Last updated on March 5th, 2026 at 11:10 am
ಕೊಲ್ಕತ್ತಾ, ಮಾ. 05: ಈಡನ್ ಗಾರ್ಡನ್ಸ್ ಮೈದಾನೊಡು ನಡತಿನ ಟಿ20 ವಿಶ್ವಕಪ್ದ ಸುರುತ ಸೆಮಿಫೈನಲ್ ಗೊಬ್ಬುಡು ಸೌತ್ ಆಫ್ರಿಕಾದ ಎದುರು ನ್ಯೂಝಿಲೆಂಡ್ ಗೆಂದ್ದ್ಂಡ್. ಈ ಗೊಬ್ಬುಡು ಸುರುಕು ಬ್ಯಾಟಿಂಗ್ ಮಲ್ತಿನ ಸೌತ್ ಆಫ್ರಿಕಾ 20 ಓವರ್ಡ್ 169 ರನ್ ಒಟ್ಟು ಮಲ್ತ್ಂಡ್. ಈ ಈಡ್ನ್ ಬೆರಿಪತ್ತಿನ ನ್ಯೂಝಿಲೆಂಡ್ ಪರ ಫಿನ್ ಅಲೆನ್ ಸ್ಫೋಟಕ ಶತಕ ಆಕ್ಯೆರ್. ಈ ಶತಕೊದ ಸಕಾಯೊಡು ನ್ಯೂಝಿಲೆಂಡ್ 12.5 ಓವರ್ಡ್ ಈಡ್ ಮುಟ್ಟ್ದ್ 9 ವಿಕೆಟ್ದ ಮಲ್ಲ ಗೆಲ್ಮೆನ್ ತನ್ನ ಪುದರ್ಗ್ ಬರೆದ್ ಫೈನಲ್ಗ್ ಏರ್ದ್ಂಡ್.
ಟಿ20 ವಿಶ್ವಕಪ್ದ ಸುರುತ ಸೆಮಿಫೈನಲ್ ಗೊಬ್ಬುಡು ಮೆಂಚಿ ದಕ್ಕಿಲೆಕ ಸೆಂಚುರಿ ಮಲ್ತಿನ ನ್ಯೂಝಿಲೆಂಡ್ದ ಬ್ಯಾಟರ್ ಫಿನ್ ಅಲೆನ್ (Finn Allen) ಪೊಸ ಇತಿಹಾಸ ಬರೆತೆರ್. ಸೌತ್ ಆಫ್ರಿಕಾದ ಎದುರು ಮಲ್ತಿನ ಈ ಶತಕೊದ ಒಟ್ಟುಗು ಪಾಕ ವಿಶ್ವ ದಾಖಲೆಲೆನ್ಲಾ ಮಲ್ತ್ದೆರ್. ಆ ಮಾತಾ ದಾಖಲೆಲೆನ ಪಟ್ಟಿ ಇಂಚ ಉಂಡು…
- ಬಾರೀ ಬೀಸದ ಶತಕ: ಟಿ20 ವಿಶ್ವಕಪ್ ಪರತಿರಿಟೇ ಬಾರೀ ಬೀಸದ ಶತಕ ಮಲ್ತಿನ ದಾಕಲೆ ಫಿನ್ ಅಲೆನ್ ನ ಪಾಲಾತ್ಂಡ್. ಉಂದೆಕ್ ದುಂಬು ಈ ದಾಕಲೆ ಕ್ರಿಸ್ ಗೇಲ್ (47 ಬಾಲ್) ರೆನ ಪುದರ್ಡ್ ಇತ್ತ್ಂಡ್. ಇತ್ತೆ ಕಾಲಿ 33 ಬಾಲ್ಡ್ ಶತಕ ಮಲ್ತ್ದ್ ಆಲೆನ್ ವಿಶ್ವ ದಾಕಲೆನ್ ತನ್ನ ಪುದರ್ಗ್ ಮಲ್ತೊಂದೆರ್.
- ಸುರುತ ಸೆಂಚುರಿ: ಟಿ20 ವಿಶ್ವಕಪ್ ಪರತಿರಿಟೇ ಸೆಮಿಫೈನಲ್ಡ್ ಸೆಂಚುರಿ ಮಲ್ತಿನ ವಿಶ್ವೊದ ಕಡೀರ ಬ್ಯಾಟರ್ ಪನ್ಪಿ ಪುದರ್ಲಾ ಫಿನ್ ಅಲೆನ್ ಮಲ್ತೆರ್.
- ಬಾರೀ ಬೀಸದ ಅರ್ಧಶತಕ: ಟಿ20 ವಿಶ್ವಕಪ್ದ ನಾಕೌಟ್ ಗೊಬ್ಬುಡು ಬಾರೀ ಬೀಸದ ಅರ್ಧಶತಕ ಮಲ್ತಿನ ದಾಕಲೆನ್ ಅಲೆನ್ ಮಲ್ತೆರ್. ಉಂದೆಕ್ ದುಂಬು ಈ ದಾಕಲೆ ಯುವರಾಜ್ ಸಿಂಗ್ (20 ಬಾಲ್) ರೆನ ಪುದರ್ಡ್ ಇತ್ತ್ಂಡ್. ಇತ್ತೆ ಕಾಲಿ 19 ಬಾಲ್ಡ್ 50 ರನ್ ಮಲ್ತ್ದ್ ಮಲ್ಲ ದಾಕಲೆ ಬರೆತೆರ್.
- ಬಾರೀ ಬೀಸದ ಟಿ20 ಶತಕ: ಐಸಿಸಿ ಪೂರ್ಣ ಸದಸ್ಯ ರಾಷ್ಟ್ರೊದ ಎದುರು 35 ಬಾಲ್ಡ್ ಶತಕ ಮಲ್ತ್ದ್ ದಾಕಲೆ ಬರೆದಿತ್ತಿನ ರೋಹಿತ್ ಶರ್ಮಾ ಬೊಕ್ಕ ಡೇವಿಡ್ ಮಿಲ್ಲರ್ ಮೊಕಲೆನ ವಿಶ್ವ ದಾಕಲೆನ್ ಫಿನ್ ಅಲೆನ್ 33 ಬಾಲ್ಡೇ ಮಾಜಾದೆರ್.
- ಮಾತೆರೆರ್ದ್ ಎಚ್ಚ ಸಿಕ್ಸರ್: ಟಿ20 ವಿಶ್ವಕಪ್ ಪರತಿರಿಟೇ ಒಂಜಿ ಸೀಸನ್ಡ್ ಮಾತೆರೆರ್ದ್ ಎಚ್ಚ ಸಿಕ್ಸ್ ಆಕಿನ ವಿಶ್ವ ದಾಕಲೆನ್ಲಾ ಅಲೆನ್ ತನ್ನ ಪುದರ್ಗ್ ಮಲ್ತೊಂದೆರ್. ಈ ಸರ್ತಿದ ಟೂರ್ನಿಡ್ ಒಟ್ಟು 20 ಸಿಕ್ಸರ್ ಆಕುನ ಮುಕೇನ ಶಿಮ್ರಾನ್ ಹೆಟ್ಮೇಯರ್ (19 ಸಿಕ್ಸರ್) ನ ದಾಕಲೆನ್ ಪೊಲ್ತ್ದೆರ್.
- ಸ್ಫೋಟಕ ಶತಕ: ನ್ಯೂಝಿಲೆಂಡ್ ಪರ ಬಾರೀ ಬೀಸದ ಟಿ20 ಶತಕ ಮಲ್ತಿನ ದಾಕಲೆಲಾ ಇತ್ತೆ ಫಿನ್ ಅಲೆನ್ನ ಪುದರ್ಗ್ ಆತ್ಂಡ್. ಉಂದೆಕ್ ದುಂಬು ಈ ದಾಖಲೆ ಗ್ಲೆನ್ ಫಿಲಿಪ್ಸ್ (46 ಬಾಲ್) ನ ಪುದರ್ಡ್ ಇತ್ತ್ಂಡ್.
- ಬೌಂಡರಿಲೆನ ದಾಕಲೆ: ಈ ಗೊಬ್ಬುಡು ಫಿನ್ ಅಲೆನ್ ಒಟ್ಟು 18 ಬೌಂಡರಿಲೆನ್ (10 ಫೋರ್ ಬೊಕ್ಕ 8 ಸಿಕ್ಸರ್) ಆಕ್ದೆರ್. ಈ ಮುಕೇನ ಟಿ20 ವಿಶ್ವಕಪ್ ಇನಿಂಗ್ಸ್ಡ್ ಮಾತೆರೆರ್ದ್ ಎಚ್ಚ ಬೌಂಡರಿ ಆಕ್ದಿನ ಬ್ರೆಂಡನ್ ಮೆಕಲಮ್ (18) ರೆನ ವಿಶ್ವ ದಾಕಲೆದ ಸಮೊಕು ಬತ್ತ್ದೆರ್.
- 88 ರನ್ಲೆನ ದಾಕಲೆ: ಈ ಗೊಬ್ಬುಡು ಫಿನ್ ಅಲೆನ್ ಸಿಕ್ಸ್-ಫೋರ್ದ ಮುಕೇನ ಮಲ್ತಿನ ಒಟ್ಟು ಸ್ಕೋರ್ 88. ಈ ಮುಕೇನ ಟಿ20 ವಿಶ್ವಕಪ್ದ ಒಂಜಿ ಗೊಬ್ಬುಡು ಬೌಂಡರಿಲೆನ ಮುಕೇನ ಮಾತೆರೆರ್ದ್ ಎಚ್ಚ ರನ್ ಮಲ್ದಿನ ಬ್ಯಾಟರ್ ಪನ್ಪಿ ವಿಶ್ವ ದಾಕಲೆನ್ ತನ್ನ ಪುದರ್ಗ್ ಮಲ್ತೊಂದೆರ್.
- ಮೂಜನೇ ಶತಕ: ನ್ಯೂಝಿಲೆಂಡ್ ಪರ ಟಿ20 ಕ್ರಿಕೆಟ್ಡ್ ಎಚ್ಚ ಸೆಂಚುರಿ ಮಲ್ದಿನ ಬ್ಯಾಟರ್ನಕ್ಲೆನ ಪಟ್ಟಿಡ್ಲಾ ಫಿನ್ ಅಲೆನ್ ಕಡೀರ ತಾನೊಗು ಏರ್ದೆರ್. ಅವುಲಾ 3 ಶತಕ ಆಕುನ ಮುಕೇನ. ಆತೇ ಅತ್ತಂದೆ ಟಿ20 ವಿಶ್ವಕಪ್ಡ್ ಶತಕ ಮಲ್ತಿನ ಮೂಜನೇ ಕಿವೀಸ್ ಬ್ಯಾಟರ್ ಆತೆರ್.
- 4 ಡಾಟ್ ಬಾಲ್: ಫಿನ್ ಅಲೆನ್ರೆನ ಈ ಮಲ್ಲ ಇನಿಂಗ್ಸ್ಡ್ ಕಾಲಿ 4 ಡಾಟ್ ಬಾಲ್ ಮಾತ್ರ ಇತ್ತ. ಪನ್ಡ 33 ಬಾಲ್ಡ್ ಆರ್ ರನ್ ಮಲ್ಪಂದಿನ ಕಾಲಿ 4 ಬಾಲ್ಡ್ ಮಾತ್ರ. ಈ ಮುಕೇನ ಟಿ20 ವಿಶ್ವಕಪ್ದ ಸೆಮಿಫೈನಲ್ಡ್ ಕಮ್ಮಿ ಡಾಟ್ ಬಾಲ್ಲೆಡ್ ಎಚ್ಚ ರನ್ ಮಲ್ದಿನ ಬ್ಯಾಟರ್ ಆತೆರ್.
- ಗರಿಷ್ಠ ಸ್ಕೋರರ್: ಟಿ20 ವಿಶ್ವಕಪ್ ಪರತಿರಿಟೇ ನಾಕೌಟ್ ಗೊಬ್ಬುಡು ಕಾಲಿ ಸಿಕ್ಸ್-ಫೋರ್ಲೆನ ಮುಕೇನ ಎಚ್ಚ ರನ್ ಮಲ್ದಿನ ವಿಶ್ವ ದಾಕಲೆಲಾ ಫಿನ್ ಅಲೆನ್ ನ ಪಾಲಾತ್ಂಡ್. ಈ ಗೊಬ್ಬುಡು 10 ಫೋರ್ ಬೊಕ್ಕ 8 ಸಿಕ್ಸರ್ದ ಒಟ್ಟುಗು ಅಲೆನ್ 88 ರನ್ ಮಲ್ತ್ದ್ ಈ ಮಲ್ಲ ದಾಕಲೆ ಬರೆತೆರ್.