೆರೆನ ಒತ್ತುಪಾಲ್‌ಡ್ ಆಜಿ ಜನ ಪದುಕೆರೆನ ಸಮಿತಿ ಉಂಡು ಮಲ್ತಿತ್ತೆರ್.

ಸಮಿತಿ ಜನವರಿ 19 ಬೊಕ್ಕ 20ದಾನಿ ಆಂಧ್ರಪ್ರದೇಶ ರಾಜ್ಯೊದ ಸಚಿವಾಲಯ ಬೊಕ್ಕ ಬೇತೆ ಬೇತೆ ಇಲಾಖೆಲು ಅಂಚೆನೇ ಕಚೇರಿಲೆಗ್ ಪೋದು, ಅಲ್ಪ ಉರ್ದು ಭಾಷೆನ್ ರಡ್ಡನೇ ಅಧಿಕೃತ ಭಾಷೆ ಆದ್ ಘೋಷಣೆ ಮಲ್ಪುನ ಪೊರ್ತುಡು ಅನುಸರಿತಿನ ವಿಧಿವಿಧಾನೊಲು ಬೊಕ್ಕ ಆಡಳಿತಾತ್ಮಕ ಮಾನದಂಡೊಲೆನ ಬಗೆಟ್ ವಿವರವಾಯಿನ ಅಧ್ಯಯನ ಮಲ್ತ್ಂಡ್.

ಅಧ್ಯಯನೊರ್ದು ಬೊಕ್ಕ ಮಲ್ದಿನ ವರದಿನ್ ವಿಕಾಸ ಸೌಧೊಡು ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಕಾರ್ಯದರ್ಶಿ ಜೆ. ಮಂಜುನಾಥ್ ಮೆರೆಗ್ ಸಮಿತಿದ ಪದುಕೆರ್ ಅಧಿಕೃತವಾದ್ ಕೋಡೆ ಸಂದಾಯೆರ್. ವರದಿದ ಒಟ್ಟುಗು ತುಳು ಭಾಷೆದ ಇತಿಹಾಸ, ಸಾಂಸ್ಕೃತಿಕ ಪಿರನಿಲೆ ಬೊಕ್ಕ ಭಾಷಾ ವೈಶಿಷ್ಟ್ಯೊಲೆನ ಬಗೆಟ್ ಸಮಗ್ರ ಪ್ರಸ್ತಾವನೆನ್ಲಾ ಗೋಡ್ಯಾದೆರ್.

ಈ ಪೊರ್ತುಡು ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ನಿರ್ದೇಶಕೆ ಡಾ. ಬಿ.ಎಸ್. ಮಂಜುನಾಥ ಸ್ವಾಮಿ, ಅಧ್ಯಯನ ಸಮಿತಿದ ಪದುಕೆರಾಯಿನ ಯಕ್ಷಗಾನ ಅಕಾಡೆಮಿದ ಜಿ.ವಿ.ಎಸ್. ಉಳ್ಳಾಲ್ (ಸುಧಾಕರ್ ಶೆಟ್ಟಿ ), ಕಾನೂನು ಇಲಾಖೆದ ಉಪಕಾರ್ಯದರ್ಶಿ ಶ್ರೀಮತಿ ವನಿತಾ, ಸಿಬ್ಬಂದಿ ಬೊಕ್ಕ ಆಡಳಿತ ಸುಧಾರಣಾ ಇಲಾಖೆದ ಉಪಕಾರ್ಯದರ್ಶಿ ಮೂರ್ತಿ ಕೆ.ಎನ್., ಅಧೀನ ಕಾರ್ಯದರ್ಶಿ ಶ್ರೀಮತಿ ಕೆ.ಎಂ. ಶುಭಶ್ರೀ, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಅಧ್ಯಕ್ಷೆ ತಾರಾನಾಥ ಗಟ್ಟಿ ಬೊಕ್ಕ ಕರ್ನಾಟಕ ಸಾಹಿತ್ಯ ಅಕಾಡೆಮಿ ರಿಜಿಸ್ಟ್ರಾರ್ ಕರಿಯಪ್ಪ ಎನ್. ಒತ್ತುಪಾಲ್ ಇತ್ತೆರ್.

ತುಳು ಭಾಷೆಗ್ ಅಧಿಕೃತ ಮಾನಾದಿಗೆ ತಿಕ್ಕುನ ಸಾದಿಡ್ ಈ ವರದಿ ಮಲ್ಲ ಪಜ್ಜೆ ಪನ್ದ್ ಪನೊಂದುಲ್ಲೆರ್.